Read Konyak Naga LUK 13 Bible Online

LUK 13 - Konyak Naga bible

LUK 13

¹Tüohipak me kahta ütam tüome ngohyangki aowe Galileelan iman Kahwangte dopu phawe ngohwante Pilate toi, tüopa jeng Jesute i.

²Jesuwe imante janne i: “Tüolan Galileelan hüke toipuwa, ülao Galileelan phei iman ünu shemeng she ngohpu jingne she numan-e ipu oknang kü a?

³Yeje! Taowe numante inang numan-e numan monglüppe ünulam mepu yejeileima-a, numan üshei iman kih-e lilak.

⁴Yejema-a Siloam me longnok toiye tapuwe iman penme tet toipu hangke teih nangki? Tüolan-a Jerusalem me ngohpu kahtalan üshei phei shemengpu jingne she numan-e teihnangkü a?

⁵Yeje! Taowe numante inang, numan-e numan monglüppe yejeileima-a numan üshei iman lipuke lilak.”

⁶Tüophei me Jesuwe imante tüopa ngaolep i: “Kahta jawe I wulick kahme phukpee ja deiyange ngoh. Tüopa phukpee me phuklick ngohlak she teihyange I pei hüyangpoi hango yenangpe ngoh.

⁷Tüokhei Iye pesha hampa te i, ‘Leitüoh, tenyih wangpeng lüm ngoiye tüopa phukpee me phuklick tüolak she teih-e tao pei hüpoi ja nehoi taowe ye-nge. Kahtok ümei jajang jawe winne hangne tüopa pee jongne tamlak shi? Akke wintüoh she i!’

⁸Hüpoi pesha hampawe janne i, ‘Üyongpa, wangpeng ja jingne hüke angne tampha; taowe pejüng nyeiye kahshao yange kahtok üyao shokke tamhahma.

⁹Tüophei me ngaiwang ülick lickküma-a yeonge meilak; tüote yelick küma-a nange akke winlak.’ ”

¹⁰Sabbath ja me Jesuwe synagogue me konnyüowe ngoh.

¹¹Ünu yahawe ompu sheko ja, hanghe kaiye yha wangpeng penme tet ngoiye dakne tam yha-o tüopa me ngoh; yha kokke mengteiye yoi nying nyingke yeyong okpe ngoh.

¹²Aope Jesuwe yha nge, Iye nyik-e i, “Shekonyu, nang daktin mepu nang lannang!”

¹³Hüyange Iye yoi yakke yha te jon hüyange mokh she shekonyu yongpu ok, hüyange yhawe Kahwang minyong.

¹⁴Hüpoi Sabbath me Jesuwe dak meiye tampu jingne synagogue nokpupawe mongshih ngai hüyange yonge kahtalante hüke i, “Teman-e toi linglak jingne nyih wok ngohnang: tüolan mongme peikei hüyange dak meiye tamtüoh, hüyangpoi Sabbath me yeje!”

¹⁵Youngwanpawe Ite hüke janne i, “Numan jutok meipalan! Numan üsheiye Sabbath me numan mahu hei gado iman khok mepu yeng yingne lanne yeteitam a?

¹⁶Sha-a tüome Abraham üli mepu kahshih-e wangpeng penme tet jingne shayange ang; Sabbath me yha shapu mepu yelanlak a?”

¹⁷Iye janpu ngaome I phei wepa ne ngohpalan üshei wüone tam, hüyangpoi yashanyalipu toi jingne ülao lan-a yeonge mongmei.

¹⁸Hüwante Jesuwe i: “Kahwang ahngching hanghe lenangki? Tüopa-a Taowe hanghe phei phinlak?

¹⁹Hatüowa yanhoi li lenang; kahtawe tüopa üli yah-e inok kah me dei; tüopa üli phaowe pee ne jong, hüyange wang awha lanne üqui yinme iman ülüp ling.”

²⁰Nishe Jesuwe tong: “Taowe hanghe phei Kahwang ahngchinga phinlak shi?

²¹Hatüowa sheko jawe do yahpuwe kümha lüm anphei nyityange bunge manngai manngai angpu lenang.”

²²Jesuwe chingnyu chingha üshei kaiye konnyüojang nyüowe Jerusalem yete leihye.

²³Hüwante kahta ütamme Ite hüke tong, “Konnyüopa, kahta üjingha hei yinlak yangno?” Jesuwe imante janne i:

²⁴“Taten jonghitpupa kaiye onglak jingne nange okpu shinne toimei lingtüoh; hangjingne, Taowe numante inang, kahta maawe tüopa taten kaiye ongne nganglak hüpoi ye-oklak.”

²⁵“Aope tüopa noksa mepu nokpupa yonge hüyange taküp küplak, tüohipak me numan nokshao me yonge ngohlak hüyange taküp te kongjang konge hüke ilak, ‘Üyongpa, toman jingne taküp eppha!’ Iye numante janne ilak, ‘Numan ü-mepu peipuweih taowe yeshing!’

²⁶Tüohipak me numan-e hüke janne ilak, ‘Nang phei toman jamme hahyinge ngoh: hüyange tomching me nange konnyüo yangki!’

²⁷Hüpoi Iye üne-o ilak, ‘Numan ü-mepu peiyapeih taowe yeshing, numan ünu lingpalan üshei, ü-mepu yantepha!’

²⁸Hüke aope numan nokshao me angwante numan-e Abraham, Isaac, hei Jacob hüyange hipalan üshei Kahwang ahngching me ngelakei, numan shappu hüyange fa ngaopu hangshin menglak!

²⁹Hüyange wanghe ongjing hei nyipjing mepu, hüyange apye hei heye mepu kahtalan peilak hüyange iman Kahwang ahngching lengjong me shotlak.

³⁰Tüohipak me sha-a aoyin ükümpane ngohyapeih iman üwangpa ne, hüyange sha-a aoyin üwangpa ne ngohyapeih iman ükümpa ne menglak.”

³¹Tüohipak memuh Phariseelan ütam pei hüyange Jesu te hüke i, “Nang tüomepu yantüoh hüyange ülao kente taitüoh; hangjingne Herod-e nang toihu nangki.”

³²Jesuwe imante i: “Taiye tüopa hiyante itüoh: ‘Taowe tenyih hei ngainyih mongme ünu yahalan jangnang hüyange dakpalan meiye tamnang; hüyange nyih lüm shepu me Taowe ütoi sholak.’

³³Hüyangpoi tenyih, ngainyih, hüyange hümnyih, Tao ü-lam me ngohlak; Jerusalem tokte kaiye ümeken me-o hipa ja toilak hipak manngoi.

³⁴“O Jerusalem, Jerusalem! Nange hipalan toi, Kahwange nang tangte shonpu shongshonpalan nange longe shüppe toi! Awnyuwe ühalan yoi yangphang me küwpuke numan khongkümpu ü-phak mongme hangshin anghah she! Hüyangpoi nange yemong:

³⁵Sha-a numan nok wüngmakke angpha lak. Taowe numante ipha ning, numan-e Youngwanpa min me ao peiyapeih Ite Kahwange moimantüoh she man i man i, numan-e Tao ye-ngelak.”