Read Konyak Naga LUK 10 Bible Online

LUK 10 - Konyak Naga bible

LUK 10

¹Tüolan üshei linyang phei me Youngwanpawe ülao pin denyit me ni leye ngai, hüyange I kemlak she teihpu chingshao hei nyoi jing üshei yeme pinlan nini shonne tei.

²Hüyange Iye imante hüke i: “Tah maawe nyinteki, hüyangpoi tahyahlak nanpalan meiyange yenang. Tüokhei kah nokpute numan-e yoptüoh, Iye yoi tahnyinpu yahlak jingne nanpalan maawe shonlak.

³Taitüoh; sholan yo me nyee ühalan kih-e Taowe numan teinang.

⁴Numan-e hahyu nyekhok, nyekhok yejema-a yashom tah yah; ütam te salam ngao ilak jingne lamme tahlak.

⁵Aope numan noksate onglakeih, üwangne hüke itüoh, ‘Tüopa noksa me chingmei ngohtüoh!’

⁶Hüyange tüopa nokme chingmeite kenpu kahta nyoipu ne mengma-a, numan-e phapu chingmei iman yome ngohne tamtüoh. Hüyangpoi tüone yejepe ngohma-a numan-e phayangpu chingmei salam ngaolan yah-e yeyah.

⁷Iman-e hanghe phalakei tüopa hahyinge numan tüopa nok ja me nyoitüoh; hangjingne nanpa ja te I nanmee phakülak. Nokja mepu nokja te ngao iye nyoijing leijeiye tahkem.

⁸Aope numan chingja te tailakei hüyange iman-e mongmei me yahküma-a, numan sheshao me hanghe phakülakei hahtüoh;

⁹tüopa chingshao me dakpalan meiye tamtüoh, hüyange tüomepu kahtalante hüke ngaotüoh, ‘Numan shong te owe Kahwang ahngching peiteki.’

¹⁰Hüyangpoi aope numan ching ja te peilakeih hüyange iman-e yeyah küma-a, lakke yengohpe linne taitüoh hüyange itüoh,

¹¹‘Numan yemeipu jingne numching tapla toman ya me neckpu nehoi konge tüohpuweih, hüyangpoi tüopa shingyah, Kahwang ahngching numan shongme peitepu!’

¹²Taowe numante ütingme inang ngaophün nyih me Kahwange tüopa chingshao phei-a Sodom chingnyu te shüpshe hüo külak!”

¹³“Onyukei, Korazin! Onyukei, Bethsaida! Hangjingne hanghe toi üyong numan yo me lingyangki tüopa Tyre hei Sidon me lingshihma-a, iman monnye inyange hüyange tapla phoyange üshong wantemuh mong lüpteiye ngoh hahshepu;

¹⁴Hüyangpoi ngaophün nyih Kahwange, nang phei-a Tyre hei Sidon lante sheyong she shüpshe hüolak.

¹⁵Hüyange Kapernaum, nang jingne wangdang ngoiye nang nying nyingke onghu nangkü a? Yeje, nang molovünte shuiye yelak!”

¹⁶Iye yoi pinlan te i, “Aoyinne numan ngao jai, iman-e üte jainang, aoyinne numan yeyah, iman-e Tao yeyah ja; hüyange aoyinne Tao yeyah, iman-e aowe Tao shon I yeyah ja.”

¹⁷Ye-onge mongmei puphei denyit me ni leih-e ye. Iman-e i, “Youngwanpa, aope toman-e nang min me ngaoyapeih ünu yaha hei laalan nehoi toman ngao jaipu ei!”

¹⁸Hüyange Jesuwe imante janne i: “Wang mepu satan wangphih langpu ke yüt-e tapu Taowe ngeki.

¹⁹Numan-e jaiyah! Pu hei toshitolao tangme kemlak hüyange wepalan wong üshei tangme kemyapoi, numante ma yephalak jingne Taowe numante wong phanang.

²⁰Hüyangpoi ünu yahalanne numan ngao jaiteki she mong tahmei; hüleima-a numan min wangdang me nyanyangpu jingne mongmei tüoh.”

²¹Tüopa hipak memuh Yaha Üjao kaiye Jesu mongmeiye maa hüyange hüke i, “Kahtok hei wangdang Youngwanpa, Taowe nang min yongnang, hüke kentamongtingpu hei shingeokpalan mepu tüolan toishao nange lowe ang hüyange tüolan-a naodak halante ütahte ngaitam; üting opa, hatüowa nange mongpuke ngoh.

