Read Konyak Naga MARK 9 Bible Online

MARK 9 - Konyak Naga bible

MARK 9

¹Hüyange Iye imante i, “Ütingme Taowe numante inang, Kahwang Ahngching ünganwong phei peipu mannge mannge tüo me yonge ngohpu ütamme lipu yeshinglak.”

²Hüyange nyih wok ngohyange Jesuwe Peter, Jeams hei John I phei woi, hüyange shedaopu kahtang te iman shaha ong. Hüyange tüoken me iman sheshao me I üshe leijei,

³hüyange I inkhek yeonge phihlang hüyange heng; kahtoknyu me aowe-o teshinne henge yejao ok.

⁴Tüophei me pinlan lümme Elijah hei Mosa peiye Jesu phei ngaopu nge.

⁵Hüwante Peterwe ngao ngai hüyange Jesute i; “Konnyüopa, teman tüome ngohpu meiteki; toman-e tüome panha lüm wehah, nang jingne ja, Mosa jingne ja, hüyange Elijah jingne ja.”

⁶Hangjingne I hüyange ülaolan yeonge nyam, hüyange Iye hang ilak yeshing.

⁷Hüwante wangphom yu hüyange imante küp, hüyange wangphom mepu ngao ja hüke ngai; “Hatüowa ü-mongkenpu Ha: Ite jai yah!”

⁸Hüwante muh iman-e neikonne lei hüpoi aohi-o ye-nge; Jesu shaha iman phei ngoh.

⁹Iman kahtang mepu ye ngohwante Jesuwe imante hüke ngao phawe i: “Kahta Üha lipu mepu yange manye manye, numan-e hanghe nge, ao te-o tah i.”

¹⁰Iman-e I ngao jaiye ngoh, hüpoi iman yo me tüopa jeng ine ükong wang: “Lipu mepu yange yelak she hangte leppu?”

¹¹Hüyange iman-e Jesu te tong: “Hangne ngaokeng nyüopalan-e Elijah üwangne yukülak she ipu shi?”

¹²Iye imante i, “Eihyang lamphe li tümlak jingne Elijah üwangne yukülak. Tüoyangpoi, Kahta Üha shanglak hüyange yeyahlak she hangne lai ngaowe ipu shi?

¹³Hüyangpoi Taowe numante inang, Elijah peiteki, hüyange Laingaowe I jingne hangke i, tüokih-e kahtalan-e iman-e hangke linghuyapeih tüokih-e Ite lingyangki.”

¹⁴Aope ülao pinlan tangte iman pei ngoi, kahta üngang jempu iman-e nge. Ngaokeng nyüopalan ütamme pinlan phei tei ngao.

¹⁵Aope kahtalan-e Jesu nge, yeonge yashan hüyange I tangte mamshe phet hüyange Ite salam pha.

¹⁶Jesuwe yoi pinlante tong, “Iman phei numan-e hanghe jeng teingao pu shi?”

¹⁷Ükhong yo mepu kahta jawe jan; “Konnyüopa, taowe nang tangte üha woi peinangki, hangjingne Ime ünu yaha ngohnang hüyange yengao ok.

¹⁸Aope ünu yahawe Ite jonlakei, I kahtok te toita nang, hüyange ju me mopphop ngainang, fa ngao nang, hüyange jint nang. Taowe nang pinlante ünu yaha janglak jingne tong, hüpoi iman-e ye-ok!”

¹⁹Hüwante Jesuwe imante i, “Ütinglakpu yenangpu jin! Tao numan phei hangshin ngohlak shi! Tao numan phei hangshin nünne ngohlak shi? Naha ü-tangte wenkei.”

²⁰Hüyange iman-e Jesu tangte naha yah wen. Ünu yahawe Jesu ngepu phei jamshe, naha ya me tük I kahtok te lam, hüyange ju me mopphop ngaiyange toiloita.

²¹Jesuwe Ipa te tong, “Hükih-e ngaipu I hangshin me ngoiteki?” “I naha mepu üja she,” Iye jan.

²²“Hipak phe me I toilak jingne hüke vün hei yeng me shepyang küja. Hüpoi nange mongma-a yayeng pha hüyange jampha.”

²³Jesuwe Ite i, “Oklak,” “Nange mongma-a! Ao me ütinglakpu ngoh, lampheli oklak.”

²⁴Naha üpawe mamshe üngwünne i, “Taowe ütinglak nangki, üting yelak okpu üte jampha.”

