Read Konyak Naga LUK 1 Bible Online

LUK 1 - Konyak Naga bible

LUK 1

¹Toman yo me hanghepa ngaiyapeih tüopa ngaolan shonlak jingne sheyongpu jinge yoiye okpu shinne lingyangki.

²Üwang memuh aoyinne toishao nge hüyange pungao yan, tüopa jeng tomante hanghe ngaoyapeih, iman-e tüopa jeng nyanyangki.

³Tüokhei, Theophilus, tüolan jeng üwang memuh taowe yeonge meiye teih-e leiyangki, hüyange nang jingne tüoyin khongkümpu yeonge meiye nyanlak she teihyangki.

⁴Hanghepa ngaiyapei, tüopa ütingpa jeng nange shinglak jingne taowe tüopa nyannang.

⁵Judea ahngpa, Herod hipak me, Abijah üli mepu Zekharia she minpu ngengpaja ngoh; hüyange Aaron hayim mepu I sheko ne ja ngoh, hüyange yha min-a Elizabeth.

⁶Youngwanpawe tampu hüyange Ngaokeng üshei me ümeng yenangpe moini Kahwang sheshao me khakshupu me ngoh.

⁷Hüyangpoi imni hayim yenangpe ngoh, hangjingne Elizabeth heelang ne ngoh, hüyange imni moini wunyu wupa ne mengteiye ngoh.

⁸Hüwante tüo ngai, Iye yoi hipak me Kahwang sheshao me ngengpa toiling wante,

⁹Iye ngengpa toishao wanglamke, Youngwanpa khümjing te onge sü jaklak jingne phongyengpu Ite ngai.

¹⁰Hüyange sü jakpu hipak mongme kahta üngang nokshao me yoppe ngoh.

¹¹Hüwante sü jakpu wümjong yakjah ye me Youngwanpa wangdang shongmokpa ja I sheshao me ngaiye yong.

¹²Aope Iye I nge, Zekharia mokh hüyange nyam.

¹³Hüpoi, shongmokpawe Ite i, “Tahnyam, Zekharia, hangjingne nange yoppu jaiteki; nang shekonyu Elizabeth-e nang te moija pailak, hüyange nange I min John she nyiklak.

¹⁴Hüyange nang mongonglak hüyange mongmeilak, hüyange I puhpu te üngang mongonglak!

¹⁵Hangjingne Youngwanpa sheshao me I üyongne menglak, hüyange Iye yu yejema-a wongnangpu hango yeyinglak; hüyange Inyu sea me ngohwante muh, I Yaha Üjaowe maawe ngohlak.

¹⁶Hüyange Iye Israel halan üngang iman Kahwang, Youngwanpa tangte lüpne tamlak,

¹⁷hüyange I sheshao me Elijah yaha hüyange üngan phei tailak, payonglan mongjang hayimlan tangte lüppe tamlak jingne, hüyange Youngwanpa jingne kahtalan tümme tamlak jingne.”

¹⁸Hüwante Zekharia-e shongmokpa te i, “Hangke taowe tüopa shinglak shi? Hangjingne tao wupa hüyange ü-sheko-o wangpeng linnang.”

¹⁹Hüyange shongmokpawe janne Ite i, “Kahwang sheshao me yongpu Gabriel tao ngoh nang; hüyange nangte ngaolak hüyange nang tangte tüopa ngaolan ümei peilak jingne tao shon.

²⁰Hüyange leihu, tüolan ngaipu nyih manpei manpei nang jünge ngao yengao okpe ngohlak, hangjingne ü-ngao hanghepa hipak khakshuwe ngailak ne ngoh, nange ütinglak-e yeteih.”

²¹Hüyange kahtalan-a Zekharia tanne ngoh, hüyange I khümjing me hipak laowe ngohpu jingne iman yashan.

²²Hüyange aope I nokshaote yu, Iye iman phei ngao yengao ok, hüyange khümjing me Iye himang ja nge she iman-e shing. Hüyange Iye imante füo hüo hüyange I yishohpa kih-e ngoh.

²³Hüyange aope Iye shaoshanpu nyih sho pei; Zekharia yoi nokte ye.

