Read Konyak Naga LUK 11 Bible Online

LUK 11 - Konyak Naga bible

LUK 11

¹Nyih ja nyoijing ja me Jesu yoppe ngoh. Aope Iye yoppu sho, I pinlan yo mepu shejawe Ite i, “Youngwanpa, John ne I pinlante nyüopu kih-e tomante-o yoplak nyüopha.”

²Hüwante Jesuwe imante ngaowe i, “Numan-e hüke yoptüoh: “ ‘Opa, Nang Üjaopa min yongning, nang ahngching peitampha.

³Nyihjeih toman-e hahlak yahkei;

⁴hüyange toman ünulan winyang pha, hangjingne aoyinne tomante ümeng ling, toman-e ümeng winnang. Hüyange toman-e ye-oklak tokpu pei ne tahtam pha.’ ”

⁵Hüyange Jesuwe I pinlante i, “Ipu ja me numan yo me ütam, phawo phatang me shümpa nok jate tai hüyange Ite ilak, ‘shümpa, an ütoi lüm ngoiye sea-tamkhu.

⁶Yin te kemme ngohpu ü-shümpa ja sha-a tenok ngoiye peiteki; hüpoi Ite phalak jingne ü me hango yenang!’

⁷Hüyange (teihpu ja me) nang shümpawe noksa me ngohyange, ‘Üte hango tah tongkei! Ta küpyangki, üha lan-o shiye kümteki hüyange tao-o shipuweih, hüyange nangte toi pha ne tao yelao oklak yang.’

⁸Hüke ima-a, hangke ilak? Taowe numante iphaning, Iya nang shümpa she teihyange laowe an yepha hulak hüyangpoi, nang tafün shong me yelakpe yong yange yupu jingne I hei lao külak hüyange nange hangshin wongpong ne meng, phakülak.

⁹“Tüokhei Taowe numante inang: Yutüoh, hüyange numan-e tüolak, yamtüoh, hüyange numan-e ngelak; kongtüoh, hüyange numante taküp epphalak.

¹⁰Hangjingne aoyinne yuyapeih iman-e tüonang, hüyange aoyinne yam nge nang, hüyange aowe konglakei Ite taküp eplak.

¹¹Numan yo mepu payong ütam-e, I hawe nyah yupute pu phalak ngohnang kü a?

¹²Yejema-a Iye awkek yupute toshitolao phalak a?

¹³Numan jaja shinne yemeiyapoi numan hayim lante toimei phalak shingküma-a; hüma-a wangdang me ngohpu üpawe Ite yupalante Yaha Üjao hangshin nyeiye phalak shi?”

¹⁴Ngao yengai okpu ngao-ükpa kahta ja mepu laa Jesuwe jang; aope I mepu laa yanne tai ngaopu ok. Jemme ngohpu kahtalan yeonge yashan;

¹⁵hüyangpoi iman yo mepu ütam-e, “Laa ahngpa Beelzebul-e I te jange winlak wong pha tüohpu üja she i.”

¹⁶Ülao lanne Ite tokhu; tüokhei, Kahwang mepu üja she hüowe tamlak jingne füo hüokei she i.

¹⁷Hüyangpoi iman juteih Jesuwe shing hüyange imante i, “Hanghepa ahngching yoi nying nyingke teitam yange hoklakei, jin yelaolak; noksa ja me teitampu ngaima-a shümnang.

¹⁸Tüokih-e kahshih ahngching me teitampu ngaiye iman hokma-a, hangke yonge ngoh oklak? Numan-e iyangki, Beelzebul-e wong phapu jingne Taowe laa jangpu ok.

¹⁹Tüokih-e Taowe jangpu ne mengma-a, numan kahtalan-e iman hangke jange ok? Numan kahtalanne saki phawe iyangki, nanga lanshe yeshu ja!

²⁰Hüpoi leihu, Kahwang yaklan kaiye taowe laa jangyangki, hüyange tüopa kaiye Kahwang ahngching numan me peiteki she hüonang.

²¹Aope wongnangpu kahta jawe yonglah tümyange Inok yomlakei, Inok toinyu nanha üshei yinnang.

²²Hüpoi aope I phei wong sheyongpu peiye shüm, lannang; hüyange nokpuwe monghümme ngohpu yonglah khongkümpu yahtai nang hüyange iman yo me tam yahnang.

²³“Ao üjingne yeje, ütingme ü-phei tüinang; hüyange aowe üjingne jamlakte yejam, ütingme Iye shaiye tamnang.”

²⁴“Aope kahta mepu ünu yaha yanne tailakei, hango yenangpu wanwüng kahmük me ngoilak nyoi yamme waa-e kemnang; hüke kemwante nyoijing ja nehoi yetüo yahma-a, yoi nying nyingke hüke inang, ‘Taowe angyangpu tenok te yelakei.’

²⁵Tüokhei leih yenang, hüyangpoi nok-a yeonge meiye jaowe shayange ngenang.

²⁶Aope hüke ngelakei, yanne taiye I phei shemengpu yaha nyit ngoiye woiye peinang hüyange iman tüome onge nyoinang. Tüokhei tüopa kahta-a üshong wante I ngohyangpu phei shemeng she üyin ngoh nang.”

²⁷Aope Jesuwe tüo ngao iye sho, ükhong yo mepu shekoja yong hüyange hüke ngaowe i, “Nang puhtampu naonyoi, hüyange nange hüppu düam moimanpupa!”

²⁸Hüyangpoi Jesuwe janne i, “Tüoleima-a, aoyinne Kahwang ngao jai hüyange jon tüolan hangshin mongmeilak!”