²⁵Ükhong üngang iman shongte owe peipu Jesuwe shing, tüokhei Iye ünu yahate teeye i: “Napanpa hei ngao ükpu yaha” she Iye i, “Tüopa naha mepu taitüoh hüyange I tangte aope-o leih tahye she Taowe inang!”

²⁶Yeonge shange naha lengme shüppe tüohyange ünu yaha ngai. Naha liye ta, tüokhei kahta üsheiye I lipuyang she i.

²⁷Hüpoi Jesuwe naha yakme nowe yah hüyange lüone tam, hüyange I yong.

²⁸Aope Jesu noksate ong, I pinlan-e lowe tong, “Hangne toman-e ünu yaha yejang okpu shi?”

²⁹Jesuwe imante i: “Ülao hanghe-o ye-oklak. Yoppu kaiye nakshih tüokihpu jange oklak.”

³⁰Iman-e tüopa nyoi ang hüyange Galilee linne tai. Jesuwe I ngohpu nyoi ao te-o shingne yetam hu,

³¹hangjingne Iye pinlante konnyüopu ngoh. “Iman-e I toilak jingne kahtalan yak me phünne phalak; hüyangpoi nyih lüm phei me I yange yelak.”

³²Hüpoi tüopa konnyüopu iman-e yeshing, hüyange Ite tonglak jingne-o iman nyam.

³³Hüyange iman Kapernaum ngoi, hüyange nok ngoi phei me Jesuwe I pinlante tong: “Numan lamme ngohwante hanghe jeng ngao ei?”

³⁴Hüyangpoi iman-e ngao yengai, hangjingne iman lamme ngohwante üyongpa ne ao menglak shi? she iman teingaopu ngoh.

³⁵Jesu shot, hüyange pinlan penme ni te nyik, hüyange imante i: “Ao üwangpa ne menghu yapeih I ükümpa ne menglak yang hüyange üshei shaoshanpa ne mengtüoh.”

³⁶Hüyange Iye naha ja woipei hüyange iman sheshao me yongne tam. Naha I yak me paiyange imante hüke i:

³⁷“Aowe ü-min me hükihpu naha yahnang Iye Tao yahnang; hüyange aoyinne Tao yah, ü-shaha yahpu yeje hüpoi aowe Tao shon I-o yahnang.”

³⁸John ne Ite i, “Konnyüopa, nang min me laa jangpu kahta ja toman-e ngeki, hüyange toman-e Ite laktüoh she iyangki; hangjingne I teman ükhong ne yeje.”

³⁹Hüpoi Jesuwe janne i, “Ite lakne tahtam.” “Hangjingne ümin me yashan toiling yange mamshe Tao ümeng ne ilak ao-o yenang.

⁴⁰Hangjingne aoyin teman phei tüi-e yeyong teman pheipu.

⁴¹Tüopa teihtüoyah! Ütamme numan Khrista jing she teiyange yengwüng wan ja nehoi phama-a, ütingme Iye hünghao tüolak.”

⁴²“Üte ütinglakpu tüolan üjoihapu yo me ja nehoi aowe tüppe ye-e ünu omne tamlakei, I jingne shamshu longkhao üyong ja üngme yükyange yengching te hüngpu shemei.

⁴³Tüokhei nang yak kaiye lüppe yene tamma-a, tüopa teh wintüoh! Yak ni nangyange jinte yemahpu molovün te taileima-a, yak shohpa ne mengyange üyin chingte taipu shemei:

⁴⁴(Tüoken me iman hahpu yong aope-o yelilak, hüyange imante sheampu vün aope-o yemei).

⁴⁵Hüyange nang yawe nang lüppe yene tamma-a tehwin tüoh; hangjingne ya ni phei nang molovünte yeileima-a, yafaipa ne üyin chingte ongpu shemei.

⁴⁶(Tüoken me iman hahpu yong aope-o yelilak, hüyange imante sheampu vün aope-o yemei.)

⁴⁷Hüyange nang mükke nang lüppe yene tamma-a, yokke wintüoh! Mük ni phei molovünte yeileima-a, mük ja yenangpe Kahwang ahngching te nang ongpu shemei.

⁴⁸Tüoken me iman hahpu yong aope-o yeli, hüyange vün aope-o yemei.

⁴⁹“Hangjingne hüm kaiye toidopu jaowe tampu kih-e kahta lili vün kaiye jaowe tamlak.

⁵⁰Hüm meinang. Hüpoi Iye I mepu wüngpu mahküma-a, nange hangke, nishe wünge linge tamlak? Numan me hüm ngohtüoh, hüyange numan hei numan pa me chingmei ngohyah.”