Read Konyak Naga MARK 5 Bible Online

MARK 5 - Konyak Naga bible

MARK 5

¹Iman Galilee jaye yengjan Gerasalan kahmük te pei.

²Jesu lisheng mepu yupu phei jamshe mangkoksa mepu ünu yaha pheipu kahtaja I phei hüo. Tüopa kahta me ünu yahalan ngoh.

³I mangjong yo me nyoi. Shaaji aowe-o Ite yanne shayange ye-ang ok;

⁴hipak lep iye I ya hei yak me shayange ang, hüpoi shapu lep iye phün hüyange yan üshei yaphei kawin. Kahta aowe-o phowe ye-oklak ne I wanne ngoh yangki:

⁵Wangnyak wangngai I mangjong yo me hüyange phao me üngwünne hüyange yoi nying nyingke tangtate ünah pheipu longe wette waa-kemme ngoh.

⁶I shejai she ngohwante Iye Jesu nge; tüokhei I phet, yatuh shünge I sheshao me lam;

⁷hüyange ngao üyong ngaiye üngwün, “Jesu Ütahpa Kahwang Üha! Nange ü-mepu hang yah hupu? Kahwang min me taowe khümme inang, üte shangne tahtam kei!”

⁸Hangjingne Jesuwe Ite i, “Ünu yaha, tüopa kahta mepu yutüoh.”

⁹Jesuwe Ite tong. “Nangte hangke minpu?” Kahtawe janne i, “Ü-min-a ‘Mob,’ hangjingne toman maawe ngoh nang!”

¹⁰Tüopa kahtok mepu ünu yahalan jange yeteilak jingne Iye Jesute yelakpe tong.

¹¹Sha-a tampu ak ükhong, ü-o mepu kahshong me heei hahwe ngoh.

¹²Yahalan-e Jesute tonge i, “Toman aklan tangte teipha, hüyange toman iman tangte taining.”

¹³Iye iman taine tam. Ünu yahalan kahta mepu yu hüyange aklan tangte ong. Haja ni nanjing ngohpu aklan üshei yeonge po hüyange yengching nah wakte phet moilan yengme hüng.

¹⁴Ak yomme ngohpu kahta phette tai hüyange kahhampalan hei chingshao kahtalan te ngaoyan. Hanghe ngai tüote leilak jingne kahtalan jem.

¹⁵Iman Jesu tangte pei hüyange ünu yaha maawe ngohyangpu kahta nge; inkhek inyange kahta ümei ne shotte nge, hüyange iman üshei nyam.

¹⁶Aoyinne ütingme ngeyangki iman-e, ünu yaha hei kahta hüyange aklan jeng kahtalante i.

¹⁷Tüokhei iman kahtok mepu taitepha she Jesute iman-e yoppe tong.

¹⁸Hüyange aope Jesu lisheng te ong, ünu yaha ngoh yangpu kahtawe Ite tong, “Tao nang phei taiküning!”

¹⁹Hüpoi Jesuwe I yewoi; hüyange hüke i, “Nenok tangte leih yetüoh hüyange Youngwanpawe nangjingne hangshin toiling hüyange nangte hangshin ken imante itüoh!”

²⁰Tüophei me tüopa kahta leihye hüyange Dekapolis lante Jesuwe I jingne hanghe ling iye pong, hüyange aoyinne tüopa ngao jai iman üshei yashan.

²¹Hüyange aope jaye yengjan yete Jesu nishe lisheng me leihye; ükhong üyong I neikonne jem; tüokhei I yengching nah me ngoh.

²²Tüome Jairus she minpu, synagogue woipa üyong ja pei, hüyange aope Iye Jesu nge, I yashong me I nying nyingke lamme ta;

²³hüyange Iye okpu shinne inne nyaiye i: “Üha üjoinyu pali she daknang. Chingmei linge peikei hüyange I tangme nang yak moipha, tüome I meilak hüyange üyin ngohlak!”

²⁴Tüokhei Jesu I phei yayong. Ükhong üngang Iphei woi hüyange kenphe me kahta maa.

²⁵Hüyange sheko ja wangpeng penme ni ngoiye yelakpe iy taipu ngoh,

²⁶yhate soihüng shingpalan maawe paoyapoi hüyange yha me ngohpu ngin wenne kümyapoi, meihah shepu nanleiye shemeng she ta;

²⁷Jesu jeng yhawe jai, tüokhei ükhong pa me tokphei yeme yha pei.

²⁸Yoi nying nyingke yhawe hüke i, “Taowe I inkhek te jonma-a, Tao meilak.”

²⁹(Yhawe Ijing inkhek te jon) Mokhshe yha iy yünpu lak; hüyange yha shangpu mepu meiteki she yhawe shinge pei.

³⁰Hüwante muh I mepu üngan taipu Jesuwe shing, hüyange ükhong yete leppe ye leiyange Iye i, “Ü-inkhekte aowe jon ei?”

³¹I pinlan-e hüke janne i, “Nang neikonne kahtalan üngang ngohnang; nangte aowe jon ei she hangne tongki?”

³²Hüpoi aowe lingyangki shinglak jingne Jesuwe neikonne lei.

³³Ite hanghe ngai shekonyuwe shingpei; hüyange nyampu phei nin nin she yha pei hüyange I yashong me lammeta, hüyange ütingme nangpu üshei Ite i.

³⁴Jesuwe yha te i, “Üha, nang ütinglakpuwe nang meiteki. Chingmei me taitüoh, hüyange nang shangpu mepu meitüoh.”

³⁵Aope Jesuwe ngaowe ngoh, Jairus nok mepu shongshonpa pei hüyange Ite i, “Nang ha liteki. Hangne numan-e konnyüopa shangne tamme shomme kempu shi?”

³⁶Hüpoi iman-e ipu ngao te Jesuwe mong yepha, hüpoi synagogue woipate i, “Tahnyam, üting hei lakyah.”

³⁷Tüophei me Jesuwe Peter hei Jeams hüyange Inao John kaiye ao-o I phei yewoi.

³⁸Aope iman-e üyongpa nok ngoiyapeih, kahtalan shappu, üngwünpu ülam maawe Jesuwe nge.

³⁹I noksa te ong hüyange imante i, “Hangne teshinne moppu shi? Tüopa naha lipu yeje, I shipu hei ngoh nang!”

⁴⁰Iman üsheiye Ite nyi, tüokhei Iye iman üshei jange yan, naha Inyu Ipa ni hüyange I pinlan lüm yahyange naha lamme ngohpu tüp te ong.

⁴¹I yak me Iye sheko naha pai hüyange hüke i, “Talitha koum,” leppu “Sheko naha! Taowe nangte inang, lüotüoh!”

⁴²Sheko naha nünge lüo hüyange kemme hüo. Yha wangpeng pen me ni ne ngoh. Aope tüo ngai iman üshei yashan!

⁴³Hüpoi ao te-o tüopa jeng ye-ilak jingne Jesuwe ngaokeng pha, hüyange Iye i, “Yha te hahlak ütam phatüoh.”