Read Konyak Naga MARK 10 Bible Online

MARK 10 - Konyak Naga bible

MARK 10

¹Tüophei me Jesu tüopa nyoi mepu yayong, hüyange Jordan Yengyin kaiye Judea kahtok te lai. Üne-o ükhong üngang I tangte jem hüyange I wanglam kih-e üne-o Iye imante nyüo.

²I tang te Phariseelan ütam pei hüyange Ite tokke i, “Tomante itehu, kahta jawe yoi shekonyu toiyanlak teman ngaokeng me ngohnang kü a?”

³Jesuwe imante tongpu phei janne i, “Mosa ngaokenge numante hanghe pha ei?”

⁴Iman-e hüke jan, “Toiyanlak ngaolan lai nyanyange sheko nyu phei yantüoh she, Mosa ngaome ngohnang.”

⁵Hüpoi Jesuwe imante i: “Numante nyüolak jingne yeonge wanpu jingne Mosawe tüopa ngaokeng nyan.

⁶Hüpoi üwangne kahtoknyu lingwante muh. Kahwange iman netan hei sheko ling.

⁷Tüokhei kahta jawe Ipa hei Inyu tüohyange I sheko phei ja ne menglak;

⁸hüyange imni ja ne menglak. Tüokhei iman shaaji ni yeje hüpoi ja.

⁹Hüma-a. hanghepa Kahwange sheine tam, tüopa-a kahtawe yanne tahtam.”

¹⁰Aope iman nokte leihye, pinlan-e Jesu te tüopa jeng muh tong.

¹¹Tüokhei Iye imante i: “Kahta ao yoi sheko phei toiyan; hüyange ülao sheko yahlakei, Iye yoi sheko phei tüi-e phwngngampu jonnang;

¹²tüokih-e muh, shekonyu aowe I netanpa phei yanyange hüyange ülao netan phei ngoh phwngngampu lingnang.”

¹³Kahta ütam-e Jesu tangte Iye jonne tamlak jingne nahalan woipei, hüpoi pinlan-e tüolan kahta te tee.

¹⁴Hüpoi aope Jesuwe tüo nge, I mongshih ngai hüyange yoi pinlante i, “Nahalan ü-tangte peine tamtüoh! Imante tahkhüm, hangjingne Kahwang ahngchinga tüolan jing kihpu ne mengnang.

¹⁵Taowe numante ütingme inang, aowe naha kih-e mengyange Kahwang ahngching yeyahlakei, tüote ongpu ye-oklak.”

¹⁶Tüophei me Iye nahalan noonne yah, iman tangme I yak ang hüyange imante moimantam.

¹⁷Hüyange Jesu yintaine lamme kemme ngaiwante, kahta ja phette ngoi, I sheshao me yatuh shinge khüm, hüyange Ite tong, “Konnyüopa ümei, jintepu üyin tüolak jingne taowe hanghe linglakshi?”

¹⁸Jesuwe Ite i, “Nange hangne üte ümei she nyiknangki?” Kahwang tokte ao-o ümei yenang;

¹⁹Nange ngaokenglan shingnang; “Tahtoi, phwngngampu tahling, tahkuh, ngaoleih tah i, tah lo, hüyange nangpa hei nangnyu te iyeshe yah.”

²⁰Iye Ite i, “Konnyüopa, Tao naha me muh tüopa ngaokeng jonyangki.”

²¹Yayengpu phei Jesuwe Ite tingkhakke lei, hüyange i; “Nang jawe yewang. Taitüoh hüyange nangme ngohpu üshei yüotüoh hüyange toihalan te ngin phatüoh, hüyange wangdang me nang haklak; tüophei me taikei hüyange ü-pheite woikei.”

²²Aope Iye tüopa ngao jai, sheta nyak hüyange mongmenge tai, hangjingne I meiyangpu hakpa ne ngoh.

²³Jesuwe yoi pinlante leiye pong hüyange imante i, “Hakpalan Kahwang ahngching te onglak jingne hangshin wanlak shi!”

²⁴Tüopa ngao jaiyange pinlan mokh, hüpoi Jesuwe imante yelakpe i: “Ühalan, Kahwang ahngching te onglak hangshin wanpu shi!

²⁵Hakpa ja Kahwang ahngching te onglak phei-a veemei sha me udh helak she-o.”

²⁶Tüopa ngao jaiyange iman üshei yashan hüyange iman yo me tei tong; “Hüma-a ao yinpu oklak shi?”

²⁷Jesuwe imante lei hüyange i; “Hatüowa kahtalan jingne ye-oklak, hüpoi Kahwang jingne yeje; Kahwang jingne lamphe li oklak.”

²⁸Tüophei me Peterwe hüke ngaiye i: “Leihu, toman-e üshei angyange hüyange nang pheite woinang.”

