Read Konyak Naga MARK 12 Bible Online

MARK 12 - Konyak Naga bible

MARK 12

¹Hüyange Jesuwe imante ngaoleppu me ine ükong wang. “Hipak ja me wulick kah hampu kahta ja ngoh, neikonne pelak kha, ngütjingne kahsa shao, hüyange yomtep ja we. Tüophei me kahhampalan yakme wulick kah angne tam hüyange üjai te yintai.

²Aope ülick yolak hipak ngoi, I jing meitam yahlak jingne kah hampalan tangte shaoshanpa ja shon.

³Hüpoi kah hampalan-e shaoshanpa pho, Ite shet hüyange ükeng me ye ne tam.

⁴Tüophei me nokpupawe iman tangte ülao shaoshanpa ja shon; kah hampalan-e Ite shang me üko ngaine tam, hüyange wüotüone tam.

⁵Nokpuwe ülao shaoshanpa ja shon, hüyange iman-e I toi, hüyange ülaolan maawe ütamte shet, ütam toi wenyangki.

⁶Shaaji ja shingha to, hüyange hatüowa I mongken ha. Iye hüke i, ‘Taowe shingnang iman-e Ite yihlulak;’ tüophei me üküm ne Iye kahhampalan tangte yoi ha shon.

⁷Hüyangpoi, kahhampalan-e hüke teingaowe i, ‘Hatüowa nokpu Ha. Kei, teman-e I toihah, hüyange mothlei-a teman jingne menglak!’

⁸Tüokhei iman-e I yah hüyange I toi, hüyange I mang wulick kah kaiye win.

⁹“Jesuwe tong, ‘Hüma-a wulick kah nokpuwe hanghe linglak? I peilak hüyange tüolan kahta toilak hüyange wulick kah ülaolante phalak.

¹⁰Üting me numan-e laingao iya shi? “ ‘Nokwepalan-e hanghepa long yeyah hatüopa nokjing shongnyu longne meng;

¹¹hatüowa Youngwanpawe lingpu, hüyange hatüowa toman mükshao me yashanlakpa!’ ”

¹²Jewish woipalan-e Jesu pho ne ngang, hangjingne hatüo ngaolep iman phei tüi-e ngao she iman-e shing. Hüyangpoi ükhong te iman nyam hüyange I angyange iman yantai.

¹³Tüophei me iman-e Phariseelan ütam hüyange Herod pinlan Jesu tangte ngao me ümeng pholak jingne shon.

¹⁴Iman I tangte pei hüyange i: “Konnyüopa, toman-e shingnang, nang ütingpa kahta. Kahtalan-e hanghe teih, tüojingne nang mong yeshang, hangjingne ütok meipu kahtalan jingne nange hangko yeteih, hüyangpoi nange ütingpa Kahwang lam nyüonang. Tomante itehu, Roman ahngpa te kahngin phalak-a toman ngaokeng mengpu jeyashi? Rome ahngpa te phalak heiya yephalak shi?”

¹⁵Hüyangpoi Jesuwe iman kon shing hüyange jan! “Hangne numan-e üte tokpu shi? Üte nginmei ja yahkhu, hüyange Taowe tüote leining.”

¹⁶Iman-e yahpei, hüyange Iye imante i, “Tüome ao sheta hüyange min ngoh nangki?” Iman-e jan, “Ahngpa.”

¹⁷Tüokhei Jesuwe i, “Hümma-a, hanghe ahngpa jing hatüo ahngpate phatüoh, hüyange hanghe Kahwang jing hatüo Kahwangte phatüoh.” Hüyange iman Ite meiyange yashan.

¹⁸Sadduceelan ütam Jesu tangte pei. Lipu mepu kahta yange minye ja she ipu ükhong iman ngohnang.

¹⁹Iman-e i, “Konnyüopa, toman jingne Mosawe tüopa ngaokeng nyan: ‘I sheko angyange kahta ja li, hüpoi hayim yetüoh, Inaowe tüopa sheko yahlak hüyange lipupa jingne hayim puhlak.’

²⁰Hipak ja me Ijei inaolan nyit ngoh; jeiyongpa nokne meng, hüyange hayim yetüohpe li.

²¹Tüophei me nishe pupawe tüopa sheko yah, hüyange hayim yetüohpe I li. Lüm shepupa naoshe hüke muh yah, hüke nang;

²²hüyange ülaolane-o hüke muh lamme nyüo: naoshe nyit üsheiye sheko ja shaha yah, moilanne hayim yetüohpe liküm. Üküm ne sheko nyu li.

