Read Konyak Naga LUK 12 Bible Online

LUK 12 - Konyak Naga bible

LUK 12

¹Aope kahta haja mawe eiha yate teilokke shüppe jem, Jesuwe yoi pinlan te üwangne hüke i: “Jutok meipa Phariseelan do jingne numan kenting yah.

²Hangheyin büange angyapeih yebüang pune menglak, hüyange lowe angpu üshei shinglak.

³Tüokhei, wangnyak me numan-e hangyin ngaoyapeih, khongkümpu wangngai me jailak, hüyange numan-e tüpsa mongme kahtalan na me ngaolo hangshin ngaoyapeih, noktok me üngwünne ngaowe jailak.”

⁴“Shümpalan, Taowe numante iphaning, aowe püm toinang hüyange tüophei me hango lingpu ye-ok imante tah nyam.

⁵Hüpoi aote nyamlak Taowe numante hüopha ning: toiyang phei me molovünte toonne shüppe oklak wong ngohpu Kahwang te numan nyamtüoh. Ütingme, Taowe numante inang, Ite nyamyah!”

⁶“Poisa ni te, awhao nga yeyao a? Üting iman yo me ja nehoi Kahwange yepe.

⁷Tüoleima nang shang me ngohpu shangmin nehoi khongküm iyange ngohnang. Tüokhei tahnyam: Awhaolan maapu phei numan sheyongpupa!”

⁸“Taowe numante iphaning: aoyinne kahtalan sheshao me ümeng janyapeih tüopa jingne, Kahta Ühawe-o Kahwang shongmokpalan sheshao me hüke ümeng janlak.

⁹Hüyangpoi aoyinne üjingne mengyang pheite ükhong sheshao me yejanlakei, Kahta Ühawe-o Kahwang shongmokpalan sheshao me yejanlak.

¹⁰“Aowe Kahta Üha phei tüi-e ümeng ngaolakei ümeng wintampu oklak; hüyangpoi aowe Yaha Üjao phei tüi-e yaolepu ngaolakei ümeng yewinlak.

¹¹“Aope iman-e numan ngaophünlak jingne synagogue te yahpeilakei yejema-a ahngpalan shaome yejema-a wanglam lampalan shaome, peilakeih, numan hangke yinlak yejema-a hang ilak mong tahshang.

¹²Hangjingne tüopa hipak me nange hang ilak Yaha Üjaowe nangte nyüopha lak.”

¹³Ükhong yo mepu kahta jawe Ite hüke i, “Konnyüopa, tomni jingne angpu mothlei ü-phei tamtüoh she üjei te itüoh.”

¹⁴Jesuwe Ite janne i, “Kahta, nang nipa me mothlei tamlak yejema-a ngaophünlak wong üte aowe phapu?”

¹⁵Hüyange iman üsheite Iye hüke ine wang: “Ütuh ümeng peilak üshei mepu numan nying nyingke tükyah; hangjingne ja ja shinne I hakyapoi, ütingpa kahta üyin-a I me nangpu toinyuwe lingpu yeje.”

¹⁶Tüophei me Jesuwe imante tüopa ngaolep i: “Kahmük mepu hakpa kahta jawe yeonge deiha liha meipu kahtok ümei ngoh;

¹⁷Iye yoi mongme hüke teih-e i, ‘Taowe hang linglak shi? Hangjingne teshinpu tah anglak nyoi taowe teih-e yetüo.

¹⁸Iye yoi nying nyingke hüke i: Taowe bung ülangpa pünlak hüyange sheyong she ja welak, hüyange tah hei ülao hahying hüyange ülao toinyu nanha tüome anglak.

¹⁹Tüophei me taowe ü-yaha te ilak; shaomeipa! Wangpeng nangjangpu jingne nange lengpu lamphe li wangmanne ngohnangpu, üyin jingne mong tahshang, hahtüoh, yingtüoh; hüyange nang nying nyingke mongmeiye ngohtüoh!’

²⁰Hüyangpoi Kahwange Ite i, juteih yenangpu kahta! Teyapu wangnyak mongme nang yaha phei yanlak; hüma-a nang jingne nange tümme angpu moth khongkümpu ao jingne menglak?”

