Read Konyak Naga MARK 8 Bible Online

MARK 8 - Konyak Naga bible

MARK 8

¹Tüo ün memuh, üne-o ükhong üngang jem; hüyange iman me hahlak hango yenangpe ngoh. Jesuwe I pinlan I tangte nyik hüyange i;

²“Tüolan kahta jingne Tao yayenge teihnangki, hangjingne hatüo me iman ü-phei nyih lüm ngoiye ngohnang, hüyange sha-a hahlak hango yenang.

³Taowe iman ye-uhpe teima-a iman kemwante seanyaowe nyai mahlak, hangjingne iman ütam üjai mepu peiyangki.”

⁴Pinlan-e Ite janne i, “Hatüo wanwüng jengme aowe teshinpu kahta lan jingne wangpu shinne hahlak tüolak shi?”

⁵Hüwante Jesuwe imante tong, “Numan me an hangshin ngoh nangki?” Iman-e jan, “Ankhüo nyit.”

⁶Kahtok me shotlak jingne Iye ükhong te ngaopha. Tüophei me Iye ankhüo nyit yah, Kahwang te minyong pha, tüolan khoih, hüyange ükhong te tamlak jingne yoi pinlan te pha; hüyange pinlan-e ükhongte tamme pha.

⁷Iman me üne-o nyahha ütam ngoh. Tüopa jingne Jesuwe minyong pha hüyange pinlante tüopa-o tamlak jingne i.

⁸Hüyange iman kahta liliye hah hüyange iman moh hüyange iman-e topu ükhoih ünyai shaijemwante muhto nyit maawe ngoh.

⁹Hüyange kahtalan haja peli nanjing ngoh, hüyange Iye iman taine tam.

¹⁰Hüyange mamshe yoi pinlan phei lisheng te ong hüyange Dalmanutha kahmük te tai.

¹¹Phariseelan ütam pei hüyange Jesu phei teingaone wang. Iman-e Ite tok hu, tüokhei Kahwange mongpu ngaiye hüolak jingne, kahnyingwüngha ja lingkei she iman-e Ite tong.

¹²Jesu yeonge luwe mongmeng hüyange i: “Hangne hatüo jinne kahnyingwüngha yampu shi? Ütingme Taowe numante inang. Tüopa jinte kahnyingwüngha hango yehüolak!”

¹³Tüopa ngao phei iman angyange I lisheng te ong, hüyange jaye jant te tai.

¹⁴Pinlan-e an yahlak yeteih tüo, hüyange iman lisheng me ongwante ankhüo ja shaha ngoh.

¹⁵Hüyange Iye imante kentinglak ngao phawe i, “Leiyah hüyange Phariseelan mepu do hei Herod mepu do jingne numan kentingyah.”

¹⁶Iman yo me hüke teingaowe i, “Teman me hang an-o yenangpuwe Iye tüopa ngao inangki.”

¹⁷Iman-e hang ngao i, Jesuwe shing; tüokhei Iye imante tong: “An yenangpu jeng numan-e hangne ngao nangki? Numan-e üpongo yetüo yejema-a shingo yeshing pu a? Numan mongme hango yenang yahpu a?

¹⁸Numan me mük ngoh nang, numan-e ye nge a? Numan me na ngoh nang, numan-e yejai a? Numan-e yeteih a?

¹⁹Aope Taowe haja nga jingne ankhüo nga khoih? Topu ükhoih muhto hangshin numan-e shaijem?” “Pen me ni,” she iman-e jan.

²⁰Jesuwe tong, aope Taowe an nyit kahta haja peli jingne khoih, “Topu ükhoih muhto hangshin numan-e shaijem?” Iman-e Ite jan, “Nyit.”

²¹Hüyange Iye imante i, “Numan-e sha-ate ngoiye yeshing okpu a?”

²²Hüyange iman Bethsaida te pei, mükmüopu kahta ja Jesu tangte woipei hüyange kahta ütamme Ite jonpha she yoppe khüm.

²³Jesuwe mükmüopa yakme jon hüyange chingshao mepu I woitei. Hüyange aope kahta mük te iyphao phao, Jesu yakke Ite jon hüyange tong, “Nange hango je ngeya?”

²⁴Kahtawe mük wemme lei hüyange i, “Taowe kahtalan ngenangki, hüpoi iman pee kih ngeyange kemnangki.”

²⁵Jesuwe nishe kahta mükte I yakke jon. Sha-a tüopa kahtawe tünge lei, I mük me wong pei, hüyange Iye lamphe li meiye nge.

²⁶Tüophei me Jesuwe inokte yenetam, hüpoi chingte tah pei she ngao pha.

²⁷Tüophei me Jesu hüyange I pinlan Kaisarea Philippi ching ja te tai. Lamme Iye pinlante tong, “Üte itehu, kahtalan-e Tao ao she inangki?”

²⁸Iman-e jan, “Ütamme nanga Baptipa John she inangki,” “Ütamme nanga hipa yo me ja she iwante, ütamme nanga Elijah she inangki.”

²⁹Iye imante tong, “Hüpoi numan-e hangke teihpu? Tao ao she numan-e inangki?” Peterwe jan, “Nanga Messiah.”

³⁰Tüophei me Jesuwe imante ngao phawe i, “Hatüo jeng ao te-o tah i she i.”

³¹Tüophei me Jesuwe yoi pinlante nyüone ükong wang: “Kahta Üha yeonge shanglak, hüyange jeiyong lan-e, ütahpa ngengpalan-e, hüyange ngaokeng nyüopalan-e yeyahlak. I li ne tamlak, hüyange nyihlüm ngohyang phei me üyin me yange yelak.”

³²Iye imante ngaiye i. Tüokhei Peterwe I woitei hüyange tee ne wang.

³³Hüpoi Jesu lüppe ye, yoi pinlante leiyange hüyange Peterte tee. Iye i, “Satan ü-mepu yan tepha.” “Nange teihpuwa kahtalan juteih, Kahwang juteih yeje!”

³⁴Tüophei me Jesuwe kahta üngang hüyange yoi pinlan I tangte nyik. Hüyange Iye imante i, “Ütamme ü-phei te woihuma-a, Iye yoi peyangyah, hüyange nang tangpem paiyah, hüyange ü-pheite woikei.

³⁵Hangjingne aowe yoi üyin yinhu yapeih I mahlak; hüpoi aowe üjingne hüyange pungao ümei jingne I üyin mah, yinlak.

³⁶Hangjing ne kahtawe kahtoknyu üshei okyange yoi üyin mahma-a hanghe tüopu? Ütingme yetüolak!

³⁷Hangjingne I üyin shaklak ümee nanleine kahtawe hanghe phalak shi?

³⁸Hangjingne kahta ütamme üjingne, hüyange tüopa nushakpu jinme ü-ngao jingne, wüoma-a, aope üjaopa wangdang shongmokpa lanphei Ipa müktishiwa me I yulakei Kahta Ühawe I wüotüo tamlak.”