Read Konyak Naga MATTHEU 7 Bible Online

MATTHEU 7 - Konyak Naga bible

MATTHEU 7

¹“Numan te ngao yephün tamlak jingne numane-o ngao tahphün:

²Hangjingne numan-e mih ngao phün pu kih numan te ngaophün lak, hüyange mih jingne hanghe toklak numan-e jon tüopa toklak numan jingne-o jonlak.

³Hangne nange yoi mükme ngohpu mak (pesho) yeteih tüope nang jeihei nao mük me ngohpu müksa te lei nangki?

⁴Yejema-a nang mükme müksa ngohyange, ‘taowe nang mük mepu mak winpha ning’ she nange nang jeihei naote hangke ilak?

⁵Jutok meipa, üwangne nang mük mepu müksa hüng wintüoh, hüyange hüwante nange nang jeihei nao mük mepu mak winlak meiye ngelak.

⁶“Hanghepa üjaopa ngohnang hatüo kuihalan te tahpha, hüyange aklan sheshao me yüknyu tah win; numan-e lingma-a, iman-e tüolan iman yaphang me loklak hüyange leih ye-e numan phünkhoih phalak.”

⁷“Yutüoh, hüyange hatüo numante yahphalak: yamtüoh hüyange numan-e tüolak, kongtüoh hüyange hatüo numan jingne epphalak;

⁸Hangjingne aoyinne tongnang iman liliye tüonang, aoyinne yamnang tüonang; hüyange aowe kongnang I jingne eptamlak.

⁹Iye an jingne yuwante yoi ha te long ja phalak numan ütam ngohnang kü a?

¹⁰Yejema-a Iye nyah ja yuwante pu ja Ite phalak?

¹¹Hüma-a numan, aoyin yemei, numan hayimlan te hünghao ümei phalak shingma-a, wangdang me ngohpu numan üpawe Ite yupalan te hünghao ümei phalak hangshin shinglak!

¹²“Kahtalan-e numan-e yah hupu hangyin numante lingne tamhu nang, imante-o ling tamtüoh, hangjingne Ngaokeng hüyange hipalan ngao hatüo ngoh nang.”

¹³“Pejong shehitpu te yutüoh, hangjingne pejong yongpu hüyange lamnyu khaopu kaiye mahlak lam, hüyange aoyin tüopa lamte tainang iman maawe ngohnang.

¹⁴Hangjingne üyin lamnyuwa pejong shehitpu kaiye hüyange tüophei yeonge wanpu lam tüokhei tüopa ngepulan-a üjingha hei ngoh nang.”

¹⁵“Tahleih hipalan jingne numan kenting yah, aoyin nyee o oyange numan tangte peinang hüyangpoi ümongme phuh hahlak sholan kih ngohnang.

¹⁶Iman ülicklan me numan-e iman-a shinglak. Kahtalan-e wuwünglick huhwu mepu, yejema-a phuklick shongshanwu mepu khai nang kü a?

¹⁷Tüokih-e, pee ümei liliye ülick ümei licknang, hüyange pee ümenglan-e ülick ümeng lick nang.

¹⁸Pee ümei ja me ülick ümeng lickne ye-ok, yejema-a pee ümeng me ülick ümei lickne ye-ok.

¹⁹Pee lili hanghepawe ülick ümei yelick hatüowa aknang hüyange vün me shüpnang.

²⁰Tüokhei, iman ülick kaiye numan-e iman shinglak.”

²¹“Üte ‘Youngwanpa, Youngwanpa,’ she ngaopu lili wangdang ahngching te ye-ong oklak: hüyangpoi aoyinne wangdang me ngohpu Üpawe mongpu ling I onglak.

²²Tüonyih maapuwe üte ilak, ‘Youngwanpa, Youngwanpa, toman-e nang min me hi-ngao ye-i a? Hüyange nang min me laa yejang a? Hüyange nang min me üngan toi maawe yeling a?’

²³Hüwante Taowe imante shingne tamlak, ‘Taowe numan aope-o yeshing; numan ngaokeng menge ngohpalan, ü-mepu yantüoh.’

²⁴“Aoyinne ü-ngao hatüoyin jai hüyange ling kentamongtingpu kahta aowe longnyu tangme nok we, I leye ngohlak;

²⁵hüyange waikei, hüyange yengyong muleam pei, hüyange wangyang lei hüyange nok te shung, hüyangpoi hatüo yetoi; hangjingne hatüo nokjing longnyu tangme ling.

²⁶Hüyange aoyinne ü-ngao hatüoyin jai hüyange tüolan yeling, pheih tangme nokwepa üngapa kahta kih nanglak.

²⁷Waikei, yengyong muleam pei, wangyang lei, tüolan wonge nokte shung; tüopa toita hüyange hatüo toitapu üyong ngoh.”

²⁸Sha-a aope Jesuwe tüolan ngaowe sho, Iye nyüopu konte ükhong yashan,

²⁹hangjingne Iye iman ngaokeng nyüopalan kih yeje, hüyangpoi üngan wong ngohpu kahta ja ne Iye imante nyüo.