Read Konyak Naga MATTHEU 3 Bible Online

MATTHEU 3 - Konyak Naga bible

MATTHEU 3

¹Tüopa nyih hei hipak me Judea wanwüng jeng me baptipa John üngwünne pei,

²“Monglüptüoh, hangjingne wangdang ahngching owe peiteki.”

³Aohi jeng Isaia hipa kaiye i hatüowa I, aowe i: “Wanwüng jengme üngwünne jaipu ja, Youngwanpa lam tümyah. I lamnyu tingkhakke lingtüoh.”

⁴John-e udhmin inkhek in hüyange I shiengme meisho hit, hüyange I nük ne dukh hei zahtai jelo hah.

⁵Hüwante Jerusalem kahtalan, Judea khongkümpu hüyange Jordan neikonne ngohpu üshei I tangte pei;

⁶hüyange iman ünu janne Jordan yengyin me Iye iman baptitam.

⁷Hüyangpoi aope Phariseelan hei Sadduceelan baptine peipu Iye nge, John ne imante i, “Numan pu hayim, ngoikülak ütuh mepu yinlak numante aowe ngaopha ei?

⁸Numan ütingme monglüp teki she numan nyoingoh kaiye hüotüoh;

⁹hüyange numanpa me ‘Abraham toman üpa she,’ ngaolak tahteih; hangjingne Taowe numante inang tüolan long mepu Abraham hayim Kahwange ngaitamlak.

¹⁰Sha-a nehoi pee yalah ngoiye shaaji wa phei aklak. Ülick ümei yelickpu pee lili aklak hüyange vünte jaklak.

¹¹“Numan monglüppu jingne taowe numan yengme bapti nang. Hüpoi ao ü-pheite peilakeih Iye numante Yaha Üjao hüyange vünne baptilak. I-a ü-phei loishe sheyong pupa hüyange I yashom kilakne nehoi tao wangpu ne yeje.

¹²Iye yoi yakme oun jonne ngohnang. Iye yoi tahnoijing yeonge meiye jaolak hüyange yoi tah bung me jemlak, hüyangpoi tahphan jinte yemeipu vün me Iye jaklak.”

¹³Tüophei me John-e baptitamlak jingne Galilee mepu Jesu Jordan te pei.

¹⁴Hüyangpoi John-e hüke ngaowe pangne ngang, “Üte hei nange baptilak ngohnang. Nang ü-tangte peipu a?”

¹⁵Hüpoi Jesuwe Ite jan, “Üte sha-apu jingne hüke jaling tamtüoh, hangjingne Kahwange mongpu khongkümpu ütahte ngailak teman jingne hüke shunang.” Tüophei me John ne mong.

¹⁶Hüyange Jesu, aope I bapti, yeng mepu mamshe ngai; Ite wangdang eptam, hüyange awshu kih Kahwang yaha yupu Iye nge hüyange I tangme ngoi;

¹⁷hüyange leihuyah, wangmepu ngaoja hüke i, “Hatüowa ü-mongkenpu Ha, aote Taowe yeonge mong hah nang.”