Read Konyak Naga MATTHEU 9 Bible Online

MATTHEU 9 - Konyak Naga bible

MATTHEU 9

¹Tüokhei Jesu lisheng te ong, yeng kaiye tai hüyange yoi chingte pei.

²Iman-e yimtinne dakpu kahta ja lengme lamyange I tangte yahpei, hüyange Jesuwe iman ütinglakpu ngeye, yimtin dakpate i, “Üha, mengha yah! Nang ünulan winyangki!”

³Hüwante ngaokeng nyüopalan ütam-e iman pa me hüke ngaowe i, “Hatüo kahtawe Kahwang te yaonang.”

⁴Iman juteih ngeye Jesuwe i, “Hangne numan mongme ünu juteih ngohpu shi?

⁵Hangjingne ümpehepa she-o-lak? ‘Nang ünulan winyangki,’ yejema-a ‘lüotüoh hüyange kemtüoh,’ she ipu she-o-lak shi?

⁶Hüyangpoi numan-e kahta üha me kahtoknyu me ünu win oklak wong ngohnangki she shinglak nanjingne” - hüwante Iye yimtin dakpate i, “Lüotüoh, nang leng paiyah hüyange nokte yetüoh.”

⁷I lüo hüyange nokte ye.

⁸Aope ükhonge tüopa nge, iman nyam, hüyange aowe hükihpu üngan kahtate pha, tüopa Kahwang minyong.

⁹Jesuwe tüopa nyoi tüoh, hüyange I kem-e taiwante kahngin shaiye jemjing me Mattheu she minpu kahta ja Iye shotte nge, hüyange Iye Ite i, “Ü-pheite woikei.” Mattheu yong hüyange I pheite woi.

¹⁰Jesu Mattheu nok me khao me shotte ngoh, hüyange kahngin shaipalan maawe hüyange ünulan pei hüyange I hüyange I pinlan phei jamme shot.

¹¹Aope Phariseelanne tüopa nge iman-e I pinlante i, “Hangne numan konnyüopawe kahngin shaipalan hei ünulan phei jamme hahpu shi?”

¹²Iye tüopa jai hüyange i, “Aoyin meiye ngoh iman jingne soihüngpa wongpong ne yemeng; hüyangpoi aoyin dak iman jingne wongpong.

¹³Taitüoh hüyange hatüo hanghete leppu shingyah, ‘Taowe shüpshe lengnang hüyangpoi toidopu yeje.’ Tao khakshupulan nyiklak jingne yeje, hüpoi ünulan nyiklak jingne pei.”

¹⁴Tüophei me John pinlan Jesu tangte pei hüyange i, “Hangne toman hüyange Phariseelan sha-a sha-a nyaole, hüyangpoi nang pinlan hangne yenyaolepu?”

¹⁵Jesuwe imante i, “Nyemthepa iman phei jamme ngohyange I shümpalan shaplak a? Hüyangpoi hipak ja peilak aope nyemthepa iman mepu yahteilak; hüwante iman nyaolelak.

¹⁶Aowe-o nye ülang me nye üla yenem. Hangjingne nempupawe ange ngohpupa hitte yahnang, hüyange üwo shemengpu ngainang.

¹⁷Hüyange kahtawe meishotük ülang me wuwüngti üla yehin; hüke iman-e lingma-a, meishotük phüplak, wuwüngti yünne taikümlak hüyange meisho mengnang; hüyangpoi iman-e wuwüngti üla meishotük üla me hinnang, hüyange moini meiye angnang.”

¹⁸Aope Iye imante ngaowe ngoh, hüowü, Jehudi wanglam lampa ja peingoi hüyange I sheshao me ümme khümme i, “Üha sheko naha, sha-a meimei liteki; hüyangpoi peikei hüyange yha tangme nang yak angtam pha, hüyange yha yanglak.”

¹⁹Jesu yong hüyange I pheite woi hüyange I pinlan-o I phei tai.

²⁰Hüyange hüowü, sheko ja ao wangpeng penme ni yelakpe iy taipu ngoh, tokphei yeme pei hüyange I jing inkhek jengte jon;

²¹hangjingne yhawe yoi nying nyingke hüke i, “Taowe I jing inkhek jengte nehoi jonma-a tao meipu oklak.”

²²Jesu lüppe ye, hüyange yha ngeye Iye i, “Monghah yah, Üha! Nang ütinglakpuwe nang meiteki.” Hüyange shekonyu hatüo hipak memuh mei.

²³Hüyange aope wanglamlampa nokte Jesu pei, hüyange nyawong hei shengli wüngpu hei kahta üngang moppe ngoh pu ngeye,

²⁴Iye i, “Moilan yantüoh, yhameinyu lipu yeje; yha shinang.” Hüwante iman-e Ite nyiye tam.

²⁵Hüpoi aope ükhong nokshaote yuwe küm, I tüpsate ong hüyange yha yak me shu, hüyange naoyhanyu lüo.

²⁶Hatüo ngaolan tüopa kahmük üshei yete yan tai.

²⁷Jesuwe tüopa nyoi tüoh, hüyange I kemjang kemme ngohwante mükmüopa ni I pheite woi, üngwünne hüyange hüke ngaowe i, “David üha, tomante shüpshe pha.”

²⁸Aope I noksa ja te ong mükmüopa ni I tangte pei, hüyange Jesuwe imnite i, “Taowe hatüo linge oklak she numan-e ütinglak nang kü a?” Imniye Ite i, “Üm, üyongpa.”

²⁹Tüophei me Iye imni mükte jonne i, “Nangniye ütinglakpu kih hatüo nang nite ngaitüoh.”

³⁰Imni mük ep, Jesuwe imnite kentinglak ne ngao, hüyange i, “Aote-o tüopa shingne tahtam.”

³¹Hüyangpoi imni yanne tai hüyange tüopa kahtok üshei yeme I jeng meiyange jalunne jaine tam.

³²Aope iman yanne tai, laa ompu ngao-ükpa ja üne-o I tangte woipei.

³³Aope laa jange tei ngao-ükpa kahtawe ngaopu ok. Ükhong yashan hüyange hüke i, “Israel me hatüo kih ngaipu aope-o mannge.”

³⁴Hüyangpoi Phariseelan-e i, “Laalan janglak jingne Iye laa Ahngpa jon tüohpu üja.”

³⁵Jesuwe chingnyu hei chingha üshei yete iman synagogue me konnyüowe, ahngching pungao ümei konnyüowe hüyange dakpalan hüyange daktin ülam maapu meiye kem.

³⁶Aope Iye ükhong nge iman jingne I mongshange teih, hangjingne “Nyeeyompa ja yenangpu nyee kih,” iman mongshang hüyange ülam yenang.

³⁷Hüwante Iye yoi pinlante i, “Tah maawe nyinteki, hüyangpoi nanpalan yewang.

³⁸Tüokhei tah nokpupawe I tah yahlak nanpalan shonlak jingne yoptüoh.”