Read Konyak Naga MARK 6 Bible Online

MARK 6 - Konyak Naga bible

MARK 6

¹Jesuwe tüopa kahtok tüoh hüyange imching te leih ye hüyange I pinlan-o I pheite woi.

²Sabbath nyih synagogue me Iye konnyüone wang. Tüome kahta maawe ngoh, hüyange aope iman-e I ngao jai iman üshei yashan, iman-e hüke tong; “Hatüoyin khongkümpu Iye ü-mepu tüopu shi? Iye hangke hükihpu konngao tüopu shi? Hüyange Iye tüolan yashan toi hangke linge okpu shi?

³Hatüowa Mary üha yaktoi lingpa, hüyange Jeams, Joseph, Judas, hei Simonlan üjei yeje a? Hatüo me Inao shekolan yengoh a?” Hüyange iman-e I yeyah.

⁴Hüwante Jesuwe imante i, “Hipa ja I nyupuh chingshao, hüyange Ipheipu hüyange I yoi noksa kaiye kenphe me wangshüm yehüope yengoh.”

⁵Tüoye me dakpa ütamte yakke jonne hüyange meiye tampu tokte kaiye Iye yashan toi hango lingpu ye-ok.

⁶Iman me ütinglakpu yenangpu te I yeonge yashan. Tüophei me Jesuwe kahtalan te konnyüowe chingshao lante ngoiye kem.

⁷Tüophei me Iye pinlan penme ni jamshe nyik hüyange nini shonne tei. Ünu yaha tangme Iye imante wong pha;

⁸hüyange imante ngaokeng pha. “Taiwante shengshaoh kaiye numan phei hango tahyah—an yeyahlak, nyekhok yeyahlak, ngin shienghit nyekhok me ngin yeyahlak.

⁹Yashom ja hüpoi phakshao ni yeyahlak;”

¹⁰Iye imante i, “Aope numan chingshao ja te ngoilakei, hüyange aoyin ne numan yahlakei numan mantai mantai iman nok me ngohtüoh.

¹¹Hüyange nyoijing ütamme numan yeyahpu yejema-a numante yejaihupu nyoite ngoiyahma-a, aope numan tailakei numan ya mepu tüpla kong angtüoh. Hatüo iman jingne deingao ne menglak.”

¹²Tüophei me iman tai hüyange kahta lili ünu mepu monglüptüoh she konnyüo.

¹³Iman-e laalan maawe jangtei, hüyange dakpalante minnga pho hüyange iman mei.

¹⁴Sha-a Herod ahngpawe tüopa jeng jai, hangjingne Jesu min kenphe me ngai. Kahtalan-e i, “Baptipa John yange yeteki. Tüokhei, tüopa wonge Iye toi lingnang.”

¹⁵Ülao lan-e hüke i, “Iya Elijah.” Ülao lan-e i, “Iya üshong wante ngohyangpu yo mepu Hipa üyong ja.”

¹⁶Hüpoi aope Herod-e tüopa jai, Iye i, “I ya baptipa John. Taowe I üngphün yangki, hüpoi I yange ye nang!”

¹⁷John pholak jingne Herod-e ngaokeng pha, hüyange phowe sha hüyange küpnok me ang. Hangjingne Herodias-a Inao Philip sheko ne ngoh, tüojingne Herod-e tüopa ling.

¹⁸Hangjingne baptipa John-e Herod te i; “Nang nao sheko nange yahpu ye-oklak.”

¹⁹Tüokhei Herodiawe John te nu hüyange I toihuwe teih, hüpoi Herod ngohpu jingne Iye yetoi ok.

²⁰John te Herod nyam hangjingne John khakshupu kahta hüyange üjao kahta, tüokhei Iye I yinne ang. I jeng jaipu lep iye Ite yemeipe pokyapoi, Iye I ngao mongmei me jai.

²¹Üküm ne Herodiawe hipak ümei tüo. Hatüowa Herod puhpu nyih, I phang mepu woipalan, kengphet woipalan, hüyange Galilee üjenglan nyikyange mo üyong uh.

²²Herodia üha sheko naha peiye polok, hüyange Herod hei I pinlan mongmei tam. Tüokhei ahngpawe sheko nahate i, “Nange hanghe yahhu nangki? Nange hanghe leng taowe phalak.”

²³Hüyange Iye yhate jienge i, “Nange hanghe lenge yulakei, ü-ahngching ni ne tangpu shinne jeyapoi phalakei.”

²⁴Tüokhei sheko naha phette yuwe Inyute tong, “Taowe hanghe yu hah?” Yhawe jan, “Baptipa John üshang.”

²⁵Ahngpa tangte sheko naha mamshe phette ye, hüyange hüke yu. “Baptipa John üshang shengja me heyange sha-a üte yahkei she nangte yupuwei.”

²⁶Ahngpa yeonge mongmeng; hüpoi I tangte peipu yinpalan üshei sheshao me jiengyangpu ngaone menge Iye yha te yelan hu.