²¹Hüyange Jesuwe ngaotümme i, “Hatüo te leiyah, yoi hakehelak hei moth jüolak jingne man, hüyangpoi Kahwang sheshao me iman hakpa ne yemeng.”

²²Tüophei me Jesuwe pinlante i: “Tüokhei Taowe numante inang: Numan üyin ngohlak jingne hahying hangke tüolak, yejema-a püm jingne nyemo hangke tüolak she mong tahshang.

²³Hangjingne üyin-a hahying phei sheyongpu hüyange pümma nyemo phei sheyongpu.

²⁴Khawang lante leitüoh: Iman-e üli yedei yejema-a tah yewet; iman-e anglak nyoi yejema-a bung yeli: tüoyangpoi Kahwange iman tamnang! Hüma-a numan-a awhalan phei hangshin sheyongpupa!

²⁵Numan yo me aowe Iye jamloi teihpu jingne she, üyin jinte yakkong ja nehoi paopu oklak?

²⁶Numan-e üjinghapu jingne nehoi teihpu yeman ma-a, ülao toi jingne hangne mongshang nangki?

²⁷Shengshap jupenglan hangke jong leihu: Iman-e toi yeling yejema-a nyemo yetak. Hüyangpoi Taowe numante ipha ning, Solomon jaja shinne I müktishiwa shemei yaomapu ngohyapoi, tüolan jupeng yo mepu ja phei nehoi yephin ok.

²⁸Hüpoi hüng hei jupenglan tenyih ngohyange ngainyih kui mahlak hüyange vün me jakke winlak, tüolan shemeiye tampuwa Kahwang. Numan üjingha üting lakpalan! Ütingme shemeipupa nangte inne tamlak I yeje a?

²⁹Tüokhei, numan-e hanghe hahlak hanghe yinglak tüo shaha teihye mong tah shang.

³⁰Hangjingne kahtoknyu me ngohpu jatli üsheiye jinte tüo shaha teihnang; hüyange numan üpawe numan wongpong lili shingnang.

³¹Hükih-e mongshange yengohpe, üwangne nang üyin me I ahngching yamtüoh, hüyange nange lengpu tüolan lili Iye yahphalak.

³²“Nyamme tahteih, ükhong üjoiha! Hangjingne numan üpawe numante Ahngching phalak monge ngohnang.

³³Numan jing hanghe ngohyapeih üshei yüotüoh hüyange toihalan te ngin phatüoh. Yemenglak nyekhok numan jingne tümyah, hüyange wangdang me numan moth yinne angyah, ümeken me shoi üye hüyange kuhpalan yepei ok, hüyange mütte yemeng ok.

³⁴Hangjingne ümeken me numan moth ngohlakei tüoken me numan mongjang-o jinte ngohlak.”

³⁵“Hanghe peikülakeih numan tümyange ngohyah. Shieng me numan inkhek mongjüonge hityah, hüyange numan vüntük pahyange ngohyah.

³⁶Nokyam mo mepu iman nokpu yekülak nanpa lanne tanpuke; hüyange aope I ye, hüyange taküpte kong, I jingne iman-e mamshe taküp eppetampu ke numan tümme ngoh yah.

³⁷Iman nokpu peishao me tümyange tanne ngohpu shaoshanpalan hangshin mongmei lakshi? Taowe numante ipha ning, mamshe Iye yoi shienghit hitlak, iman shotne tamlak, hüyange I yayonge imante namnolak.

³⁸I wangnyak üwo yejema-a tüophei nehoi shonne peikülak she teihyange tümme tanpalan Iye ngewante iman jingne hangshin mongmei lakshi!

³⁹Hüyange tüo teih-e tüoyah: Kahta jawe Inokte kuhpa aope peikülak shingshih ma-a, I yeshipe ngohlak hüyange kuhpawe I nok mengne yetamlak.

⁴⁰Tüokhei numan-o tümyange ngohyah, hangjingne numan-e yeteih tüopu hipak ja me Kahta Üha peikülak.”

⁴¹Peterwe i, “Youngwanpa, nange tüopa ngaolep-a toman te ipu heiya, kahta lili jingne ipu shi?”

