Read Konyak Naga LUK 17 Bible Online

LUK 17 - Konyak Naga bible

LUK 17

¹Jesuwe yoi pinlante hüke i, “Kahtalan tangte ülam ja kaiye ünu me yütlak ne hüko hüko tokpu hei peinang; hüyangpoi, aoyinne tüopa peine tam-e tokne tamyapeih, iman jingne hangshin yatuh shao mengpu!

²Hatüo, üjoiha yo mepu jawe nehoi ngaine tam-e ünu ompu pheiya, I üngme longshüm üyongpu ja yük yange yengching me hüngpu shemei.

³Tüokhei numan yoi manmanke shaoyin yah! Nang jeiheinaowe ünu jonküma-a, ümeng wintam tüoh.

⁴Nyih ja me Iye nyit me nang phei tüi-e ünu om ma-a, hüyange ümeng ompu lep iye, I nang tangte peiye ‘Tao monglüp teki’ she ima-a, nange Ite ümeng wintam tüoh.”

⁵Hüyange lampulanne Youngwanpa te hüke i, “Toman ütinglakpu yonge tampha.”

⁶Youngwanpawe janne i, “Numan me ütinglakpu yanhoi li shinne nehoi yonge ngohma-a, numan-e tüopa shaokhahpe te ipu oklak, ‘Yalah me pheckke nang nying nyingke bheitüoh hüyange nang nying nyingke yengching me dei tüoh!’ she ilak, hüyange tüowe numan ngao jailak.”

⁷“Ipu ja me numan yo me ütam-e shaoshanpa ja kah hokne yejema-a nyee yomne tamnangki. Aope I kah mepu peilakeih, numan-e hüke iya, ‘Mam mamshe peiyah, hüyange hahne shot tüoh!’

⁸Aope-o hüke ye-ilak! Hüleima, nange Ite hüke itüoh, ‘Üjingne hahying tümtüoh, hüyange nang büangnye yahyange tao hahpu mansho mansho tankei; tüophei me nange hahyingyah,’ she Iye ye-ilak a?

⁹Shaoshanpawe Iye ngaojai yangpu jingne minyong phakülak yeteih, Iye teihyalak?

¹⁰Numan phei-o tüo jaja muh; aope numan-e numante linglak ne ipu lili linge shoyalakei, ilak, ‘Toman-a jajang japu shaoshanpalan, toman-e toman toishao hanghe tüo hei lingyangki.’ ”

¹¹Jesu Jerusalem yete yewante I lamlinne Samaria hei Galilee pa me yeyangki.

¹²I ching ja te pei hüwante ngondak dakpu kahta pen I tangte pei. Iman üjai me yong,

¹³hüyange hüke üngwün, “Konnyüopa! Jesu! Tomante yayeng pha!”

¹⁴Aope Jesuwe iman nge Iye imante i, “Taitüoh hüyange ngengpalanne numante tokke leilak.” Hüke lamme iman kemme taiwante iman ngondak jao.

¹⁵Iman yo me jawe, Imepu ngondak meipu nge; hüwante Kahwang minyonge Iye yeonge üngwün hüyange leihye.

¹⁶Minyong phawe, I nying nyingke Jesu yashong me lamme ta. Tüopa kahta-a Samaria kahta ne ngohyangki.

¹⁷Jesuwe hüke ngaowe i, “Taowe kahtalan pen jaowe tampu yeje a? Ülaolan tuwa üpu?

¹⁸Hatüo eiha jat ja ompu hangke leihyepu ok? Tüo kih-e iman-o leihye-e Kahwang te minyong phapu ye-ok pu a?”

¹⁹Hüyange Jesuwe Ite i, “Lüotüoh hüyange yetüoh: nang ütinglakpuwe nang meiteki.”

²⁰Phariseelan ütamme Jesute tonge i, Kahwang Ahngching aope peikülak. Iye hüke janpu pha: “Kahwang ahngchinga hüke mükke ngelakpa ne peipu ne yeje.

²¹Aowe-o leitüoh, hatüowa tüome! yejema-a tüopa-a otüome! she ye ilak; hangjingne Kahwang ahngchinga numan yo me ngohnang.”

²²Tüophei me Iye pinlante i: “Numan-e Kahwang üha nyih ngehuwe teihpu hipak ja peikülak hüyangpoi numan-e tüopa ye-nge oklak.

²³‘Leihu otüo yeme!’ yejema-a ‘Leihu, hatüome!’ she ipu ütam ngaikülak. Hüyangpoi tüoyinte leine nokshao te aope-o tah yu.

²⁴Wangphih langpuwe jaye mepu jaye wangjan ngoiye hangke teetam, tüokih-e I hipak me Kahta Üha peilak.

²⁵Hüyangpoi üwangne I shange ponglak hüyange tüopa jin kahtalanne I yeyahlak.

²⁶Noah hipak me hangke ngoh, tüokih-e Kahta Üha hipak me ngohlak.

²⁷Noah yenglin te ongpu nyih manngoi manngoi üsheiye yujok hah-ngapu, hüyange sheko hei netan teiyahpu ngoh, tüohipak me yengyong muleam pei hüyange iman üshei mahne tam.

²⁸Lot hipak-o hüke muh ngohyangki. Üsheiye yujok hah-ngapu, teishakpu, ükong wangpu hei nokwepu maawe ngoh.

²⁹Lotte Sodom tüohpu me peiye, wang mepu vün hei yilong wai ne mange kei hüyange iman üshei mah.

³⁰Tüopa nyih hangke ngoh, tüo kih-e Kahta Üha ütahte ngaipu nyih-o ngohlak.

³¹“Tüopa nyih me ao kahta yoi noktok me ngohlakei, noksa me ngohpu toiheinan yahlak jingne yeyelak; tüokih-e muh kah me ngohpu kahta nokte yeyelak.

³²Lot shekonyu teih tüoyah!

³³Ao kahtawe yoi üyin yinlak jingne nganglakei I mahlak; hüyangpoi aowe yoi üyin man iman yinlak,

³⁴Taowe numante inang, tüoya, kahta ni lengja me shiye ngohlak: ja yahteiteiye ja tüohlak.

³⁵Sheko ni jamme sham shuwe ngohlak; ja yahtei teiye ja tüohlak.

³⁶(Kahta ni kah me ngohlak, ja yah teiteiye ja tüohlak.)”

³⁷Pinlanne Ite tong, “Youngwanpa ümeken me?” Jesuwe janne i, “Ümeken me lipu mang ngohlakei tüoken me pongkonlan jemlak.”