Read Konyak Naga MATTHEU 6 Bible Online

MATTHEU 6 - Konyak Naga bible

MATTHEU 6

¹“Kahtawe ngelak jingne iman sheshaome üjaopa toi yelinglak numan-e kentingyah; hüke lingma-a wangdang me ngohpu numan üpa mepu hünghao numan jingne hango yenanglak.

²“Tüokhei aope nange jajang jawe meipu toimei lingyalakei, jutok meipalanne synagogue me hüyange chingkeng lamnyu me kahtalan-e yihlupu phatamlak jingne üngwünpuke, nange kahtalan sheshao me nyawong tahwüng. Ütingha me Taowe nangte inang, iman-e imanjing khintak tüoteki.

³Hüyangpoi aope nange jajang jawe meipu toi lingyalakei, nang yakjah yewe hanghe lingnang nang yaknya yete shingne tah tam,

⁴tüokaiye nange jajang jawe mei ling yangpu yeshinglak; hüyange nangpa aowe lowe leinang Iye nang te khintak yahpha lak.”

⁵“Aope numan-e yoplakei, jutok meipalan kih numan tah nang, hangjingne iman-e kahtalan-e ngelak jingne synagogue me hüyange lampong me yongyange yoplakte iman-e lengnang. Ütingpa me Taowe numante inang iman-e iman khintak tüoteki.

⁶Hüyangpoi aope nange yoplakei, ümongpa nang tüp te ongtüoh, nange taküp yah, hüyange nangpa ao lowe ngoh Ite yoptüoh; hüyange nangpa aowe lowe ngenang Iye nangte khintak yahphalak.

⁷“Aope yoplakei yinhulan-e ngaopukih wongpong yenangpu ngao tahyop, hangjingne iman-e ngao maawe ngaoküme Kahwange jailak she iman-e teih.

⁸Iman kih tahnang hangjingne numan-e hanghe wongpong numan-e tongshao me muh numan üpawe shingnang.

⁹Numan-e hatüokih yopyah: “ ‘Wangdang me ngohpu toman Üpa, Nang üjaopa min yongning

¹⁰Nang ahngching peikei, wangdang me hangke ngoh, kahtoknyu me nange mongpu kih lingpha.

¹¹Tenyih tomante nyihjeih hahlak yahkei.

¹²Hüyange toman-e mih ümeng winpu kih-e tüo kih-e toman ümengo winpha.

¹³Hüyange toklak jingne toman tahwoi, hüpoi ümengpa mepu toman tükyah.’

¹⁴“Hangjingne numan-e mih ümeng winma-a, numan wangdang üpawe-o numan ümeng winlak;

¹⁵hüyangpoi numan-e mih me ngohpu iman ümeng yewinküma-a, numan üpawe-o numan ümeng yewintamlak.”

¹⁶“Aope numan nyaowelelakei, jutok meipalan kih sheta menge tah hüo, hangjingne kahtalan-e iman nyaowelepu min shingyah she iman sheta kuiye menge hüonang. Ütingpa me Taowe numante inang, iman-e iman khintak tüoteki.

¹⁷Hüyangpoi aope nang nyaowelelakei, nang shang me minnga phoyah hüyange nang sheta layah,

¹⁸hümme kahtalan-e numan nyaowele nangki she shinglak ne yeje, lowe ngohpu nangpa hei shinglak; hüyange nangpa aowe lowe nge Iye khintak phalak.”

¹⁹“Numan-e yoi jingne kahtok me shengngin tah yo, ümeken me shiak hei müt hah mengnang, hüyange ümeken me kuhpawe menge ongnang hüyange kuhnang;

²⁰hüyangpoi numan jingne shengngin wangdang me yoyah, ümeken me shiak yejema-a mütte iman yemeng ok, hüyange ümeken me kuhpalan-e menge ye-ong hüyange yekuh.

²¹Hangjingne ümeken me numan shengngin ngoh, tüoken me numan mongjang-o ngoh nang.”

²²“Mük-a püm jingne vüntük ngohnang. Nang mük meiye ngohma-a nang püm khongkümpu wangngaiye maawe ngohlak;

²³hüyangpoi nang mük yemeipe ngohma-a püm khongkümpu wangnyake maawe ngohlak. Hüyange nangme ngohpu wangngai nyakke ngohma-a, tüopa nyakpuwa hangshin yonglak!”

²⁴“Aowe-o nokpu ni shao yeshan ok; hangjingne Iye ja te nulak hüyange ja te kenlak; yejema-a ja te mongphün phalak hüyange ja te ye-i-yeshelak. Numan-e Kahwang hei moth moini shao yeshan ok.”

²⁵“Tüokhei Taowe numante inang, numan üyin jingne hang hahlak yejema-a numan-e hang yinglak, yejema-a numan püm jingne hanghe inlak mong tahshang. Hahying phei üyin yongpu, hüyange nyemo phei püm yongpu yeje a?

²⁶Wang awhalante leiyah: iman-e yedei yejema-a yewet, ye-i-ma-a bung me yejem; hüyangpoi numan wangdang üpawe iman tamnang. Hüma-a iman phei numan ünyei yongpu ne yejepu a?

²⁷Numan ütam-e meiyange lengpu jingne yakkong ja nehoi I üyin jinte paopu oklak a?

²⁸Hüyange hangne numan nyemo jingne mongshang pu? Phao shengshap jupeng hangke jong teih tüoyah. Iman-e yeling, iman-e ve yephek,

²⁹hüyangpoi Taowe numante inang, Solomon I müktishiwapu üsheiye hatüo yo me ja leye ye-o-ok.

³⁰Hatüo kih Kahwange phao hünglante inne tamküma-a, hanghepa tenyih tüome ngoh hüyange ngainyih vün me jakwenlaklan! Üjingha ütinglakpu kahtalan. Iye numante ünyei inne yetamlak a?

³¹Tüokhei, ‘toman-e hang hahlak?’ Yejema-a ‘toman-e hang yinglak?’ Yejema-a toman-e hang inlak? she iye mong tahshang.

³²Hangjingne yinhulan-e tüolan khongkümpu yamnang, hüyange numan-e tüolan khongkümpu yahhu nang she numan wangdang üpawe shingnang.

³³Hüyangpoi üwangne numan-e Kahwang ahngching hüyange I üjaopa yamtüoh, hüyange tüolan üshei numante paowe yahphalak.

³⁴Tüokhei ngainyihpu jingne mong tahshang, hangjingne ngainyih-e yoi nying nyingke mong shanglak. Nyih jeih she yoi shange shaoshi wange ngohnang.