Read Konyak Naga LUK 16 Bible Online

LUK 16 - Konyak Naga bible

LUK 16

¹Jesuwe I pinlante hüke i, “Hipak ja me hakpa kahta ja ngoh hüyange yakjongpa ja ang, hüyangpoi yakjongpawe nang ngin winne kümnangki she hakpate ngao pei.

²Hüwante Iye noksate I nyik-e peiye hüke tong, ‘Nang jeng taowe jaihümpuwa hangkihpu ngao jaihümpu shi? Tenyih me tange nang, ü yakjongpa ne mengne ye ok, nang yak me jonpu ü-moth khongkümpu ngaitüoh.’

³Tüopa kahtawe hüke yoi nying nyingke i, ‘Ü nokpuwe I yak mepu tao yantam ne o-pu yang no! Taowe hang linglak shi? Kahtok shaolak jingne-o tao wong yenang hüyange hahyuwe kemne-o tao wüonang.

⁴Taowe hang linglak sha-a taowe shingteki! Aope tao ütoi mepu laklakei üshümpalanne iman nok me min nyik kü ne taowe hüke linglak.’

⁵Tüophei me I nokpute ngin shümne ngohpu üshei nyik-e jem. Üwangpate Iye hüke i, ‘Ü-nok pupate nange phalak pheeisea hangshin ngohnangki?’

⁶Iye jan, ‘Olive minnga taksheng gho ja.’ Yakjongpawe Ite i, ‘Nangjing itpu hatüo me ngohnang, shot tüoh, hüyange denga she nyantüoh.’

⁷Ülao jate Iye tonge i, ‘Nange-o hangshin shümlak ngoh nangki?’ ‘Tahgee gho ja,’ she jan. ‘Nang jing itpu hatüo me ngohnang,’ yakjongpawe i, ‘Detet she nyantüoh.’

⁸“Tüophei me I nokpupawe ngaoting ye ipu yakjongpa min yong; hangjingne Iye konnangpu phei lingyangki hüke wangngai ühalan phei-a hatüo kahtoknyu ühalan iman yoi jin phei ünyei kon ngohnang.”

⁹Hüyange Jesuwe yelakpe hüke i: “Tüokhei taowe numante iphaning; numan jingne kahtoknyu moth phei shümpa tamyah, aope phawe kümyalakei, üküm yenangpu nokte numan intam phalak.

¹⁰Aome üjoihate monghümnang, Ite üyongpa me-o monghüm nang, aowe üjoiha te ye-i-yeshe, I üyongpa me-o ye-i-yeshelak.

¹¹Hüma-a numan kahtoknyu moth tangme yakjongpa ne mengtampu te nehoi mong yehümma-a, ütingpa moth jingne numante hangke ütinglaklak?

¹²Hüyange mih toite nokpu ne menge tampu te nehoi numante mong yehümma-a, numan sheite nokpune mengtüoh she aowe phakülak shi?

¹³“Shaoshanpa aowe-o nokpu ni rha ne mengpu ye-oklak: Iye ja te nulak hüyange ja te kenlak; Iye ja te mongpha lak, hüyange ja te yephalak. Numan-e Kahwang hei kahtoknyu moth moini me numan nokpu ne angpu ye-oklak.”

¹⁴Ngin meiyange kenpu Phariseelanne tüolan khongkümpu jai, hüyange iman-e Jesute haiye ngao.

¹⁵Hüpoi Jesuwe imante ngaowe i: “Kahta sheshao me shunang she teihpuwa numan ngohnang; hüyangpoi Kahwange numan mongjang shingnang. Hangjingne kahtawe yeonge shunang she teihpuwa Kahwang sheshao me hangne-o yemengja.

¹⁶“Mosa ngaokeng hei hipalan ngaolan baptipa John hipak ngoiye wongnange ngohyangki; hüyangpoi, Kahwang Ahngching Pungao ümei jaine tampu me peiye, üsheiye yoi yoi lam me teishunge yunang.

¹⁷Hüyangpoi ngaokeng me ngohpu üjinghapu ja shütte winpu phei-a wang hei kahtok ni mahpu she-o-lak.”

¹⁸“Aowe yoi sheko phei toiyanyange sheko üla yahlakei, Iye phwngngampu toi jonnang; hüyange aowe netanne yan-e angpu sheko yahlakei I phwngngam nang.”

¹⁹“Hipak ja me hakpa kahta ja ngoh, hüyange nyih jeih lwng-o-oyange lengpu üshei hahyinge ngoh.

²⁰Hüyange Lazar she minyange püm lili me ma shaha nangyange toiha kahta ja ngohyangki; hipak lep iye hakpa nok tafün shongme peiye,

²¹hakpawe hahyange shaipu nükkeklanne I sea mohlak she teihyange peiye ngoh. Hüke ngohwante kuihalan nehoi peiye I ma te yai.

²²Tüopa toiha kahta li hüyange wangdang shongmokpalanne wangdangpalan mo te om-e Abraham shongte woiye tei; tüohipak me hakpa-o li hüyange mu.

²³Yimching me I meiyange shaoshi yalipu phei pong; hüyange Iye leiye inwante üjai me Abraham jakuh me Lazar üo yange nge.

²⁴Tüohipak me Iye üngwünne nyik, ‘Opa Abraham! Üte shüpshe pha, hüyange Lazar shonne I yaklan yengwüng me hüngne tamyange, ü yee wünge tamkhu, hangjingne hatüopa vün me tao yeonge sheamnangki!’

²⁵Hüyangpoi Abraham-e i, ‘Üha, teihtüoyah, nang üyin jin hipak me lengpu üshei tüoyangki, hüyangpoi Lazarwe ümeng üshei pongyangki; hüyangpoi tüo nanleiye I sha-a mongmei nang; hüyange nang shaoshi yali puphei pongnang.

²⁶Tüo lili angyange, tüomepu nang ngohjing te peine yejema-a, nang ngohjing mepu toman tangte peine ye-oklak ne teman pa me üküm yenangpu jhom üyong ngohnang.’

²⁷Hakpawe janne i, ‘Eiyang, Opa, hümma-a taowe nangte yoppe tongpuweih, üpa nokte Lazar shonne yeshih,

²⁸hangjingne tao jeiheinao nga ngoh nang. I yeye tüopa shaoshi yalipu nyoite mintah peine imante minteeshih.’

²⁹Abraham-e janne i, ‘Nang jeiheinaolante teelak jingne Mosa hei Hipalan ngoh nangja; nang jei heinao lanne iman-e nyüopu minjai yah.’

³⁰Hakpawe janne i, ‘Opa, Abraham, hatüowe wanglak ne yeje, hüyangpoi ütam lipu mepu yange ye-e, iman tangte peiye ngaotüoh me nakshih iman monglüplak.’

³¹Hüyangpoi Abraham-e i, ‘Iman-e Mosa hei hipalan ngao yejaima-a, kahta ütam lipu mepu yange ye-e ngaotüoh poi iman mong yelüp oklak.’ ”