Read Konyak Naga LUK 15 Bible Online

LUK 15 - Konyak Naga bible

LUK 15

¹Sha-a kahngin shaipalan hüyange ünulan maawe Jesuwe nyüopu jailak jingne jem.

²Pharisee hüyange Ngaokhüm nyüopalanne ngu ngu she i, “Hatüo kahtawe ünulan peine tam hüyange iman phei hah nehoi hah nangki!”

³Tüokhei Jesuwe tüopa ngaolep imante i:

⁴“Ipu ja me numan yo me ütamme nyee ghoja ngoh, hüyange ja mahma-a, Iye hang linglak shi? Iman ngohjing me detu metu angyange mahpu ja mantüo mantüo yamme tailak.

⁵Aope Iye tüolakei, Iye mongmeipu phei yoi phak tangme painang,

⁶hüyange yoi nokte yah yenang. I shümpalan hüyange yupilan nyik-e jemnang. Iye imante ngaowe i, ‘Ü-phei mongmei tüoh, hangjingne mah-e ngohpu ü nyee tüoteki!’

⁷Taowe numante ipha ning, tüokih-e shaaji monglüppu wongpong ne yejepu detu metu angyange, aope ja ünu mepu monglüppe peilakeih I jingne wangdang me mongmei üyong ngohlak.

⁸“Üne-o ipu ja me sheko ja me nginmei khaopen ngohpu yo mepu ngin ja mah küma-a yhawe hanglinglak shi? Yhawe yoi vüntük pahlak, kenting puphei mak moijang moiye mantüo mantüo kenphe me yamlak.

⁹Aope yhawe tüolakei, yhawe yoi shümnyulan hüyange yupilan nyiklak. Yhawe imante ilak, ü-phei mongmeitüoh, hangjingne taowe meiyangpu ngin tüoteki!”

¹⁰Taowe numante iphaning, tüokih-e monglüppe peipu ünu ja jingne Kahwang shongmokpalan mongmei nang.

¹¹Jesuwe yelakpe ngaowe i, “Kahta jawe yoiha ni ngoh.

¹²Naolipawe Ipate i, ‘Opa, nangtoi yo mepu üjing meitam sha-a yahkei.’ Tüokhei payongpawe yoiha ni yo me yoi yoi meitam tamme pha.

¹³Nyih üten ja ngohyange, naolipawe yoi meitam khongküm yaoyange, ngin kiyange nok mepu yanne tai. I maolao kahmükte tai, hüyange yepah yewai toime I ngin üshei winne küm.

¹⁴I me hanghe ngoh, üshei winne küm. Tüophei me tüopa kahmük me seanyao yengle üyong pei, hüyange I me hango yenangpe kümme yüo.

¹⁵Tüokhei tüopa kahmük me ngohpu nyupuh kahta ja phei I ngoh ne pei, aowe ak yomlak jingne yoi kah yete I shonne tei.

¹⁶Hüwante akke hahpu phengshoppe nehoi I moh ne tamshiphang she teih, hüyangpoi aowe-o hango yepha.

¹⁷Üküm ne I menghawe ye, juteih ümei peiyang phei me hüke i, ‘Üpa nokme nanpalan üsheiye iman-e hahyange towe ngoh nang, hüyangpoi taowa tüome seanyaowe lilak yang!

¹⁸Tüomepu tao yonglak hüyange üpa tangte yeye hüke ilak, Opa, taowe wangdang phei tüi-e hüyange nang sheshao me ünu jonyangki.

¹⁹Shaaji taowe nangha she nyikne yewang; nang nanpa ja leye tao jonyah.’

²⁰Hüyange I yayong, hüyange yoipa tangte leih ye. Hüpoi I üjai me nok ngoine man o pe ngohwante Ipawe I nge; I mongme yeonge yayenge lei, hüyange phette yuwe Iha üngme ken, hüyange om hüp.

²¹Hüyange I hawe i, Opa, ‘Taowe wangdang hüyange nang phei tüi-e ünu lingyangki. Shaaji tao nangha she nyik ne yewang.’

²²Hüyangpoi Ipawe shaoshanpalante nyik hüyange i, ‘Mamtüoh, Shemeipupa inkhek peikei, I yaklan me shüptet hüyange ya me yashom o ne tamtüoh.

²³Taiye panne angpu mahu üha peiye toitüoh; hüyange teman-e mo mo ne tümtüoh.

²⁴Hangjingne tüopa üha liye ngoh, hüpoi sha-a yange yeteki; I mah-e ngoh, hüpoi sha-a I tüoteki.’ Hüyange iman mo ükong wang.

²⁵“Tüohipak me, Iha jeiyongpa-a kahme ngohyangki. Aope I kah mepu ong, hüyange nokte owe pei, hemlokke mong ong monglepu Iye jai.

²⁶Iye shaoshanpa ja nyik-e yüowe hüke tong, ‘Hanghe ngaipu shi?’

²⁷Shaoshanpawe janne i, ‘Nangnao yeteki, hüyange I yemahpe leih yepute mongmeiye nangpawe panne angpu mahu üpong shenütpupa ja toiküja.’

²⁸Ijei yeonge mongshih ngai hüyange noksate min ong she yonge ngoh. Tüohipak me Ipa yuwe noksate onglak jingne yoppe tong.

²⁹Hüpoi Ipate Iye janne i, ‘Leitüoh, wangpeng teshinne taowe rha ja leye nangjing ne toi ling, hüyange ja me nehoi nang ngao yejaipe yengoh. Nange üte hanghe pha ei? Ü-shümpalan phei mongmei ne nange üte younha ja nehoi yepha!

³⁰Hüyangpoi, tüopa nang hawe toinyu nanha lili I phwngngampu me winne küm, hüyange aope I leihye, nange panne angpu mahu üpong toi!’

³¹Ipawe janne i, ‘Üha, nanga wangpangpu te nokme ü-phei ngohnang hüyange üjingne ngohpu khongkümpuwa nang jing.

³²Hüyangpoi nangnao jingne mongmei mo molak wongpong, hangjingne hatüo nangnao liye ngoh hüyangpoi sha-a I yange ye-e ngohnang; I mah-e ngoh, hüyangpoi sha-a I tüoyangpu.’ ”