²⁴Tüolan nyih hipak linphei me I shekonyu Elizabeth püm yekengpe ngai, hüyange lekeng nga mongme yhawe yoi nying nyingke lowe i,

²⁵“Kahta yo me tao wüotüopu winlak jingne Youngwanpawe üte leipu hipak me hüke üte jamyangki.”

²⁶Sha-a lekeng wok shepupa me Kahwang mepu wangdang shongmokpa Gabriel Galilee mepu chingnyu ja min Nazareth te shon.

²⁷David nokli mepu kahta ja min Joseph-e khamyangpu yhashaoha (wangngoipu) naoyha ja min Mary tangte Gabriel shon.

²⁸Hüyange wangdang shongmokpa yha tangte peiye i, “Nangme toloimei ngohtüoh, nang shüpshe yeonge tüopu nyu! Youngwanpa nang phei ngoh nang.”

²⁹Hüpoi ngao ngaoyangpu jingne yha yeonge mongshang, hüyange mongsa me hatüowa hangkihpu salam ngao she yashan.

³⁰Hüyange wangdang shongmokpawe yha te i, “Tahnyam Mary, hangjingne Kahwang mepu nange monghahpu tüo.

³¹Hüyange hüowü, nang yoi naonyoi me püm yekengpe ngailak, hüyange moija pailak; hüyange nange I min Jesu she nyiklak.

³²I üyongpa ne menglak, hüyange Ite ütahpa jing Ha she nyiklak; hüyange Youngwanpa Kahwange Ipa David ahngpa shotjing Ite phalak;

³³hüyange Jacob nokphong tangme Iye jinte ahnglak; hüyange Iye wanglam lampu üküm yenanglak.”

³⁴Hüyange Mary-e wangdang shongmokpa te i, “Taowe netan manshingpute hatüo hangke oklak?”

³⁵Hüyange wangdang shongmokpawe yha te i, “Yaha Üjao nang tangme peilak, hüyange ütahpa üngan yashüm me nangte küplak; tüokhei puh ne ngohpu naha te üjaopa, hüyange Kahwang üha she nyiklak.

³⁶Hüyange hüowü, nang pheipu Elizabeth, yha wunyu ne ngohyapoi, püm yekengpe ngaiye netanha ja puhlak; hüyange ao te ükengnyu she nyik, yha lekeng wok shepupa ngohnang.

³⁷Hangjingne Kahwang jingne ye-oklak hango yenang.”

³⁸Hüyange Mary-e i, “Hüowü, tao Youngwanpa shaoshan nyu; ü-jeng nang ngaoke ngohne tamtüoh.” Hüyange hüwante wangdang shongmokpa yha mepu yan.

³⁹Tüophei me Mary yayonge kahtang yemepu Judea chingnyu ja te mamshe tai:

⁴⁰hüyange Zekharia nokte onge Elizabeth te salam ngao pha.

⁴¹Hüyange tüo ngai, aope Elizabeth-e Mary mepu salam ngao jai, yha naonyoi me naha-a hom; hüyange Elizabeth Yaha Üjaowe maa;

⁴²yhawe ngao üyong phei üngwünne i, “Sheko yo me nang moimannyu, hüyange nang naonyoi ülick shemoimanpu!

⁴³Ü Youngwanpa ünyu ü-tangte peilak ne hangne üte ngailak shi?

⁴⁴Hangjingne hüowü, aope nang mepu salam ngao ü-na sa te pei, ü-naonyoi me naowe mongmei puwe homnang.

⁴⁵Aowe ütinglak yangki yha moimanpu hangjingne Youngwanpawe yha te hanghe jan tüopa ngaine tam.”

⁴⁶Hüyange Mary i, “Ü üyin yaha-e Youngwanpa yongne tamnang;

⁴⁷hüyange ü Yinyepa Kahwang jingne ü yahawe mongmei,

⁴⁸hangjingne Iye yoi shaoshannyu innyaipu leiyangki. Hangjingne hüowü, sha-a me peiye jin üsheiye üte moimannyu she nyiklak;

⁴⁹hangjingne ütahpawe üjingne toi üyong lingyangki; hüyange üjaopa-a I min.

