Read Konyak Naga MARK 16 Bible Online

MARK 16 - Konyak Naga bible

MARK 16

¹Aope Sabbath lin, Mary Magdalene, Jeams ünyu Mary, hüyange Salome lanne Jesu pümte wenne pholak jingne üpi meipu minnga shak.

²Hat me üwangpa nap, shomme wanghe ongpu phei jamshe, iman mangjong te wen.

³Hüyange lamme iman hüke teingao, “Teman jingne mangkoksate küppu long aowe wintam phalak?”

⁴(Hatüo meiyange khaopu longne ngoh) Tüophei me iman-e leiwante longa nowe epyange nge.

⁵Tüophei me iman mangkoksa te ong. Naoshe ja nye üheng inyange yak jah yeme shotyange iman-e nge hüyange iman yashan.

⁶Iye i, “Numan yatah shan, numan-e Nazareth mepu Jesu, ao tangpem me tak tüopa yamnang. Hüpoi I tüome yenang: I yange yeteki! Leihu, iman-e tüome I muyangki.

⁷Hüpoi sha-a taitüoh hüyange Peter omme I pinlante tüopa ngaolan phatüoh. ‘Numan shaote I Galilee te tainang; tüome Iye numante hangke i, hüke ngelak.’ ”

⁸Tüophei me iman yu hüyange mangjong mepu phet, hangjingne nyampu hei yashanpu iman me ngoh. Hüyange ao te-o iman-e hango ye i, hangjingne iman nyam. (Üwang yeme nyanpu ülangpa sakilan me Mark 16.9-20 yenang).

⁹Sha-a Jesu lipu mepu yange yephei me, hat me üwangpa nap, I Mary Magdalene tangte üwangne ngai, ao mepu laa nyit ngoiye Iye jange tei.

¹⁰Yha tai hüyange yha phei jampalan aoyin shappe ngoh imante i;

¹¹hüyange aope Jesu yange yeteki, hüyange yhawe ngeyangki she yha mepu iman-e jai, yhate iman-e ütingyelak.

¹²Tüophei me Jesuwe pinlan ni chingyete taiye ngohwante nyoingoh ülaone ngaiye hüo.

¹³Iman leihye-e hüyange ülao lante i, hüpoi tüote iman üting yelak.

¹⁴Üküm ne iman hah ngohwante pinlan penme ja tangte Jesu ngai, Iye imante tee, hangjingne iman me ütinglakpu yenang hüyange I ngeyangki she ipalante üting yelakpe üngei ne mengpu jingne!

¹⁵Hüyange Iye imante i; “Kahtoknyu üshei te taitüoh hüyange kahtanyuha üshei te pungao ümei nyüotüoh.

¹⁶Aoyinne ütinglak hüyange bapti yinlak, hüyangpoi aoyinne üting yelak lakei iman winlak.

¹⁷Ütinglakpalante tüopa yepinlakpa (kahnyingwüngha üngan wong) phalak. Iman-e ü-min me laa janglak; iman-e ngao üla ngaolak;

¹⁸Iman yak me pu jonyapoi yejema-a, lilak soihüng yingyapoi, imante hangko yesheilak; iman-e dakpalante yakke jonlak, hüyange iman meilak.”

¹⁹Iman phei Youngwanpa Jesuwe ngaoyang phei me, I wangte woi ün hüyange Kahwang yak jah yeme shot.

²⁰Pinlan tai hüyange kenphe me konnyüo, hüyange Youngwanpawe iman phei toiling hüyange imante kahnyingwüngha wong phapu kaiye iman-e nyüopu üting she hüo. Amen. (9 Shekolan Peter hüyange I shümpalan tangte tai hüyange imante ngaopulan üshei ünunglange imante i; Tüophei me, Jesuwe I muh yoi pinlan kaiye, wanghe ongjing mepu nyipjing ngoiye lowe angpu hüyange jinte ngohpu yemahyemee yinyepu ngaolan-a shonne tei.)