²⁹Aope yelakpe kahtalan Jesu tangte peiye ma hüwante Iye hüke ngaowe i: “Hatüo jin hangshin yemei yahpu: Kahnyingwüngha kaiye Kahwange mongpu she hüotam pha she iman-e yunang, hüyangpoi Jona tokte kaiye hatüo jinte kahnyingwüngha füo hango yehüolak.

³⁰Jona hipa Nineveh kahtalan jingne hangkih-e kahnyingwüngha füo ne meng, tüokih-e Kahta Üha hatüopa jin jingne füo ngohnang.

³¹Ngaophünpu nyih heye mepu ahngyha yonglak hüyange tüopa jin kahta lante ümeng phalak, hangjingne kahtoknyu ükümye mepu Solomon konngao jailak jingne yha kemyangki; hüyange Taowe numante inang, Solomon phei sheyongpu hatüo me ülam ja ngoh nang.

³²Ngaophünpu nyih Nineveh kahtalan yonglak hüyange tüopa jin kahtalan te ümeng phalak, hangjingne imante Jonawe nyüopu jaiyangki hüyange iman monglüp yangki; hüyange Taowe numante inang, Jona phei sheyongpu hatüome ülam ja ngohnang!”

³³“Vüntük pahyange aowe-o jaowe ye-ang yejema-a kümme küpyange ye-ang; hüleima peipu kahta lilite teelak jingne vüntük yongjing ken me angnang.

³⁴Numan mük-a püm jingne vüntük ja lenang; Aope numan müklan jaoshiye ngohlakei numan püm khongkümpu vüntee maalak; hüyangpoi aope numan müklan yemeipe ngohlakei, numan püm lanshe wangnyak me ngohlak.

³⁵Tüokhei kentingyah, hümma-a nang me ngohpu wangngai-a wangnyak me yengohlak.

³⁶Numan-e hüke lingma-a, numan püm lanshepu wangnyak üjingha nehoi yenangpe wangngai shaha maawe ngohlak, hüyange üshei yeme vüntük-e wangnyak yenangpe teepuke teelak.”

³⁷Aope Jesuwe ngao iye sho, Pharisee kahta jawe I phei jamme nük hahlak jingne nyik; tüokhei I onge nük hahne shot.

³⁸Nük hahshao me yaktuh ne Jesuwe yeng yeyupute Phariseepa yashan.

³⁹Hüwante Youngwanpawe Ite i: “Sha-a numan Phariseelanne wan hei sheng ütah waonang; hüyangpoi (numan) ümong ye-a ünu ümeng hüyange hahnyak puwe maawe ngohnang.

⁴⁰Numan üngapalan! Ütahye lingpu Kahwange ümongye-o lingpu yejepu a?

⁴¹Hüyangpoi numan wan hei sheng me hanghe ngoh, toiha lante phatüoh, hüyange numan jingne lampheli jaolak.

⁴²“Phariseelan, numan jingne onyukei! Hangjingne numan-e (peng üla pongpu lep iye Kahwang te hah hei ying penphong dopu) hüngngan hei hoinge hüyange ülao hoiyak laipha phanangki; hüyangpoi numan-e Kahwang te kenlak hei ngaoting ilak mongme ye-ang. Ülaolan yelingpe angne yetampe numan-e tüolan khongkümpu linglak yang.

⁴³“Phariseelan, numan jingne onyukei! Numan-e synagogue me shotjing tünne anglak te ken, hüyange hatleih nyoi me numan te salam minphakei she teih.

⁴⁴Numan jingne onyukei! Hangjingne ümee yehüopu mangjongke, mangjong she yeshingpu jingne tüopa tangme kahtalan kemnang, numan tüopa mangjong lenangki.”

⁴⁵Hüwante Ngaokeng nyüopu kahta yo me jawe Ite i, “Konnyüopa, aope nange hüke iyapeih toman te-o omme teenangki!”

⁴⁶Jesuwe janne i: “Ngaokeng nyüopalan numan jingne-o onyukei! Numan-e ki ne ye-okpu hanggee yih kahtalan tokme kine tam, hüyangpoi numan-e tüopa hanggee te jamlak jingne numan yaklan nehoi yelan.

⁴⁷Numan jingne onyukei! Numan-e hipalan jingne mangjong ümei ling; tüolan hipa-a numan puyimlan nemuh toi.

⁴⁸Numan nying nyingke numan puyimlanne lingpu toite monghah-e teih: hangjingne iman-e hipalan toi hüyange numan-e iman mangjong ling.

⁴⁹Tüojingne Kahwangpa konjonge hüke inang: ‘Taowe iman tangte hipalan hei shongshonpalan shonlak; tüolan yo mepu iman-e ütam toilak hüyange ütam shoshiyali ne tamlak.’

⁵⁰Tüokhei kahtoknyu linge wangpu mepu tenyih ngoipu hipalan toipu jingne tüohipak mepu kahtalan shaoshi ne tamlak.

⁵¹Abel toipu mepu Zekharia toipu ngoiye ao wümjong mepu üjaopa nyoi tüo nipa nyoi me toi. Ütingme Taowe numante inang, tüolan khongkümpu jingne tüopa jin mepu kahta lili shaoshi ne tamlak!”

⁵²“Ngaokeng nyüopalan, numan jingne onyukei! Hangjingne numan-e konjong yüpmee yahtei; numan onglak jingne yeteih, hüyange aoyin ümong te onghuwe ngangya peih tüolan jingne-o numan-e lat yange ang!”

⁵³Aope Jesuwe tüopa nyoi angyange tai, ngaokeng nyüopalan hei Phariseelanne ülam lili mepu ümeng phowe Ite shümlak jingne ükong wang;

⁵⁴I ümeng pholak tüntün hüyange ülam ja me nehoi püohküma-a pholak she tüm.