Read Konyak Naga MATTHEU 5 Bible Online

MATTHEU 5 - Konyak Naga bible

MATTHEU 5

¹Aope Jesuwe ükhong nge, I kahtangte ong; hüyange aope I shot, yoi pinlan I tangte pei.

²Hüyange Iye imante yoi ju ep hüyange hüke nyüowe i:

³“Aoyinne iman yaha me toinanpu shing iman mongmei lak; hangjingne wangdang ahngching iman jing.

⁴Aoyin mangshap nang iman mongmeilak, hangjingne iman toloi meitamlak.

⁵Innenyaipalan mongmeilak; hangjingne iman-e kahtok mothleilak.

⁶Hanghe khakshupupa jingne aoyin seanyao hüyange yengle iman mongmeilak; hangjingne iman mohtamlak.

⁷Aoyinne eihate shüpshe hüo iman mongmeilak; hangjingne iman-e shüpshe tüolak.

⁸Mongjang jaoshih ngohpalan mongmeilak; hangjingne iman-e Kahwang ngelak.

⁹Chingmei lingpalan mongmeilak, hangjingne imante Kahwang hayim she nyiklak.

¹⁰Khakshupupa jingne shangne tampalan mongmeilak, hangjingne wangdang ahngching iman jing.

¹¹“Aope kahtawe ü-jingne numante phoiye teetamlakei, hüyange numan shangshih ne tamlakei, hüyange numan phei tüi-e ngaoleih-e ümeng üshei ngaolakei, hüwante numan mongmei tüoh.

¹²Hangjingne hatüokih iman-e aoyin hipalan numan shaome pei imante shaoshine tamyangki. Monghahyah hüyange mongmei yah, hangjingne wangdang me numan jingne khintak üyong angnang.

¹³“Numan kahtoknyu hüm. Hüyangpoi hüm me Ime wüngpu mahküma-a, hangheye tüopa nishe hümne mengtamlak? Hatüo shaaji hanghe ne-o yemei; shaaji winlak hüyange kahta yawe loklak.

¹⁴“Numan kahtoknyu wangngai. Kahtang me ngohpu chingnyu ja jüopu ye-ok.

¹⁵Muhto mongme anglak jingne kahtawe vüntük yepah hüyangpoi vüntük yongjing me, hüyange nokme ngohpu kahta lilite teelak jingne angnang.

¹⁶Hatüo kih kahta sheshao me numan wangngai teelak yang, hümme nakshih iman-e numan toimei ngelak hüyange wangdang me ngohpu numan üpa müktishiwalak.

¹⁷“Ngaokhüm yejema-a hipalan ne nyüopu menge winlak jingne Tao peipu she tahteih, iman menge winlak jingne yeje hüyangpoi iman wangngoilak jingne Tao pei.

¹⁸Ütingpa me Taowe numante inang, wang hei kahtok linne mantai mantai, hüyange üshei manngai manngai, nyanpu aikek üjoi ja yejema-a nyanpu lai ngaokhüm lai mepu aope-o lin yetailak.

¹⁹Tüokhei aowe tüolan ngaokeng yo me üjoiha ja nehoi menglakei, hüyange hüke linglak jingne kahta te nyüolakei, wangdang Ahngching me Ite üjoipa she nyiklak; hüyangpoi aoyinne tüolan jonlakei hüyange nyüolakei imante wangdang ahngching me üyong she nyiklak.

²⁰Hangjingne Taowe numante inang numan üjaopa ne mengpu ngaokeng nyüopalan hei phariseelan phei ünyei jaowe meiye yenangma-a wangdang ahngching te ye-ong oklak.

²¹“Lintepu hipak me kahtalante ipu numan-e jaiyangki, ‘Nange tahtoi; aowe toilakei I ngaophünpu ngohlak.’

²²Hüyangpoi Taowe numante inang aowe yoi jeiheinao phei mongshih ngailakei I ngaophünpu ngohlak; aowe yoi jeiheinaote teelakei, I Pangshanlan sheshaome ngaophünpu ngohlak; aowe ngapa she ilakei, I vünjhom me ngohlak.

²³Tüokhei nange nang hünghao wümjong me do ne iwante, hüyange nang jeiheinaowe yejema-a nyanao nang phei yemeipe ngohma-a,

²⁴nang hünghao lengjong shaome angtüoh; üwangne yetüo hüyange nang jeiheinao phei mongken hahjieng ling yah, hüyange tüophei me yetüoh hüyange nang hünghao doyah.

