Read Konyak Naga MARK 1 Bible Online

MARK 1 - Konyak Naga bible

MARK 1

¹Hatüowa Kahwang üha Jesu Khrista pungao ümei ükong wangpu.

²Isaia hipawe nyanpukih, hüke ükong wang: “Kahwange i, ‘Taowe nang sheshao me ü-shongmokpa shon nang.’ Iye nang jingne lam tümlak.

³Wanwüng jengme jawe üngwünpu ngaowüng, ‘I jingne Youngwanpa lam tümtüoh, I kemlak lamnyu tingkhakke tümtüoh!’ ”

⁴Wanwüng jengme John ngai, kahtalan te bapti, hüyange I konnyüo. Iye kahtalan te hüke i, “Numan monglüp tüoh hüyange baptitüoh;” “Hüyange Kahwange numan ünu winpha lak.”

⁵Judea hüyange Jerusalem chingnyu me ngohpu kahta lili John-e nyüopu ngao jai ne pei. Iman-e iman ünu jan hüyange Iye Jordan yengyin me iman baptitam.

⁶John-e udh min pheipu inkhek in, hüyange shiengme meisho hit; hüyange Iye dukh hei zahtai jelo hah.

⁷Iye kahta lante hüke konnyüowe üngwün; “Tao ümme tayange I yashom wu nehoi lan ne yewangpu ü-phei wong sheyongpupa ü-pheite peiküki.

⁸Taowe numan yengme bapti nang, hüpoi Iye numan Yaha Üjao me baptilak.”

⁹Tüopa nyih hipak me Galilee kahtok me ngohpu Nazareth mepu Jesu pei, hüyange Jordan yengme John ne I baptitam.

¹⁰Yeng mepu Jesu ngaipu phei jamshe wangdang epyange Iye nge hüyange I tang me awshu kih-e Yaha peipu nge.

¹¹Hüyange wangmepu ngao ja Iye jai; “Nang ümong kenpu Ha, Taowe nangte monghah nang.”

¹²Mamshe wanwüng jeng te yahawe I woitei;

¹³hüyange I wanwüng jeng me nyih deli ngoiye satanne tokne tamme ngoh. Tüome phao yinmok lan-o ngoh, hüpoi wangdang shongmokpalan pei hüyange Ite pao.

¹⁴Sha-a küpnok me John angyang phei me, Galilee te Jesu tai hüyange Kahwang mepu Pungao ümei konnyüo.

¹⁵Iye hüke i, “Itte angpu hipak peiteki,” “Hüyange Kahwang ahngching ngoiteki. Numan ünu mepu monglüptüoh hüyange pungao ümeite üting laktüoh.”

¹⁶Sha-a Galilee yengching phin me Jesu linwante, Iye nyah ompa ni, Simon hei Inao Andrew yengme shaan phei nyah omme nge.

¹⁷Jesuwe imante ngaowe i, “Ü-pheite woikei hüyange taowe numan te kahta omlak nyüopha ning.”

¹⁸Mamshe iman shaan ang, hüyange I pheite woi.

¹⁹Hüyange I shejai she taiwante, Zebedee üha Jeams hei lnao John Ijei Inao ni nge, iman lisheng me shotyange iman shaan tümme ngoh.

²⁰Iye iman ngepu phei jamshe Jesuwe imante nyik; tüokhei iman üpa Zebedee nyah omne nanshakpalan phei lisheng me tüoh hüyange Jesu phei te tai.

²¹Hüyange iman Kapernaum te pei, hüyange ünepu Sabbath me Jesu synagogue te ong hüyange konnyüone ükong wang.

²²Aoyin kahtalan-e I ngao jai, Iye nyüopu wanglam ngeyange yashan. Hangjingne Iye ngaokhüm nyüopalan kih yeje; hüleima-a Iye wong ngohpu phei nyüo.