²⁹Jesuwe imante i, “Üting, Taowe numante inang: aoyinne üjingne hüyange pungao ümei jingne nok, yejema-a yoijei yoinao yejema-a yoinya yoinao yejema-a Inyu hei Ipa yejema-a hayim yejema-a kah tüohlakei,

³⁰tüopa jin me yeonge tüolak. Iye gho phei nyeiye yoi jeihei naolan, nyahei naolan, nyuyonglan, hayim hüyange kah tüolak, hüyange shangne tampu-o tüolak; hüyange ngoikülak jin jingne Iye üküm yenangpu üyin tüolak.

³¹Hüyangpoi sha-a aoyin maawe üwangne ngoh üküm ne menglak, hüyange sha-a üküm ne ngohpalan üwangne menglak.”

³²Iman Jerusalem te ongpu lam me ngoh, hüyange pinlan sheshaote Jesu tai, iman mongpong; hüyange iman phei te woipu kahtalan nyam. Jesuwe nishe pinlan penme ni woitei hüyange Ite hanghe ngailak tüopa jeng i.

³³Jesuwe imante i, “Leihu, teman Jerusalem te ongnang; ümeken me ngengpa üjenglan hüyange ngaokeng nyüopalan te Kahta Üha phünne phalak. Iman-e I li ne phünne phalak hüyange tüophei me yinhulante I phünne phalak.

³⁴Iman-e Ite yaolak, Ite iyphao phaolak, Ite shetlak, hüyange I toilak. Hüyange nyih lüm ngohyange I yange yelak.”

³⁵Tüophei me Zebedee hayim Jeams hei John ni Jesu tangte pei. Imniye i, “Konnyüopa,” “Nang kaiye tomni jingne ülamja lingne tamhu nangki!”

³⁶Jesuwe imnite tong, “Nangni jingne Taowe hanghe lingne tamhu nangki?”

³⁷Imniye jan: “Aope nang müktishiwapu ahngching me shotlakei, nang yakjah yeme ja, yaknya yeme ja she tomni-o shot ne tampha.”

³⁸Hüpoi Jesuwe jan: “Hanghe jingne tong, nangniye yeshing. Taowe yingpu wan nang niye yingpu oklak a? Hüyange taowe baptipuke, ü-baptipu me nang ni-o baptipu oklak a?”

³⁹Imniye jan, “Oklakei.” Jesuwe i: “Nang niye Taowe yinglak wan yingpu ok hüyange Taowe baptipu kih-e baptipu oklak yang.

⁴⁰Hüpoi, ü yakjah yeme hüyange yaknya yeme shotne lelak üme wong yenang. Hatüo nyoijing yinna aoyin jingne tüm Kahwange hei phakülak.”

⁴¹Aope ülao pinlan penne tüopa ngao jai, Jeams hei John nite iman mongmeng.

⁴²Tüokhei Jesuwe iman üshei jamme nyik hüyange hüke i, “Numan-e shingnang, aoyin wanglam lampalan-e le, kahtalan tangme iman wong ngohnang, hüyange iman woipalan-e imante wanglam lamnang.

⁴³Hüke ngohyapoi numan yo me hatüo ne yeje. Numan yo me ütam üyong ne menghuma-a, I ülaolan shaoshanpa ne menglak yang;

⁴⁴hüyange numan yo me ütam üwangpa ne menghuma-a, I rhapa ne menglak yang.

⁴⁵Hangjingne Kahta Üha nehoi shaoshanne tamlak jingne peipu yeje; hüpoi shaoshanlak jingne I pei hüyange I üyin phawe kahta maawe yinlak jingne pei.”

⁴⁶Hüyange iman Jerikho te pei. Jesu I pinlan phei hüyange kahta üngang phei Jerikho mepu taiwante, Timaeas üha Bartimas she minpu mükmüopa ja lamnah me shotyange hahyuwe ngoh.

⁴⁷Aope Iye hatüowa Nazareth mepu Jesu shejai, I üngwünne ükong wang. “David üha! Jesu! Üte shüpshe pha.”

⁴⁸Yelangmanpe ngohlak jingne kahta üsheiye Ite tee. Hüpoi Iye “David üha Jesu! Üte shüpshe pha” she sheyong sheyong she üngwün.

⁴⁹Jesu jünge yong hüyange i, “Ite nyiktüoh.” Tüokhei iman-e mükmüopa te nyik-e i, “Mongmeitüoh!” “Yongtüoh, Iye nangte nyiknangki.”

⁵⁰Iye yoi inkhek shüppe ang, hüyange Jesu tangte phaowe phet.

⁵¹Jesuwe Ite tong, “Taowe nang jingne hanghe linge tamhu nangki?” Mükmüopawe jan, “Konnyüopa,” “Taowe (nishe) ngehu nangki.”

⁵²Jesuwe Ite i, “Taitüoh,” “Nang ütinglakpuwe nang meiteki.” Hüwante muh Iye ngepu ok, hüyange Jesu phei te lamme woi.