²⁵Nang phei yemeipa phei lamme ngohwante muh shümpa ne menge lanyah, yejema-a Iye nang ngaophünpalante phünne phakülak, hüyange ngaophünpalan-e phopalante, hüyange nanga küpnok me angtamphalak.

²⁶Ütingme Taowe numante inang, nange ükümpa ngin panne manpha manpha tüomepu nang ngaipu ye-oklak.

²⁷“Numan-e tüo ipu jaiyangki, ‘Numan-e phwngngampu toi tah ling.’

²⁸Hüyangpoi Taowe numante inang aoyinne sheko te I phei mong ngaiye leilakei I mongjang me yha phei phwngpu toi lingteki.

²⁹Nang yakjah ye mükke nang ünu omne tamma-a, tüopa yoktüoh hüyange wintüoh, hangjingne nang püm khongkümpu vünjhom me mah leima ümük ja yenangpu shemei.

³⁰Hüyange nang yakjah ye yakke nang ünu omne tamküma-a, langtüoh hüyange wintüoh, hangjingne nang püm khongkümpu vünjhom me mah leima, yakja mahpu shemei.”

³¹“Hatüo ipu jaiyangki, ‘Aowe yoi sheko yantamlakei yha te sakilai phalak wongpong.’

³²Hüyangpoi Taowe numante inang aowe yoi sheko yantamlakei, hüyange yha yemeipe yengoh, yha phwngngam ne tamnang; hüyange aowe yanne ngohpu sheko yahlakei phwngngampu toi lingnang.”

³³“Üne-o, lintepu hipak me kahtalante ipu numan-e jaiyangki, ‘Nange tahleih iye jiengpu tahyah; hüyangpoi nang Youngwanpa sheshao me jiengyangpu lingtüoh.’

³⁴Hüpoi Taowe numante inang, lanshe tahjieng, wangdang min me-o tah, hangjingne hatüo Kahwang shotjing,

³⁵yejema-a kahtok min me-o tah, hangjingne hatüowa I yashop jing, yejema-a Jerusalem min me-o tah, hangjingne hatüowa ahngyong chingnyu;

³⁶yejema-a numan shange tahjieng, hangjingne nange shangmin ja nehoi ühengne yejema-a ünyak ne lingpu ye-oklak.

³⁷Numan ngao jenang she ima-a jenang she hüyange yeje she ima-a yeje she iyah. Hatüo phei nyeiye hangyin ngailakei ünu mepu ngainang.

³⁸“Numan-e hüke ipu jaiyangki, ‘Mük nanleiye mük, hüyange fa nanleiye fa’.

³⁹Hüyangpoi Taowe numante inang, ümengpa phei tahtee hüyangpoi ütam-e nang te nang yakjahye mengya me leima-a Ite jayekao-o hüotüoh.

⁴⁰Kahta ütam-e nang phei ngaophün jing te taihuma-a hüyange nangjing (ümongpa) phakshaoh yah huma-a nang inkhek-o yah ne tamtüoh.

⁴¹Kahta ütam-e nang te mile ja tailak kangma-a, I phei mile ni taitüoh.

⁴²Aowe nang te tongnang Ite phatüoh, hüyange nang mepu ü-sea yah-hupu kahta mepu nang tahlüp.”

⁴³“Numan-e hüke ipu jaiyangki, ‘Nange nang yupite kenlak, hüyange nang wepate nuyah.’

⁴⁴Hüyangpoi Taowe numante inang, numan wepa lante kenyah hüyange numante shangne tampalan jingne yoptüoh,

⁴⁵tüo kaiye numan wangdang mepu numan üpa hayim ne mengpu oklak, hangjingne Iye yoi wanghe ünu hüyange ümeilan tangme ongne tamnang hüyange ümei lingpalan hei ümeng lingpalan tangte Iye wai shonnang.

⁴⁶Hangjingne numante kenpalan te hei numan-e kenma-a, numan hanghe hünghao ngohnangki? Kahngin shaipalanne-o hüke yeling a?

⁴⁷Hüyange numan-e numan jeihei naolan shahate salam phaküma-a, eihalan phei nyeiye numan-e hang ling nangki? Yinhulane-o hatüo kih yeling a?

⁴⁸Tüokhei, wangdang me ngohpu numan üpa hangke wangngoi, hatüokih numan-o wangngoilak wongpong.