²³Hüwante muh Ime ünu yaha pheipu kahta ja synagogue mepu ngai hüyange üngwün.

²⁴“Nazareth mepu Jesu, toman mepu nange hanghe yah hu nangki? Toman mahtamlak jingne nang tüome pei a? Nang ao shi taowe shingnang. Nang Üjaopa Kahwang shongshonpa.”

²⁵Hüpoi Jesuwe yahate teeye i, “Tahlangman, hüyange kahta mepu ngaitüoh.”

²⁶Ünu yahawe Ite yeonge po, hüyange üngwünne ngao. Tüophei me Imepu ngai.

²⁷Kahtalan üshei yashan, hüyange iman yo me hüke ngaowe i, “Hatüowa hanghe shi? Nyüopu üla jayang! Hatüo kahta me ünu yahate ngaokeng phalak wong ngoh nangki; hüyange iman-e I ngao jainangki;”

²⁸Tüone menge Galilee kahtok üshei yete Jesu ngaolan mamshe ponge yan.

²⁹Jesu hüyange I pinlan synagogue mepu yan hüyange Jeams hei John iman phei nang yange Simon hei Andrew nokte ong.

³⁰Simon ünyei tinye dak-e ngoh, hüyange Jesu ngoipu phei jamshe tüopa ngaolan Ite i.

³¹Yha shongte I wen, yak me yha pai hüyange yha laone tam. Tinye dak-e yha ang, hüyange yhawe imante namnowe pha.

³²Aope ün ngoi, hüyange wanghe nyip phei me kahtalan-e Jesu tangte dakpalan maawe hüyange laawe woipulan woipei.

³³Hüyange chingnyu me ngohpu kahta üshei tafün shong ngoiye jem.

³⁴Dak ümeng lamme lamme ngohpu maawe Jesuwe meitam hüyange laalan maawe jangtei. Laalan te Iye hango ngaone yetam, hangjingne I ao shi iman-e shing.

³⁵Üne nap, napning wangngai shaome Jesu lüo hüyange nok mepu tai; hüyange ching mepu yanne taiye wanwüng jeng me Iye yop.

³⁶Hüyangpoi Simon hei I shümpalan I yamne tai;

³⁷hüyange aope iman-e I nge iman-e Ite i, “Kahta liliye nang yamnangki.”

³⁸Hüpoi Jesuwe janne i, “Neikon-e ngohpu ülao chingshao lante teman tailak yang. Taowe imante-o nyüolak, hangjingne tüopa jingne hei Tao peiyangki.”

³⁹Tüophei me Galilee kahtok üshei yeme synagogue te peiye konnyüo hüyange laalan jange I kem.

⁴⁰Ngonpa ja Jesu tangte pei, hüyange ümme tawe khümme Ite jampha she i. Iye hüke i, “Nange mongma-a tao jaowe tampu ok.”

⁴¹Jesuwe Ite yeonge shüpsheye lei, hüyange I shongte wen hüyange Ite jon. Iye hüke jan, “Taowe jaowe tamhu nangki, jaotüoh!”

⁴²Hüwante muh kahta mepu ngondak yan hüyange I jao;

⁴³Tüophei me Jesuwe Ite yeonge wongnange deingao pha, hüyange hüwante muh I taine tam.

⁴⁴Ite hüke i, “Jaiyah, ülao aote-o tüopa jeng tah i. Hüpoi tingkhakke ngengpa tangte taitüoh hüyange Iye nang te tokke leine tamtüoh, tüophei me nang jaoteki she shinglak jingne Mosa ngaokeng me hangke ngoh dotüoh.”

⁴⁵Hüyangpoi kahta yanne tai hüyange kenphe me tüopa ngaolan yan. Iye jamloi ngaolan yanyangpu jingne, chingshao te Jesu yepei ok. Taihah shepu nanleiye wanwüng jeng me I ngoh; hüyange kenphe mepu kahtalan I tangte pei.