Read Konyak Naga LUK 14 Bible Online

LUK 14 - Konyak Naga bible

LUK 14

¹Sabbath nyih ja me Phariseelan üjengpa nokte nük hahne Jesu ong; hüyange kahta lanne Jesute kentinge leiye ngoh.

²Hüwante ya hei yak khongkümpu peak-e dakpu kahta ja Jesu tangte pei,

³hüyange ngaokeng nyüopalan hei Phariseelan te Jesuwe ngaowe i, “Sabbath me dakpu meiye tamlak teman ngaokeng me büangya?”

⁴Hüyangpoi iman-e yejan. Jesuwe tüopa kahta te jon, hüyange meine tamyange I teine tam.

⁵Tüophei me Iye imante i, “Numan yo me Sabbath me numan hayim yejema-a mahu yengnung me yeiwante mamshe yetoonlak ngohya?”

⁶Hüyangpoi iman yo me I ngao te janpu aowe-o ye-ok.

⁷Sha-a yinpalan ütam-e nyoijing shemei meipu lepu Jesuwe nge; tüokhei Iye iman üsheite tüopa ngaoleppu i:

⁸“Aope kahta ütam-e nokyam mo te nang nyiklakei, nyoijing shemeipupa me tahshot. Hangjingne nang phei sheyongpu kahta ütam te-o Iye nyik-e ngohne ok,

⁹hüyange yinnokpu aowe nang ni moini te nyik, I yupuwe hüke ine ok, ‘Tüopa nyoi Ite phashih.’ Tüohipak me nang wüolak hüyange nyoijing shemengpu nyoi me nang shotne peikülak.

¹⁰Hüleima, aope nang nyik phalakei, peitüoh hüyange shemengpu nyoijing me shottüoh, tüohipak me yin nokpupa nang tangte peilak hüyange hüke iphalak, ‘Kei shümpa, nyoijing shemei pupa me ongkei.’ Tüopa kaiye peiye ngohpu yinpalan üshei sheshao me, nang sheta ngaai tamlak.

¹¹Hangjingne aowe yoi üyongpa ne menghu yapeih I yoi manmanke inne nyailak yang, hüyange aowe yoi manmanke inne nyai, üyongpa ne menglak.”

¹²Tüophei me Jesuwe Ite nyikpu yinnok te hüke i: “Aope nange mo linglakei, nang shümpalan, yejema-a nang jei heinaolan, yejema-a mata tongning, yejema-a hakpalan tah nyik. Hangjingne imane-o einan shümlak jingne nyik phalak, tüokaiye nange winyangpu shinne shümpu tüonang.

¹³Hüpoi aope nange mo linglakei, toihalan, yakok yakfaipalan, hüyange mükmüo napanpalan nyiktüoh;

¹⁴hüyange nang moimanlak; hangjingne iman-e nangte shümme yepu ye-oklak, hüyangpoi aope khakshupu kahtalan lipu mepu yange yelakei Kahwange nang te shümme yephalak.”

¹⁵Aope khao me shotte ngohpu kahta jawe tüopa ngao jai, Iye Jesute hüke i, “Kahwang Ahngching lengjong neikonne shotlaklan jingne hangshin mongmeilak!”

¹⁶Hüpoi Jesuwe Ite janne i, “Kahta ja ngohyangki, aowe mo üyong tüm hüyange kahta maawe nyik.

¹⁷Mo hahlak hipak me Iye shaoshanpalan teiye yinpalan te hüke i, ‘Jemkei, khongküm tümteki!’

¹⁸Hüyangpoi iman üsheiye ja phei me ja, japhei me ja she nan yengai okpu jeng i: Üwangpawe shaoshanpate i, ‘Taowe kah ja shakki, hüyange tüote leine talak yang; ye-om okpu jingne ümeng winkhu.’

¹⁹Japawe hüke i, ‘Taowe kahhamlak jingne mahu üpong tongtoi nishep nga shak yangki, iman jonshao shaowe ngohnangki, ye-om okpu jingne ümeng winkhu.’

²⁰Ülao jawe i, ‘Tao ü-o-we nok yamyangki, tüo kaiye yepei oklak yang.’

²¹Shaoshanpa leihye hüyange nokpupa te tüolan khongkümpu i. Mo nokpupa meiyange mongmeng hüyange I shaoshanpa te kange i, ‘Mamshe yayonge chingyang hei lamnyu üshei yete taitüoh, hüyange toihalan, yafai yakkokpalan, hüyange mükmüo napanpalan woiye peikei.’

²²Tüophei me mamshe shaoshanpawe i, ‘Üyongpa, nange ipu kih lingyangki, hüyangpoi nyoijing üne-o nangjange ngoh nangki.’

²³Tüokhei nokpupawe shaoshanpa te i, ‘Chingkeng lamnyu yete taitüoh, hüyange kemme yonge hüopu üshei aiye yetüoh, hüyange tenok maane tamtüoh.

²⁴Hangjingne taowe nangte inang, mo te nyikyangpulan ao te-o ü-mo te jüpne yetamlak!’ ”

²⁵Tüophei me Jesu pheite kahta üngang woiye tai, iman yete Jesu lüppe ye hüyange hüke i,

²⁶“Aowe ü-phei te woiyapeih Iye yoipa hei yoinyu, yoi shekonyu hei hayim, yoi jeihei nao hei nyahei naolan, hüyange yoi nying nyingke nuwe yeteihma-a I-a ü pinne yeje oklak.

²⁷Aoyinne yoi tangpem paiyange ü-pheite yewoi, I ü pinne yeje oklak.

²⁸Leppu ja me numan yo me ütam jawe longnok wehuma-a, üwangne I shotyange hangshin mahlak teih-e nyaonang, hüyange toi showe oklakne I me ngin wange ngohyashi leinang.

²⁹Hatüokih yejema-a, nokjing linge wangyange longnok yeshope tüohpu ngewante hang ngailak! Leiye ngohpu kahta üsheiye Ite nyilak.

³⁰‘Tüopa kahtawe nok we ne ükong wangyange yeshope tüohnangki!’ she iman-e ilak.

³¹“Yejema-a aope ahngpawe kahta haja pen hei woiyange hokne taiwante, ülao ahngpa ja kahta haja da woiyange I phei hokne peipu jaiwante, tüolan phei Iye woipu kahtalan hokpu oklakne wong ngohyashi she shotyange teih-e yeleilak a?

³²Iye ye-oklak ne teihyama-a, ülao ahngpa maolao me ngohwante muh, chingmei ne menglak ngaolan yahyange lampu shonne teilak.

³³Tüophei phinne Jesuwe hüke ngao tümme i, ‘Nangme ngohpu üshei angyange ü-phei te yewoima-a ü-pin ne yemeng oklak.’ ”

³⁴“Hüm yeonge meinang, hüyangpoi I me ngohpu üwüng mahküma-a hangke iye wünge tamlak?

³⁵Shaaji hatüowa kahtok jingne-o yejema-a kahyao shokpu nyoi jingne-o meipu ne yeje, kahtalanne hatüo winnang. “Aoyin me jailak jingne na nyim, iman-e jaiyah.”