²⁷Tüokhei John üshang peilak jingne yompa te mamshe ngaokeng phawe shonne tei. Yompa küpnok te wen, hüyange John shang phün;

²⁸tüophei me Iye sheng ja me yah pei hüyange sheko nahate pha, aowe Inyute pha.

²⁹Aope John pinlan-e tüopa ngaolan jai, iman pei hüyange I mang yah hüyange mangjong ja me mu.

³⁰Lampulan leihye hüyange Jesu phei hüo, hüyange iman-e lingpu hei nyüopu khongkümpu Jesute i.

³¹Kahtalan maawe peipu hei taipu ngoh, tüone menge Jesu hei I pinlan hahlak hipak nehoi yetüo. Tüokhei Iye imante i, “Hipak ütenja toloi meilak jingne nyoijing ja te teman hüng taihah.”

³²Tüokhei lisheng ja me ongyange wanwüng jeng yamme iman yayong.

³³Kahtalan-e iman taipu nge, hüyange iman aoyin tai mamshe shing; tüokhei iman üshei chingshao tüohyange yalam me phet hüyange Jesu hei I pinlan manngoipe nyoijing me iman me shonge ngoi.

³⁴Aope lisheng mepu Jesu yu, Iye kahta üngang nge, hüyange iman jingne I mongjang me yayenge teih, hangjingne nyee yompa yenangpu nyeelanke iman nge. Tüokhei Iye ülam maawe imante nyüowe wang.

³⁵Aope shonne yao, I pinlan I tangte pei hüyange i, “Shaaji yeonge shonteki, hüyange hatüowa wanwüng jeng.

³⁶Kahtalan yanne tamtüoh, hüyange chingyo yupi kahhampalan mepu iman-e hahlak ütam minshak yah.”

³⁷Jesuwe janne i, “Numan-e imante hahlak ütam phatüoh.” Iman-e tong, “Toman taiye ngin gho ni phawe an shakke imante uh ne tamhu shihpu a?”

³⁸Jesuwe imante i, “Numan me an hangshin ngohnangki? Taitüoh hüyange leihu.” Aope iman-e tüoyapeih iman-e Ite i, “Ankhüo nga hüyange nyah ni.”

³⁹Hüwante kahtalan üshei hüng tangme ükhong ükhong shotne tamtüoh she Jesuwe I pinlante ngao pha.

⁴⁰Tüophei me kahtalan üleng üleng gho ja ükhong hüyange denga ükhong shot.

⁴¹Tüophei me Jesuwe ankhüo nga, nyah ni jon, wangte lei, hüyange Kahwang te minyong pha. Iye an khoih hüyange kahtalan te tamtüoh she Iye pinlante pha. Iye nyah ni-o iman üsheite tamme pha.

⁴²Kahta liliye hah hüyange moh.

⁴³Tüophei me pinlan-e muhto penme ni maawe an hei nyah topu shaijem.

⁴⁴Hüyange an hahpu kahtalan netan haja nga ngoiye ngoh.

⁴⁵Hüwante muh Iye kahtalan yanne teiyang phei me yoi pinlan lisheng ja te ongne tam hüyange I sheshao me jaye yengjan Bethsaida te tei.

⁴⁶Pinlante yan ngao iye teiyang phei me, kahtang ja te yoplak jingne I ong.

⁴⁷Aope ün ngoi lishenga yengching üwo me hüyange Jesu I shaha kahtok me ngoh.

⁴⁸I pinlan yengme lisheng popu jingne pongpu Iye nge, hangjingne iman phei hokke wangyang lei. Tüokhei napning awkaju me yengtang me kemme I pei. Iman linne I tai.

⁴⁹Hüyangpoi aope iman-e I yengme kem nge. “Hatüowa miengja!” she iman-e teih, hüyange üngwün.

⁵⁰Hangjingne aope iman üsheiye I nge iman nyam. Hüwante muh Jesuwe imante ngao, “Mongyong yah!” “Hatüowa Tao, tahnyam!”

⁵¹Tüophei me iman phei jamme I lisheng te ong, hüyange wangyang lak. Pinlan yeonge yashan hüyange lanshe üpong yetüo.

⁵²Iman-e haja nga te uhyingpu te leppu hanghe yeshing; iman mong kentinge üye.

⁵³Hüyange aope iman-e yengching kai, Gennesaret kahtok ngoi; iman-e tüome lisheng shinyange ang.

⁵⁴Iman-e lisheng angpu phei jamshe, kahtalan-e Jesu shing.

⁵⁵Tüokhei tüopa kahtok me ngohpu kahta liliye dakpalan iman lengme paiyange ümeken me I ngohnang she jai, I tangte pei.

⁵⁶Hüyange ümeken me I chingshao me, bangching me, yejema-a kahme peilakeih, kahta lan-e dakpalan paiye peiye pheeileihpu nyoiyin me angyange iman-e I nyejeng te nehoi jonne tampha she yoppe khümpu ngoh; hüyange aoyinne jon üshei meitam.