²²“Üpawe üte üshei phünne phayangki: hüyange Ipa tokte kaiye aowe-o I ha aoshi yeshing, hüyange I ha hüyange I hawe aoyinte ngaiye hüohu iman tokte kaiye Ipa aoshi aowe-o yeshing.”

²³Tüophei me pinlan yete Jesu lüppe ye hüyange imante lowe i: “Numan-e ngeyangpu toi jingne, numan hangshin moimanpu!

²⁴Hangjingne numan-e hanghe ngeyangki, tüopa ngelak jingne Hipalan hei Ahnglan maawe ngang hüpoi ye-nge, hüyange numan-e hanghe jai tüopa jailak jingne ngang hüpoi iman-e yejai ok.”

²⁵Hüyange leihu, Ngaokeng shingpu kahta ja Jesu te tokke nyaolak jingne I tangte pei. Iye tong, “Konnyüopa” “Jintepu üyin tüolak jingne taowe hanghe linglak shi?”

²⁶Jesuwe Ite janne i, “Ngaokhüm me hanghe nyannangki? Hüyange tüolan-a nange hangke lüpnangki?”

²⁷Tüopa kahtawe janne i; “Nang mongjang üsheiye, hüyange nang üyin yaha üsheiye hüyange nang wong üsheiye, hüyange nang kenmong üsheiye nang Kahwang Youngwanpa te nange kentüoh, hüyange nang yupi te nangkih-e kenyah.”

²⁸Jesuwe Ite i, “Nange janpu shunang;” “Tüolan khakshuwe lingtüoh hüyange nang üyin ngohlak.”

²⁹Hüyangpoi ngaokeng shingpu kahtawe Iya shunang she teih, hüyange Jesute hüke tong, hüma-a “Ü yupi aoshi?”

³⁰Jesuwe janne i, “Kahta ja Jerusalem mepu Jerikho te laiwante, kuhpa ükhong ja ngaiye I pho hüyange shüt, hüyange pali she tüohyange tai.

³¹Hüyange tüo ngai, Ngengpa ja tüopa lamme laiwante ma yah yangpu kahta ja Iye nge, jaye kaome I linne tai.

³²Tüokih-e muh Levi ja tüopa lamme pei, ngeyange I-o jaye kaome linne tai.

³³Hüpoi Samaria kahta ja tüopa lamme muh taiwante tüopa kahta Iye nge, hüyange I mongjang me yeonge shüpsheye teih.

³⁴I shongte wen hüyange I me ngohpu minnga pho, hüyange wuwüngtiye malu, nyephinne nyeihtam, Iye yoi koipong tokme shotne tamyange lamtep (Yinnok) ngoine woiye tei hüyange Ite pao.

³⁵Üne nyih Iye nginmei (yanngin) khüo ni yah-e lamtep yompa te pha. Hüyange hüke i, ‘Tüopa kahtate nange paotüoh, I jingne nange hangshin ünyei winlakei, tüopa lamme tao nishe yewante shümlak.’ ”

³⁶Hüyange Jesuwe hüke tümme ngao, “Kuhpalanne shütpu tüopa kahta jingne tüolan naoshe lüm yo me ao yupi ne shemenglak she teihnangki?”

³⁷Ngaokeng nyüopawe janne i, “Aowe yayeng hüoyapeih tüopa.” Jesuwe janne i; “Nang taitüoh, hüyange tüo kih-e lingtüoh.”

³⁸Sha-a Jesu hüyange I pinlan iman lamme kemjang kemme taiwante, ching ja ngoiye pei, hüyange Marthawe I nok te Jesu nyik.

³⁹Hüyange Inao Mary she minpu ngoh, hüyange Iye Youngwanpa yashong me shotyange Iye nyüopu ngao jaiye ngoh.

⁴⁰Iye linglak toi maapu jingne Martha shangmu teiye ngoh; tüokhei yha wenne Ite hüke i, “Youngwanpa, ünaowe toi lili taowe minlingyah she angyange taipu nange shingya? Yeje, üte jamtüoh she Ite itüoh!”

⁴¹Hüpoi Jesuwe yhate ngaowe i, “Martha Martha! Toi maapu jingne nang shangmuwe mongshang nangki,

⁴²hüpoi ja hei wongpong üja. Mary-e shemeipupa leyangki, hüyange hatüopa yha mepu aope-o yetailak.”