⁴²Young-wanpawe janne i, “Hüma-a ütam, monghahpu yejema-a konngao pheipu shaoshanpa ngohnang kü a? Noksa woilak hüyange hipak khakshuwe ülao nanpalan te iman hahying phapa ne yoi nokpupawe, yakjongpa ne menge tamlak I ne ngohkülak.

⁴³Aope nokpupa yoi nokte yewante hükihpu toilinge ngohpu shaoshanpa jingne hangshin mongmei lak!

⁴⁴Yephah lahpe Taowe numante inang, nokpupawe yoi moth tangme yakjong pa ne tüopa shaoshanpa angkülak.

⁴⁵Hüyangpoi, ‘Ü-nokpupa yelak jingne hipak nangjange yahnangki’ she teihyange ao shaoshanpawe ine yong hüyange ülao shaoshanpalan sheko hei netan te shütne lük, hüyange hahying yange jok;

⁴⁶hüyange shaoshanpawe nokpupa yekülak she yeteihtüopu hüyange yeshingpe ngohwante nokpupa peilak, hüyange I te shaoshi phalak hüyange ngao yejaipalan meitam phei jamme I ange tamlak.

⁴⁷“Shaoshanpa aowe I nokpupawe lingne tamhupu toi shing, hüyangpoi I yetüm okpe ngoh, hüyange I nokpuwe yah hupu yeling, Ite yemeipe nangjange shüt-tamlak;

⁴⁸hüyangpoi shaoshanpa aowe yoi nokpupawe lengpu yeshing, hüyange toi ütam linge Iye shaoshi tüolak wange ngohma-a tüopa jingne I-a meiyange yeshangpe shaoshi ne tamlak. Kahta aote sheyong she pha, I mepu sheyong she kanglak; Kahta aote sheyong she phayangki, I mepu sheyong she wongpong.”

⁴⁹“Tao kahtoknyu te vün ngaine pei, hüyange tüopa pahteiye ngohshihma-a hangshin meihah shepu!

⁵⁰Taowe baptipu tüolak ngohnang, hüyange tüopa manlin manlin Tao hangshin shanglak!

⁵¹Kahtoknyu te chingmei peilak jingne Tao pei she numan-e teihnangkü a? Taowe numante inang, chingmei yeje hüpoi yanne tamlak jingne.

⁵²Sha-a me peiye kahta nga ngohpu noksa, lüm phei tüi-e ni, ni phei tüi-e lüm she tampu ngailak.

⁵³Payonglan-e iman-e hayim phei tüi-e, hüyange hayim lanne yoipa phei tüi-e nyuyong lanne yoi sheko hayimlan phei tüi-e, hüyange sheko hayim lanne nyuyonglan phei tüi-e; yoi nyeiye nyemnyalan phei tüi-e hüyange nyemnya lanne yoi nyeilan phei tüi-e.”

⁵⁴Hüyange Jesuwe banghalan te-o i; aope numan-e henyip yemepu wangphom ngaipu ngelakei, mamshe waikeilak yang she numan-e inang, hüyange ütingme waikei nang.

⁵⁵Hüyange aope heye mepu wangyang polakei, tenyih yeonge shemme wangmei lakyang she numan-e inang, hüyange ütingme wang meinang.

⁵⁶Jutok meipalan! Numan-e kahtok hüyange wang te leiyange itte shempu oknang, hüpoi hangne numan-e sha-apu juwan jeng itpu ye-okpu?

⁵⁷“Hüyange ütingpa ngao phünlak jingne numan-e yoi manmanke hangne yeling okpu shi?

⁵⁸Kahta jawe ngaokeng phei I shuwe ngohyange hüyange nang phei teingaolak jingne ngao phün jingte woiye teima-a, kemwante ilak ngao lili showe lanlak jingne okpu shinne I phei ngaowe sholak jingne ngangtüoh; hümme nakshih Iye ngaophünpalan shaome nang shüppe yetamlak; yejema-a ngaophünpalan-e shapalan te nang phünne phakülak, hüyange shapalanne nang shapu nok me angkülak.

⁵⁹Taowe nangte inang, nange ükümpa poisa panne manpha manpha tüomepu nang yengai oklak.”