Read Konyak Naga MARK 7 Bible Online

MARK 7 - Konyak Naga bible

MARK 7

¹Aope Phariseelan hüyange Ngaokeng nyüopalan aoyin Jerusalem mepu pei Jesu neikonne jem.

²I pinlan ütamme “Yejaopu” yak phei nük hahpu leiye ok: hatüowa, Phariseelan hei ülaolan wanglam phei yeshupe ngoh.

³Hangjingne Phariseelan hei ülao Jehudilan-e iman puyimlan-e nyüowe angpu wanglam jon; tüokhei wanglam khakshuwe yak yetuhma-a nük yehah pe ngoh,

⁴yejema-a hatleih nyoi mepu aope peilakeih üwangne yeng yeyaope yehah. Hüyange wan, tük, sheakphan sheng, hüyange shinleng hanghepa wanglam me hangke jaolak wanglam maawe ngoh.

⁵Tüokhei Pharisee hei Ngaokeng nyüopalan-e Jesute tong, “Toman puyimlan mepu peipu wanglam hangne nang pinlan-e yejon, hüpoi tüo nanleiye yejaopu yakphei hahpu shi?”

⁶Hüwante Jesuwe imante jan; Isaia hipawe numan jingne iye angpu hangke shupu shi! Numan jutok meipalan, Iye hüke nyan: “Hatüo kahtalan-e jutok me üte wangshüm hüo, hüpoi iman mongjang ü-phei yeonge jai.

⁷Iman-e üte jajang jawe yop khümnang, hangjingne Kahwang lamjong ngoh yang pheite kahtawe lingpu lamjong iman-e nyüo!”

⁸Hüyange Jesuwe i, “Numan-e Kahwang ngaokeng yejonpe angyange kahtawe nyüopu puwanglam te mong phanang.”

⁹Hüyange Jesuwe yelakpe i, “Yeonge deiye numan-e Kahwang ngaokeng angne tamyange numan-e nyüopu puwanglam jon nang!

¹⁰Hangjingne Mosawe hüke nyüo. ‘Nangnyu nangpa te iyesheyah,’ hüyange ‘Aowe Ipa yejema-a Inyu te ngao meng ilakei, I li ne tamlak.’

¹¹Hüyangpoi numan-e hüke nyüo, ‘Ütamme Inyu Ipa te jamme oklak ne ngoh, hüpoi hatüowa Corban’ (Leppu-hatüowa Kahwang jing she ima-a),

¹²Ite shaaji Inyu hei Ipa jingne hango lingne yetam.

¹³Tüokih-e numan-e nyüopu kahtalante pha ne tamyange Kahwang ngao ye-i-yeshe. Hüyange tüokihpu numan-e lingpu ülao toi maanang.”

¹⁴Hüyange Jesuwe I shongte ükhong ni she nyik hüyange imante i: “Numan üsheiye üte jaiyah hüyange shingyah.

¹⁵Kahta ja nuwe tamlak jingne ütok mepu I tangme peipu hango yenangja. Tüoleima-a, kahta ja mepu ngaipuwe I nuwe tamnang.”

¹⁶(Kahta ütam ja me jai yahlak jingne na nyimme ngohma-a Iye jaiyah).

¹⁷Aope ükhong angyange I tai hüyange nokte ong, pinlan-e tüopa ngaoleppu jeng Ite tong.

¹⁸Hüyange Jesuwe imante i, “Hüma-a numane-o shinge okpu yenangpu a?” “Numan-e tüo yeshing a? Ütah mepu hanghepalam kahta ja te onglakeih, tüowe nuwe yetam ok;

¹⁹hangjingne hatüowa I mongjang te ye-ong hüpoi seanyu te onge ü-at te tai mahnang.” (Jesuwe hatüo ipu kaiye hahying üshei üjao she hüonang.)

²⁰Hüyange Iye yelakpe i: “Kahta I mepu hanghe ngai tüowe kahta ja nuwe tamnang.

²¹Hangjingne kahta mongjang ümong mepu ünu juteih, yejao yeshapu hüyange ünu toi linglak, kuhlak, toilak,

²²phwngngamlak, hahnyakpu, hüyange ünu toi üshei ling; nyoi ngoh ümeng, eangpu, aohüngpu, Kahwang te phoipu, otapu, hüyange ngayounpu,

²³tüolan khongkümpu ünu toi kahta ja ümong mepu ngainang hüyange I nune tamnang.”

²⁴Hüyange tüophei me tüopa mepu Jesu yayong hüyange Tyre hei Sidon kahtok yete tai. I noksa ja te ong hüyange I tüome ngoh nang she aote-o shingne yetamhu, tüopoi I lowe yengoh ok.

²⁵Hüpoi sheko ja, ao yoiha sheko nyu me ünu yaha ngoh, Jesu jeng jai hüyange mamshe I tangte pei hüyange I yashong me lam.

²⁶Tüopa sheko-a Phoenicia mepu Syria me puhpu Greek ja ne ngoh, I ha mepu ünu yaha jang yangpha she Iye Jesu te tong.

²⁷Hüpoi Jesuwe yha te janne i, “Üwangne nahalan moh ne tamhah, hangjingne nahalan mepu nük yahpuwe kuihalante shüppu yemei.”

²⁸“Üyongpa,” she yhawe jan, “Kuihalane-o khao phang me ongyange nahalan-e yeipu hah nangja!”

²⁹Tüokhei Jesuwe i, “Nange hüke ipu kaiye nokte yepu oklak; nangha yhamei mepu laa taitepu!”

³⁰Tüokhei yha nokte ye hüyange yha mepu laa tai teiye yhalaha-a lengme lamyange nge.

³¹Tüophei me Tyre kahtok angyange Jesu leihye hüyange Sidon lamke Galilee yengching kaiye Dekapolis kahtok üwo kaiye ye.

³²Kahta ütamme napan hüyange ngao-o ye-i-okpu kahta ja I tangte yah pei, hüyange Ite yakke jonne tampha she Jesute tong.

³³Jesuwe I shaha ükhong yo mepu woitei, kahtapa na me I yaklan ang, iyphao phao, hüyange I yi te jon.

³⁴Tüophei me Jesuwe wangyete lei, lüo ülu yo, hüyange kahta te i, “Ephphatha,” leppu “Eptüoh!”

³⁵Mamshe I na ep, I yee popu ok hüyange yeshangpe ngao.

³⁶Tüophei me Jesuwe aote-o ye-ilak jingne iman üshei te ngaopha; hüyangpoi Iye hangshinne ye ilak jingne ngaopha teshinne kahtalan-e tüopa jeng i.

³⁷Hüyange aoyinne tüolan jai iman üshei yeonge yashan. “Iye khongkümpu meiye linge oknangki; Iye napanpa jaine tam hüyange ngao ükpa ngao ngaine tam.”