Read Konyak Naga MATTHEU 4 Bible Online

MATTHEU 4 - Konyak Naga bible

MATTHEU 4

¹Tüophei me kahshih-e toklak jingne, Yahawe wanwüng jengte Jesu woitei.

²I nyih deli hüyange pha deli nyaole yangphei me I seanyao;

³tüophei me tokpupa pei hüyange Ite i, “Nang Kahwang üha ne mengma-a tüolan longte an ne mengne itüoh.”

⁴Hüyangpoi Iye janne i, “Hatüo nyan ngohnang. An shaha phei kahta ngohne ye-ok, hüyangpoi Kahwang ju mepu ngaipu ngao phei ngoh ok.”

⁵Tüophei me kahshih-e I üjao chingnyu te woitei. Iye yopnok shedaopupa tangme I shotne tam

⁶hüyange Ite i, “Nang Kahwang üha ne mengma-a, nang nying nyingke yeitüoh, hangjingne hatüo nyanne ngohnang: “ ‘Iye yoi shongmokpalante nang jingne ngaophalak,’ hüyange ‘Iman yakme nanga pailak, tüokhei nanga nang ya long me yashah hüone yetamlak.’ ”

⁷Jesuwe Ite janne i, “Laingao me hatüo nyanne ngohnang, nange nang Youngwanpa Kahwang tokne tahtam.”

⁸Üne-o kahshih-e yeonge daopu kahtangte I woi in, hüyange kahtoknyu ahngchinglan hüyange iman müktishiwapu khongküm Ite hüo;

⁹hüyange Iye Ite i, “Nang ümme tayange üte khümma-a taowe tüolan khongkümpu nang te phalakei.”

¹⁰Tüophei me Jesuwe Ite i, “Taitüoh, Satan! Hangjingne laingao me hatüo nyanne ngohnang, ‘Nange nang Youngwanpa Kahwang te khümlak, hüyange I shaha shaoshantüoh.’ ”

¹¹Tüophei me kahshih-e I ang, hüyange mokhshe wangdang shongmokpalan pei hüyange Ite pao.

¹²Aope Jesuwe John phoyange küpnok me angteki she jai, I Galilee te leihye.

¹³Nazareth tüohyange I pei hüyange Zebulun hei Naphtali yikeng ye me, yengching phin Kapernaum me nyoi.

¹⁴Hatüowa Isaia hipawe ngaoyangpu ngao ütah te ngailak jingne:

¹⁵“Zebulun kahtok hüyange Naphtali kahtok; yengchingye lamme, Jordan kaiye, Galilee, yinhulan kahmük,

¹⁶aoyin kahta wangnyak me shotte ngoh wangngai üyong ngelak, hüyange aoyin yimlam yashüm kahtok me shotte ngoh wangngai teelak.”

¹⁷Tüohipak me wange Jesuwe konnyüo hüyange i, “Monglüp tüoh, hangjingne wangdang ahngching owe peiteki.”

¹⁸Jesu Galilee yengching phinme kemwante Iye Ijei Inao ni, Simon ao te Peter she nyik, hüyange Inao Andrew yengching me shaan shaiye nge, hangjingne iman nyah ompalan ne ngoh.

¹⁹Jesuwe imante i, “Wenyah, ü-phei te woikei, hüyange Taowe numan kahtalan ompa ne mengtam pha ning.”

²⁰Mamshe iman-e yoi shaan tüohyange Ipheite woi.

²¹Aope I yelakpe tüomepu kemme tai Iye ülao Ijei Inao ni, Zebedee üha Jeams, hüyange Inao John, lisheng ja me iman üpa Zebedee phei iman shaan tümme nge; hüyange Iye imante nyik.

²²Hüwante muh iman-e lisheng hei iman üpa tüohyange, hüyange I pheite woi.

²³Jesu Galilee kahtok üshei yete, iman Synagoguelan me nyüowe, Ahngching pungao ümei nyüowe, hüyange kahta yo mepu daktin ülam lili hüyange dakpalan meiye tai.

²⁴I jeng ngaolan Syria kahtok üshei yete yan, hüyange iman I tangte ülam maawe dakpu dakpalan üshei, hüyange lat dakpu, laa omme dakpu, mahudak dakpu, hüyange yimtin dakpu üshei pei hüyange Iye iman meitam.

²⁵Hüyange Galilee mepu, Dekapolis mepu, Jerusalem mepu, Judea mepu, hüyange Jordan jayekao mepu ükhong üyong I pheite woi.