²³Sha-a yange yepunyih litepulan üshei aope yange yelakei, yha-a ao jing sheko ne menglak shi? Hangjingne iman moilan nyitte I yahyangki!”

²⁴Jesuwe imante i, “Numan hangshin pinpu shi! Hüyange hangne ngaipu numan-e shingya? Hatüo hangjingne ima-a, numan-e laingao yejema-a Kahwang wong yeshing.

²⁵Hangjingne aope litepulan yange yelakei, iman wangdang shongmokpalan kih-e ngohlak, hüyange sheko hei netan tei yeyahlak.

²⁶Hüyangpoi lipulan yange yelak jeng: Mosa laime vün phümtüm jeng numan-e ye-i a? Hangjingne hatüome hüke nyan Kahwange Mosate i, ‘Tao Abraham Kahwang, Isaac Kahwang, hüyange Jacob Kahwang.’

²⁷Tüote leppu, I lipu Kahwang yeje, üyin Kahwang. Numan yeonge püohnang!”

²⁸Ngaokeng nyüopaja pei hüyange iman teingaopu jai. Sadduceelan te Jesuwe meiye janpu Iye nge, tüokhei I peiye hüke tong: “Üshei yo me hanghepa ngaokeng wongpong shi?”

²⁹Jesuwe Ite jan, “Hatüopa meiyangpu wongpong: ‘Israel, jaiyah! Youngwanpa teman Kahwang jashingha Kahwang.

³⁰Hüyange Youngwanpa nang Kahwang te nang mongjang üsheiye, hüyange nang yaha üsheiye, hüyange nang mong üsheiye, hüyange nang wong üsheiye kenyah.’

³¹Nishepupa ngaokeng hatüo: ‘Nange nang yupipate yoi kih kenyah.’ Tüo ni phei sheyongpu ngaokeng ülao hango yenang.”

³²Ngaokeng nyüopawe Jesute i: “Shunangki, Konnyüopa! Nange ipu kih Youngwanpa shaha Kahwang, hüyange I kaiye ülao Kahwang yenang, hatüowa üting.

³³Tüokhei kahtawe I mongjang üsheiye; I shingeyahpu üsheiye, hüyange I wong üsheiye Kahwang te kenlak, hüyange Iye yoi yupite I kih kenlak. Ülao yinmok yahpeiye Kahwang khümjing me dopu phei-a, hatüo ngaokeng ni jonpupa shemei.”

³⁴Iye shinge janpu Jesuwe shinge ok, hüyange Ite i: “Kahwang Ahngching mepu nang meiyange jaiye yenang.” Tüophei me aowe-o Jesute ngao tonglak jingne mong yeyong.

³⁵Hüyange aope khümjing me Jesuwe konnyüo Iye hüke tong: “Ngaokeng nyüopalan-e Messiah David üha üja she hangke ipu shi?”

³⁶Yaha Üjaowe David woiye hüke i: “Youngwanpawe ü-Youngwanpa te i, Taowe nang wepalan nang yaphang me man ang man ang, ü yakjahye tüome shot tüoh.”

³⁷David-e Ite, “Youngwanpa she nyik: Hümma-a, hangke Messiah David üha ne mengpu?” Ükhong üyongpuwe Jesu ngao yeonge meiye jai.

³⁸Iye nyüowante hüke i: “Ngaokeng nyüopalan aoyinne inkhek ülao inyange kem hüyange chingyang me imante wangshüm hüopu leng;

³⁹Synagogue me hüyange mo pu nok me shotjing tünne angpu leng, iman jingne kentingyah.

⁴⁰Iman-e wamnyulante meiyange lahnyik hüyange iman nokte pei, tüophei me ütah hüolak jingne laowe yop! Iman jingne shaoshi tampu ümengpa ne ngohlak!”

⁴¹Jesu ngin angjing nyoi phei janhüowe shot, hüyange kahtalan-e ngin hangke pha, tüote leiye ngoh. Hakpalan-e ngin maawe ange nge;

⁴²tüophei me wamnyu ja pei hüyange Iye poisa ja wangpu paikhüo ni ang.

⁴³Iye yoi pinlan jamshe nyik hüyange imante i: “Taowe numante hatüo inang, ngin dopu nyoi me hatüopa wamnyuwe üshei phei sheyong she angyangki.

⁴⁴Hangjingne ülaolan-e iman me nangpu mepu yah yange hanghe toyapeih tüopa pha; hüpoi hatüo toinannyu wamnyuwe yha me hanghe ngoh hüyange hatüolan me I üyin ngohpu phayangki.”