⁵⁰Hüyange I shüpshe Ite nyampalan tangme jintokte jin ngohlak.

⁵¹Iye yoi yakke yoi wong hüo, mongjang me ota teihpu kahtalan Iye yanne tamyangki.

⁵²Iye ahnghalan iman ahng shotjing mepu yeine tamyangki, hüyange üjoihalan yongne tamyangki;

⁵³Seanyaopalan Iye shemei pupawe moh ne tam, hüyange hakpalan Iye ükeng me tei.

⁵⁴Yoi yayeng shüpshe teihtüowe Iye yoi shaoshanpa Israel te paowe tükyangki,

⁵⁵teman puyimlante, Abraham hüyange I ülilante jintepu jingne Iye ngao.”

⁵⁶Hüyange Mary yha phei lekeng lüm nanjing ngoh, hüyange yha nokte ye mah.

⁵⁷Sha-a Elizabeth moi pailak hipak ngoipei, hüyange yhawe netan naha ja puh.

⁵⁸Hüyange yha yupilan hei yha pheipulan-e yhate Youngwanpawe shüpshe üyong hüopu jai, hüyange iman yha phei mongmei.

⁵⁹Hüyange tetshepupa nyih me iman-e naha-a shokhüplak jingne yah pei. Hüyange iman-e Ite yoipa minleiye Zekharia she nyik hu,

⁶⁰hüpoi Inyuwe i, “Yeje, I min John she nyiklak.”

⁶¹Hüyange iman-e yhate i, “Nenok yo me tüopa min me nyikpu ao-o yenang.”

⁶²Hüwante Iye Ite hangke nyikne tamhupu she iman-e Ipa te füo hüowe tong.

⁶³Hüyange nyanlak longsheng yuwe Iye nyan, “I min John.” Hüwante iman üsheiye yashan!

⁶⁴Hüwante muh I ju epne tamme yee lanne tam, hüyange Iye Kahwang min yonge ngao ngao.

⁶⁵Hüyange iman neikonne ngohpu üshei nyam, hüyange Judea kahtang ching üshei me tüolan ngao ngaopu khongküm pute yan;

⁶⁶hüyange tüolan jaipu üsheiye yoi mongjang me ange i, “Hümma-a tüopa naha hangne menglak?” Hangjingne Youngwanpa üngan wong I phei ngoh.

⁶⁷Hüyange John üpa Zekharia me Yaha Üjaowe maawe itte i:

⁶⁸“Israel Kahwang Youngwanpa te yihlutüoh, hangjingne Iye yoi phei pulan tangte pei, hüyange iman jingne yinne tampu ling,

⁶⁹teman jingne I shaoshanpa David nokli mepu okpupa Yinyepa Iye phatam;

⁷⁰yoi üshong wante üjao hipalan ju kaiye Iye ngaopuke,

⁷¹hüke teman wepalan mepu teman, hüyange aoyinne temante nunang iman yak mepu yinlak;

⁷²teman payimlante shüpshe hüolak, hüyange I üjaopa jiengjeppu teihtüolak jingne,

⁷³teijanpu hanghepa Iye teman üpa Abrahamte janne tam;

⁷⁴teman wepalan yak mepu yintam yange, yenyampe I shaoshanlak jingne temante lingtamlak jingne;

⁷⁵I sheshao me üjaopa me hüyange khakshupu me teman üyin hipak khongkümpu yin.

⁷⁶Hüyange nang, üha, nangte ütahpa hipa she nyiklak; hangjingne Youngwanpa lam tümlak jingne nang I sheshao me tailak;

⁷⁷yoi kahtalan te iman ünu winpu kaiye Yinyepu shinge okpu phalak jingne,

⁷⁸teman Kahwang innyaiye shüpshe teihpu kaiye ütangpa mepu nyih üla ngaipu kaiye teman ngoikülak,

⁷⁹wangnyak hüyange lipu yashüm me shotpulan tangme wangngai lak jingne, chingmei lamnyute teman yah woilak.”

⁸⁰Hüyange naha-a jong, hüyange yaha me wongnange ngai, hüyange Israel te I hüopu nyih manngoi manngoi I wanwüng jeng me ngoh.