Read Konyak Naga MARK 13 Bible Online

MARK 13 - Konyak Naga bible

MARK 13

¹Khümjing tüohyange Jesu ngaiwante, I pinlan yo mepu jawe i, “Leihu, Konnyüopa! Hangke yashanlak long hüyange nok üyong!”

²Jesuwe jan, “Nange tüopa nok üyong ngenang kü a? Hatüome long ja nehoi yoi yoi nyoi me yengohlak; iman üshei toiloi talak.”

³Khümjing phei janhüowe leiye Olive Kahtang me Jesu shotte ngohwante, Peter, Jeams, John hüyange Andrew I tangte pei hüyange lowe tong.

⁴Iman-e i; “Hatüo aope ngailak, hüyange tüolan khongkümpu ngai shao me füo hangke ngohlak, tomante ipha.”

⁵Jesuwe imante nyüo ne wang, “Kentinge ngohyah, hüyange aote-o numan ünyong yete woine tahtam.

⁶Kahta maawe ü-min me peikülak, hüyange ilak ‘Taowa I!’ hüyange kahta maawe ünyong yete woilak.

⁷Hüyange aope numan-e ü-o me hokpu ngaolan hüyange üjai me wehokpu ngaolan jailakei, numan mong tahshang. Tüolan ngailak wongpong, hüpoi tüolan kaiye üküm ngoipu ne yeje.

⁸Hangjingne jat jawe jat ja phei tüi-e, ahngching jawe ahngching ja phei tüi-e tei hoklak. Minwe leipu kenphe me ngohlak, hüyange seanyao yenglepu ngohlak. Tüolan-a shangne ükong wangpu.

⁹“Hüyange numan-e yoi jingne kentingyah. Hangjingne kahtalan-e numan pho phalak hüyange numan ngaophün jingme phakülak. Synagogue me numante shetphalak; numan wanglam lampalan hei ahnglan shaome, imante Pungao ümei ilak jingne hüyange Üjingne yonglak.

¹⁰Hüyange üwangne jatlan üsheite Pungao ümei nyüolak.

¹¹Hüyange aope iman-e numan phophalakei hüyange ngaophün jingte teilakei, numan-e hanghe ngaolak hipak manngoipe mongtah shang; aope hipak peilakeih, hüwante numante hanghe phakülakei ngaotüoh. Hangjingne numan-e ngaopuwa numan-e yeje; Yaha Üjao mepu peilak.

¹²Kahtalan-e yoi jei yoi nao teilowe li ne tamlak, hüyange payonglan yoi hayimlan phei tüi-e, hayimlan-e yoi nyu heipa phei tüi-e teilowe li ne teitamlak.

¹³Hüyange Ü-min jingne kahta üsheiye numante nuphalak. Hüyangpoi üküm ngoiye aowe tükke oklakei I yinlak.

¹⁴“Hüpoi aope numan-e nunushepu mahlakpa hipak, I yeyonghah shepu nyoi me yongyange ngelakei; (Hanghete leppu ipalan-e shingyah) hüwante aoyin Judea me ngoh kahtang yete phettüoh.

¹⁵Noktok me ao ngohlakei, noksa mepu toi yahlak jingne tah ye.

¹⁶Hüyange kahme ao ngohlakei nyemo yahlak jingne nokte tah ye.

¹⁷Tüopa nyih hei hipak me aoyin sheko püm yekengpe ngoh, hüyange naotak ha pheipu nyuyonglan ngoh, iman jingne onyukei!

¹⁸Hatüolan eanyu hipak me yengailak jingne Kahwangte yopyah!

¹⁹Hangjingne tüopa nyih hei hipak me ngaipu shangepongpuwa Kahwange kahtoknyu lingpu nyih mepu tenyihpu jin ngoiye shangpu phei shemeng she ngohlak. Yejema-a hükihpu hipak üne ye-ngelak.

²⁰Hüpoi Youngwanpawe tüopa nyih hei hipak shoh tamyangki; Iye hüke yeling shihma-a, kahtanyuha ao-o yeyin hah shepu, hüyangpoi Iye leyangpulan ngohpu jingne tüopa nyih hei hipak shoh ne tamyangki.

²¹“Hümma-a, kahta ütam-e nangte, ‘Leitüoh, hatüo me Messiah’ yejema-a ‘Leitüoh, hatüo me I!’ she ima-a Ite üting tahlak.

²²Hangjingne tahleih Messiahlan hüyange tahleih hipalan ngaikülak. Okma-a Kahwange leyangpulan ünyong yete woilak jingne, iman-e füo hüyange kahnyingwüngha hüokülak.

²³Hüyangpoi numan kentingyah! Hipak peishao me Taowe numante khongküm inang.”

²⁴Hüyangpoi shange pongpu tüolan nyih hei hipak linyang phei me, wanghe nyaklak, linnyuwe leta yephalak;

²⁵wang mepu shanhalan yeilak, hüyange wangmepu wonglan polak.

²⁶Tüophei me Kahta Üha ngailak, wangphom me wong üyong phei hüyange müktishiwa puphei yupu iman-e ngelak.

²⁷Hüwante Iye wangdang shongmokpalan kahtoknyu üshok peli yete shonlak hüyange Kahwange lepalan kahtoknyu jaye üshok mepu jaye üshok ngoipu mepu shaijemlak.

²⁸“Phukpee me leppe konnyüopu numan-e shingyah. Aope peequi üyoi meiye ngai, hüyange üyak ngaine wang, jüo oteki she numan-e shingnang.

²⁹Tüopa leye aope numan-e tüoyin ngaipu ngelakei, hipak oteki, I tafün shongme ngoh nang she shingyah.

³⁰Taowe ütingme numante inang, tüolan khongkümpu ngaiye manküm manküm tüopa jin linne yetailak.

³¹Wangdang hüyange kahtok linne tailak, hüpoi ü-ngao linne yetailak.”

³²“Hüyangpoi, tüopa nyih hei hipak aope ngoilak, Ipa tokte kaiye wangme ngohpu shongmokpa ne jeyah, yejema-a Iha jeyah aowe-o yeshing.

³³Kentingyah, menghayah, hangjingne hipak aope peilak numan-e yeshing.

³⁴Hatüowa, inok toishao üshei shaoshanpalan yakjonge angyange, tafün yompa te leitüoh she iyange kahmük üjai te kahta ja yintaipu lenang.

³⁵Tüokhei, kentingyah, hangjingne nok nokpupa aope peilak yaning heiya, phawo phatang me heiya awko shaome heiya, yejema-a shomme numan-e yeshing.

³⁶I mokhshe peiwante, nang shiye yengohlak jingne kentingyah!

³⁷Taowe hanghepa numante inang, numan üsheite inang, kentingyah!”