Read Konyak Naga MATTHEU 8 Bible Online

MATTHEU 8 - Konyak Naga bible

MATTHEU 8

¹Aope Jesu kahtang mepu yu, ükhong üyong Iphei te woi.

²Hüyange hüowü, ngonpa ja pei hüyange I sheshao me ümme khümme Iye hüke i, “Youngwanpa, nange mongma-a, nange tao jaowe tamne ok.”

³Jesuwe I yak no hüyange Ite jonne i, “Taowe mongnang; nang jaotüoh.” Hüwante muh I ngondak mepu I jao.

⁴Hüyange Jesuwe Ite i, “Leiyah, nange aote-o tah i, hüyangpoi taitüoh hüyange ngengpa te nang hüotüoh, hüyange kahtalante nang jaopu saki hüowe, Mosa phapu ngaokih dopu hünghao phatüoh.”

⁵Aope Jesu Kapernaum te ong Roman woipa ja I tangte pei hüyange Ite khümme hüke i,

⁶“Üyongpa, ü shaoshanpa yimtin ne jamloi dakteiye nokme lamme ngohnang.”

⁷Jesuwe Ite i, “Tao peikülak hüyange I meilak.”

⁸Roman woipa janne i, “Üyongpa, tenok yaoshüm phang te nang peitamlak taowe yewang, hüyangpoi ngao shahame ipha, hüyange ü shaoshanpa meilak.

⁹Hangjingne tao wong pheipu kahta ja, hüyange ü-phang me kengphetlan ngoh nang. Taowe hatüote inang, ‘Taitüoh,’ hüyange I tainang, hüyange japa te, ‘Wenkei,’ hüyange I wen nang; hüyange ü rhapate, ‘Tüo lingtüoh,’ hüyange Iye hatüo lingnang.”

¹⁰Tüopa ngaojaiyange Jesu yashan hüyange I phei woipalante i, “Ütingme Taowe numante inang, Israellan aome-o hükihpu ütinglakpu üyong Taowe mannge.

¹¹Taowe numante inang, ‘wanghe ongjing hüyange nyüpjing’ mepu maawe peikülak, hüyange wangdang ahngching me Abraham hüyange Isaac hüyange Jacoblan phei khao me shotlak;

¹²hüyangpoi ahngching halan nokshao ünyak me shüppe winlak; tüoken me shappu hei fa ngaopu ngohlak.”

¹³Jesuwe Roman woipate i, “Taitüoh, nange ütinglakpu kih nang jingne lingtamlak;” hüyange hatüo hipak khakshuwe shaoshanpa mei.

¹⁴Aope Jesu Peter nokte ong hüyange Peter ü-nyei tinye dak-e lengme lamyange ngohpu nge.

¹⁵Iye yha yak nowe jon hüyange tinye yha mepu yan, hüyange yha laowe Ite namnowe pha.

¹⁶Aope ün ngoiye pei iman-e I tangte laawe tükpu dakpalan üngang woipei. Jesuwe ngaopha ja phei yahalan jangtei, hüyange dakpalan üshei meitam.

¹⁷Hatüowa Isaia hipa kaiye ngaoyangpu ütahte ngailak jingne: “Teman daklakpu Iye yah hüyange teman daktin Iye ki.”

¹⁸Sha-a aope I neikonne ükhong üyong nge ülao janyete tailak jingne Jesuwe ngaopha.

¹⁹Hüwante ngaokeng nyüopa ja pei hüyange Ite i, “Konnyüopa, nang ümeken me tailakei tao nang pheite woiküning.”

²⁰Hüwante Jesuwe Ite i, “Hiyanlan üsha ngohnang hüyange wang awhalan ülüp ngohnang; hüyangpoi kahta üha shangje jing yenang.”

²¹Pin yo me ülao jawe Ite i, “Üyongpa, üwangne taowe üpa mang muyang küning üte yelak o-ngao yahkei.”

²²Hüyangpoi Jesuwe Ite i, “Ü-pheite woikei, hüyange lipalan-e iman lipu mu ne tüotüoh.”

²³Aope Jesu lishengja te ong I pinlan I pheite woi.

²⁴Mokhshe yengching me waishihwangkhah üyong ngai, tüokaiye lisheng yengmokh me hümme ngoh; hüyangpoi Jesu shiye ngoh.

²⁵Hüwante iman I tangte pei hüyange Ite loiye i. “Youngwanpa toman yinpha toman mahpuweih!”

²⁶Iye imante i, “Ütinglakpu üjingha ngohpalan, numan hangne nyampu?” Tüophei me I laowe yong hüyange wangyang hei yengching te teeye ngao, hüyange yeonge yonge wüngmah.

²⁷Kahtalan-e yashanne hüke i, “Hatüowa hangkihpu kahta, hangjingne wangyang hei yengchinge-o Ite jai nangki!”

²⁸Aope I Gadarenes kahtok ülao janyete pei, hüwante mangjong mepu ngaipu, laa ompu kahta ni, I phei hüo. Iman yeonge nyamlak ne ngoh tüokhei tüopa lam kaiye ao-o yekem pe ngoh.

²⁹Iman-e üngwün, “Kahwang üha, nange toman phei hanghi linglak ngoh nangki? Hipak manngoipe toman ponghahne nang tüome peipu a?”

³⁰Sha-a iman mepu meiyange yejaipe ak ükhong ja heei hah ngoh.

³¹Laalan-e Ite tonge hüke i, “Nange toman jange teine ima-a, ak ükhong tangte toman teipha.”

³²Jesuwe imante i, “Taitüoh.” Iman ngai hüyange taiye aklante ong hüyange ak ükhong khongkümpu yengnah wak ülute phet hüyange yengme hünge li.

³³Ak yompalan phettai hüyange chingte pei. Chingme iman-e laalan jeng hüyange ngaipu lampheli ngaiye i.

³⁴Chingshao kahta khongkümpu Jesu phei hüone pei, hüyange aope iman-e I nge, iman kahtok mepu yanne tailak jingne Ite tonge i.