Read Konyak Naga MARK 15 Bible Online

MARK 15 - Konyak Naga bible

MARK 15

¹Napning shomme ngengpa üjenglan yeonge mamme jeiyonglan phei, ngaokeng nyüopalan phei, hüyange ngao ipalan üshei phei hüo, hüyange iman-e tüm. Iman-e Jesute sha, hüyange woiye peiye Pilate te pha.

²Hüyange Pilate-e Ite tong; “Nang Jehudilan ahngpa a?” Jesuwe jan! “Nange hüke inangki.”

³Ngengpa üjenglanne Jesu lamphe li me püohpu pho,

⁴tüokhei Pilate-e Ite nishe tong: “Nange hango yejanlak a? Leiyah hangshinne iman-e nang püohpu phopu shi!”

⁵Hüyangpoi Jesuwe ngaopha ja nehoi yejan, hüyange Pilate yashan.

⁶Sha-a Yinyepu mo hipak lep iye küpnok me ngohpalan yo me ja, kahtalan-e ao yulakei, Pilate lanne teipu wanglam ngoh.

⁷Barabbas she minpu kahta ja weihkhong phei mop ngaiwante lünmang ngaitampu jingne küpnok me ang.

⁸Aope ükhong jem hüyange Iye imante üshong me lingpu kihmuh lingpha she Pilate te tong:

⁹Iye imante janne i! “Taowe numante Jehudilan ahngpa lanne tamhu pu a?”

¹⁰Iman müktakpu kaiye ngengpa üjenglanne Ite Jesu phünne phanang she Iye shing.

¹¹Hüyangpoi ngengpa üjenglanne ükhong wukne tamyange, iman-e Barabbas lantampha she Ite kang.

¹²Ükhong te nishe Pilate-e ngao! “Hümma-a numan-e Jehudilan ahngpa she nyikpupa te taowe hanghe lingne tamhu pu?”

¹³Iman-e üngwünne janne ye, “I Tangpem me taktüoh!”

¹⁴Pilate imante tong, “Hüpoi Iye hanghe ümeng lingyangpu te?” Iman-e shewün shewün she üngwünne i, “I tangpem me eptüoh!”

¹⁵Pilate-e ükhong mongmei ne tamhu, tüokhei Iye iman jingne Barabbas lantam. Tüophei me Iye Jesute shetwu jonyang phei me hüyange tangpem me eplak jingne I phünne pha.

¹⁶Kengphet lanne I ahngnok te woiye in, hüyange iman-e ülaolan khongkümpu nyikjem.

¹⁷Iman-e Jesute takmon nye intam, ühuh pheipu shaoshaoh ling, hüyange shangme shaohtam.

¹⁸Tüophei me iman-e salam phawe i, “Jehudilan ahngpa jinlaowe nyoiyah!”

¹⁹Hüyange iman-e I shangme shet, Ite iyphao phao, hüyange iman-e yatuh shinge ümme Ite khüm.

²⁰Aope iman-e Ite yaole sho, iman-e takmon nye yah hüyange I inkhek muh inne tam. Tüophei me iman-e I tangpem me taklak jingne woitei.

²¹Sairin mepu Alexander hei Rufus üpa Simon üjai mepu, chingye te yepu iman-e lamme hüo, hüyange iman-e Ite Jesu tangpem pailak jingne kang.

²²Hüyange iman-e Jesu Golgotha she nyikpu nyoite (leppu-Shangwaan nyoi) woipei.

²³Tüome iman-e Ite wuwüngti phei ükhah nyityange pha, hüpoi Jesuwe yeying.

²⁴Tüophei me iman-e I tangpem me tak hüyange iman yo me I jing inkhek tamlak jingne aowe hanghepa yahlak shinglak jingne phongyenge lei.

²⁵Aope iman-e I tangpem me tak, napning tu paji (lüm shepupa ghonda) ne ngoh yangki.

²⁶I phei tüi-e püohpu she hüke nyan: “Jehudilan Ahngpa.”

²⁷Hüyange iman-e Jesu phei kuhlang ni tangpem me tak. Sheja I yakjah yeme, hüyange ülaopa I yaknya yeme,

²⁸(hatüo kih-e “I-o ümenglan phei om,” she ngaolaiye ipu ütingme ngai.)

²⁹Hüyange linne taipu kahta lanne, iman ngüm ngok hüyange Jesute phoiye i: “Hei! Nang, aowe yopnok mengyange nyihlüm mongme loilak!

³⁰Sha-a tangpem mepu yutüoh hüyange nang nying nyingke yintüoh!”

³¹Tüokih muh ngengpa üjenglan hei ngaokeng nyüopalanne Jesute yaole linge iman-e hüke i: “Iye eihalan yin, hüyangpoi Iye yoi yeyin ok!

³²Israel ahngpa, Messiah, sha-a tangpem mepu yupute leihah, hüyange teman-e Ite ütinglak hah!” Hüyange Iphei tangpem me takpu niye-o Ite yao.

³³Hüyange nyihning penme ni paji mepu lüm paji ngoiye kahtoknyu üshei me wangnyak ngoi .

³⁴Lümpaji hipak me Jesuwe ngao üyong phei ngao, “Eloi, Eloi, Lama Sabachthani? Leppu-Ü-Kahwang, Ü-Kahwang, hangne nange ü-tüohpuweih?”

³⁵Tüome ngohpu kahta ütamme I ngao jai hüyange i, “Jaihu, Iye Elijah te nyiknangki!”

³⁶Iman yo me ja shekwan me üshi yinglak nyütyange lengju me shayange phet, hüyange Jesu ju ngoiye shunge inyange i, “Hüng angtüoh! Tangpem mepu I yah yelak jingne Elijah peiyashe ne leihah!”

³⁷Hüyange yeonge yonge üngwün yange Jesu lüomah.

³⁸Khümjing me shongpu jhotnye ütang mepu yashong ngoiye ni ne hit.

³⁹Hüyange kengphet woipa, ao tangpem phei tinge yonge ngoh, Jesu hangke üngwün hüyange li nge; Iye i, “Hatüo kahta ütingme Kahwang üha yang!”

⁴⁰Tüome sheko ütamja üjai me leiye ngoh. Iman-a Mary Magdalene, Jeams naolipa hei Joseph ünyu Mary hüyange Salome.

⁴¹Aope Jesu Galilee me ngoh iman I pheite woi hüyange Ite jampong. Ülao sheko lan-o maawe, I phei Jerusalem te peipu, iman phei omme ngoh.

⁴²Hatüowa Sabbath shao me tümtapu nyih ne ngoh, hüyange aope ün ngoi,

⁴³Arimathealan Joseph peingoi. I-o ngao ipalan yo me üjengpa ja ne hüyange Kahwang ahngching peilak te leipu yo me ja ne ngoh; hüyange tüonyih-a mo tümpu nyih ne ngoh; tüokhei mongyong puphei Pilate tangte Joseph wen hüyange Ite Jesu mang yu.

⁴⁴Jesu shaaji liteki she jaiye Pilate yashan. Iye gho ja woipa te nyik hüyange tong Jesu li phei me hipak lintekü a!

⁴⁵Gho ja woipa mepu ngao jaiphei me, Pilate-e Josephte Iye mang teipu oklak she i.

⁴⁶Joseph-e nye ükhai ja yahpei, mang yahyei, nye-me yout hüyange long watte lingpu mangkoksa me ang. Tüophei me Iye longkhao üyong jawe mangsate küp.

⁴⁷Mary Magdalene hei Joseph ünyu Mary lanne leiye ngoh, hüyange Jesu mang ümeken me mu nge.