Read Konyak Naga MARK 11 Bible Online

MARK 11 - Konyak Naga bible

MARK 11

¹Aope iman Olive Kahtangke Bethphage hei Bethani yeme Jerusalem te owe pei; Jesuwe yoi pin ni shaoyete

²hatüo ngao phei shon: “Numan shaome janhüowe ngohpu chingte ongtüoh. Numan ngoipu phei jamshe ao-o manshotpu gado üha numan-e shinyange ngelak. Hatüo lantüoh hüyange tüome peikei.

³Hatüo numan-e hangne lingpu?” she ütamme tongma-a, imante itüoh, “Konnyüopawe hatüo wongpong yang hüyange hatüo mamshe shonne yephalak.”

⁴Hüyange iman tai, hüyange lam ang mepu nok ja tafün shong me gado üha shinyange ngoh. Hüyange iman-e tüopa lan;

⁵ütam yonge ngohpuwe imante tong, “Gado üha lanne numan-e hang lingpu?”

⁶Hüwante Jesuwe imante hangke i, iman-e hüke jan. Tüophei me kahtawe iman taine tam.

⁷Iman-e Jesu tangte gado üha woi pei, tüopa tangme iman nye nyiam, hüyange Jesu tüote ong.

⁸Kahta maapuwe iman nye lamme nyiam, hüwante ütamme peequi lang hüyange lamme nyiamme tam.

⁹Aoyin kahta sheshao yeme kem hüyange tokphei yeme woi üngwünne i, “Hosanna! Kahwang min me ao pei, Ite Kahwange moimantüoh!

¹⁰Teman üpa David ahngching peipute Kahwange moimantüoh! Ütahpa me Kahwangte minyong tüoh!”

¹¹Jesu Jerusalem te ngoiye khümjing te ong, hüyange lamphe lite neiye leiye pong. Hüyangpoi shonne yüopu nanjingne I pinlan penme ni phei Bethani te tai.

¹²Üne nyih, aope Bethani mepu iman ye, Jesu seanyao.

¹³Üjai me Iye phukpee ja yeonge üyak ngütte nge. Tüokhei hatüo me ülick ngohya shi she leine I wen; hüpoi aope I peejüng ngoiye wen, üyak kaiye hango yenang; hangjingne ülick (shatha) ngailak ju ne yejepe ngoh.

¹⁴Hüwante Jesuwe phükpee te i; “Nang mepu ülick aowe-o shaaji tah hah!” Hüyange I pinlan-e Iye ngaopu jai.

¹⁵Aope iman Jerusalem ngoi, khümjing te Jesu ong hüyange khümjing me yüopalan hei shakpalan üshei jange tei. Iye ngin leihpalan khao hei awshu yaopalan shotjing shokke win;

¹⁶hüyange khümjing kaiye aote-o toinan ki taine Iye yetam.

¹⁷Tüophei Iye kahtalan te nyüo, “Laingao me hatüo nyanne ngohnang. ‘Ü-noka jatlan üshei jingne yoppunok she nyiklak.’ Hüpoi hatüo numan-e kuhpalan lojing longnok ne menge tam!”

¹⁸Ngengpa üjenglan hei ngaokeng nyüopalan-e hatüo jai, tüophei me Jesu toilak lam iman-e yam. Ite iman nyam, hangjingne kahta liliye Iye nyüopu konte yashan.

¹⁹Aope ün ngoi, Jesu hüyange I pinlan chingnyu tüohyange tai.

²⁰Üne nap shomme iman lamme linwante, üya ngoiye liteiye phukpee nge.

²¹Hanghe ngaiyangki Peterwe teih tüo hüyange Jesute i, “Konnyüopa, leihu, nange phoitampu phukpee liteki!”

²²Jesuwe imante janne i, “Hatüo teih tüoyah! Kahwangte numan-e ütinglakma-a,

²³numan-e hatüo kahkengte ipu oklak, ‘Potüoh hüyange nang nying nyingke yengching te yeitüoh’; numan mongjang me nüngneipu yenang hüyangpoi nange ipu ngaikülak she üting lakma-a, hatüo numante ling phalak.

²⁴Tüokhei Taowe numante inang: Aope numan-e yop; hüyange ülam ja jingne tong, hatüo numan-e tüolak she ütinglak yah, hüyange tüo lili numante yahphalak.

²⁵Hüyange numan-e aope yonge yoplakei, ütam phei tüi-e ümeng lingyange ngohma-a ümeng wintüoh, hümme nakshih wangdang me ngohpu numan üpawe numan ünu winphalak

²⁶Hüpoi numan-e eiha ümeng yewinma-a, wangdang me ngohpu numan üpawe-o numan ünu yewinlak.”

²⁷Tüophei me iman Jerusalem te ngoiye pei. Hüyange Jesu khümjing me kemme ngohwante, ngengpa üjenglan, ngaokeng nyüopalan, hüyange jeiyonglan I tangte pei,

²⁸hüyange Ite tong: “Tüoyin linglak jingne nang me hanghe wong ngohnangki? Yejema-a tüoyin linglak jingne nangte aowe wong pha ei?”

²⁹Jesuwe imante jan, “Taowe numante ülam ja tong phaning, hüyange numan-e hatüo khakshuwe janma-a hanghe wonge taowe toi ling ipha ning.

³⁰Üte ipha, baptipa John wangdang mepu heiya yejema-a kahtalan yo mepu shi?”

³¹Iman yo me iman nying nyingke hüke tei ngao: “Teman-e hang ihah? ‘Kahwang mepu’ she teman-e ima-a, hangne numan-e John te üting yelak she iphalak?

³²Hüpoi teman-e ‘Kahta mepu she ima-a…’ ” (kahtalan shaote iman nyam, hangjingne John-a hipa ja she üsheiye shing.)

³³Tüokhei iman-e Jesute jan, “Toman-e yeshing.” Hüyange Jesuwe imante i, “Hümma-a Taowe hanghepa wonge toi ling, numante ye i lak.”