Read Konyak Naga MARK 4 Bible Online

MARK 4 - Konyak Naga bible

MARK 4

¹Üne-o Jesuwe Galilee yengnah me konnyüowe wang. I neikonne jempu kahta meiyange loipu nanjingne I lisheng ja me ong hüyange yengme yong. Jempu kahta üshei phanko me ngoh.

²Imante konnyüowante Iye ngaolep maawe jon hüyange hüke i:

³“Jaiyah! Ülideipa ja üli deine tai.

⁴Hüke Iye kahme üli deiwante, üli ütam lamko me yei, hüyange awhalan peiye toonne küm.

⁵Üli ütam kahtok ümei yenangpu longpieng tangme yei. Kahtok ümei yeje tüoh-e üli mamshe phao.

⁶Tüophei me aope wanghe kat, üphao kuiye mah, hangjingne üya meiyange yelupu nanjingne üphao wanne mah.

⁷Üli ütam huh-hüng yo me yei, hüng jongpuwe iman shümme mah hüyange iman me ülick yengai.

⁸Hüpoi üli ütam kahtok ümei me yei, hüyange üphao meiye ngai, jong, hüyange ülick lick.” Ütamme delüm ngoiye, ütamme dewok ngoiye, hüyange ütamme gho ngoiye ülick lick;

⁹hüyange Jesuwe i, “Jailak jingne aoyin me na ngoh iman-e jaiyah.”

¹⁰Aope Jesu I shaha ngoh, Iye nyüopu jaiyangpulan pin penme ni phei I tangte pei hüyange ngaolep khoih ilak jingne tong.

¹¹Jesuwe imante janne i, “Kahwang Ahngching me hanghe ngaolo ngoh numante pha yangki; hüpoi ü-at me ngohpu ülaolan-e, ngaolep kaiye jaine tamnang.

¹²Hümme nakshih, “ ‘Iman-e lei shaha leilak, hüpoi ye-ngepe, iman-e jaimuh jai, hüpoi yeshingpe. Tüone yejeshihma-a iman Kahwang tangte mong lüphah shepu, hüyange Iye imante ümeng winhah shepu!’ ”

¹³Tüophei me Jesuwe imante i, “Numan-e tüopa ngaoleppu yeshingpu a? Hüma-a ngaoleppu lili numan-e hangke shinglak?

¹⁴Üli deipawe Kahwangpa pungao ümei deipu hüonang.

¹⁵Hipak ja ja me tüopa ngao lamko me yeinang; tüolan kahtawe jaipupa jainang, hüpoi jaipu phei jamshe satan pei hüyange iman mepu pungao ümei yahtei.

¹⁶Kahta ütam-a kahtok ümei yenangpu longpieng tang me yeipu üli lenang. Kahwang pungao jaipu phei jamshe iman-e mongmei me yahnang.

¹⁷Hüpoi iman ümong ngoiye luwe yehin hüyange hipak laowe yengoh. Tüokhei aope pungao ümei jingne shangpu yejema-a shaoshi yalipu peilakeih, iman-e nünne ye-okpe tüohnang.

¹⁸Ülao kahtalan-a hüng yo me deipu üli lenang. Tüolan-a aoyinne pungao ümei jai,

¹⁹hüpoi tüopa üyin jingne mongshang, hakpute lengpu, hüyange lengpu üshei teihne tam hüyange pungao ümei shümne tam hüyange iman üli yelick.

²⁰Hüpoi kahtok ümei me yeipu üli te leppuwa, aoyin kahtawe pungao ümei jai, hüyange yah, hüyange ütamme delüm, ütamme dewok, hüyange ütamme gho ja, ngoiye ülick lick.”

²¹Hüyange Jesuwe yelakpe i; “Kahta ütamme vüntük pahyange muhto ümongme yejema-a lengphang me angnang kü a? Vüntük yongjing ken me Iye ye-anglak a?

²²Hangjingne hangyin lowe ang, ütokte ngaiye kümlak, hüyange hangyin jüowe ang ütahte ngailak.

²³Numan me jailak jingne na nyimme ngohpu ne mengma-a jaiyah!”

²⁴Iye imante hüke i; “Numan-e hanghe jai, tüote mong phatüoh! Numan-e eiha ngaophünlak jingne hanghepa wanglam jon numante ngaophünlak jingne Kahwange tüomuh jonlak, hüyange numante shemengpu püolak.

²⁵Ao kahta me üjingha ngoh, Ite paowe phalak; ao me üjingha nehoi yenang Imepu khongküm hüyange üjingha ngohpu nehoi yah teilak.”

²⁶Jesuwe yelakpe hüke i: “Kahwang ahngchinga kahta jawe I kahte üli shaipu lenang.

²⁷I wangnyak wangngai shi hüyange laoyapoi, üli üshei phao hüyange jong. Tüopa hangke ngai Iye yeshing.

²⁸Kahtok kaiye üphao jonge tamnang hüyange ülick lickne tam nang; üwangne ünyim ngai, tüophei me üshang, hüyange ükümne wange ngoipu tah lick.

²⁹Hüpoi aope ülick yimlakei, shaaji tahyahlak ju ngoipu khei kahtawe yangkuih phei toikong wangnang.”

³⁰Jesuwe tong, “Kahwang ahngching hüke ngohlak she teman-e hanghe phei ilak? Shinglak jingne hanghepa ngaolep phei teman-e ilak?

³¹Hatüowa kahtoknyu üli yo me sheshoipupa yanhoi li lenang. Kahta jawe yah hüyange kahtok me dei;

³²hipak ütenjapu mongme hatüo phao hüyange üphao yo me sheyongpupa ne meng. I me üqui üyong ngai; tüokaiye wang awhalan pei hüyange üyak shümphang me ülüp ling.”

³³Hatüo kihpu ngaolep maapu phei kahtalan-e shinglak jingne Jesuwe konnyüo.

³⁴Ngaoleppu ye-ompe Iye iman phei yengao, hüyangpoi iman shaha ngohwante yoi pinlan phei tüopa jeng khoih i.

³⁵Tüonyih aope ün ngoi, Jesuwe yoi pinlante hüke i, “Teman jaye jant te wenhah.”

³⁶Iman-e ükhong tüohyange I shotte ngohpu lisheng te ong; hüyange ülao lishenglano tüome ngoh.

³⁷Ye-onge wong nangpu phei waishihwangkhah hüyange yengmokh po, tüokaiye lishenga yenge maane wang.

³⁸Jesu lisheng ükong yeme yeonge meiye shiteiye ngoh. Pinlan-e Ite loi, hüyange i, “Konnyüopa, teman mahne o nangki, nange hangko yeteih pu a?”

³⁹Jesu lao hüyange wangyangte tee-ngao: “Laktüoh!” Hüyange yengmokh te i: “Jünge ngohtüoh!” Wangyang lakke mah, hüyange wüngmahpu üyong ngoh.

⁴⁰Tüophei me Jesuwe imante i, “Hangne numan teshinne nyampu shi? Numan me ütinglakpu yenangpu a?”

⁴¹Hüpoi iman yeonge nyam, hüyange hüke tei ngaowe i, “Waishihwangkhah hei yengching yengmokh lanne nehoi ngao jai! Tüowa aoshi?”