Read Konyak Naga LUK 18 Bible Online

LUK 18 - Konyak Naga bible

LUK 18

¹Hüyange iman-e hipak lep iye yoplak jingne Jesuwe tüopa ngaoleppu imante nyüowe i.

²“Ching ja me ngaophünpa ja ngoh. Iye Kahwangte yenyam yejema-a kahta te-o wangshüm yehüo.

³Hüyange tüopa chingme wamnyu ja ngoh. Ütingpa jingne I tangte yelakpe pei hüyange i: ‘Ü wepalan jingne üte jampha!’

⁴Yemongpu jingne tüopa ngaophünpa hipak laowe ngoh, hüpoi üküm ne I nying nyingke hüke i, ‘Taowe Kahwang te yenyam kahta te ye-i-yeshe yapoi,

⁵tüopa wamnyuwe üte meiyange pokteki, I shupu ne lingtamlak; hüke yejema-a üküm yeme yelakpe peipu jingne tao yeitam phalak!’ ”

⁶Hüyange Youngwanpawe yelakpe i: “Tüopa ngaoting ye-ipu ngaophünpawe hanghe i jaiya.

⁷Sha-a, I kahta lanne wangnyak wangngai üngwünpu jingne Kahwange yoi monghahpu phei ngao phünlak yeje a? Imante monglaowe hei jamlak a?

⁸Taowe numante inang, imante monghahpu phei Iye ngao phünlak, hüyange mamshe lingkülak. Hüpoi I nishe yuwante Kahta Ühawe kahtoknyu tangme ütinglakpu tüolak a?”

⁹Aoyinne yoi toi me meipu shaha she teihyange eiha lilite yemeipe teihpu ngohya peih tüolan te Jesuwe tüopa ngaolep i.

¹⁰“Kahta ni yoplak jingne khümjing te ong. Ja-a Pharisee, ülao ja-a kahngin shaipa.

¹¹Phariseepa yong hüyange yoi nying nyingke hüke yoppe i, ‘Kahwang, taowe nang min yongnang, hangjingne tao eihalan kih-e kuhleihpu, ngao yejaipu, yejema-a phwngpu mong phei yeje; tao tüopa kahngin shaipa kih yenangpu jingne nang min yongpuweih.

¹²Taowe hatmong ja me ni me yehahpe nyaole nang, hüyange taowe peipu üshei mepu penphong dopu phanang.’

¹³“Hüpoi kahngin shaipa shejai she yong, hüyange wangyete I sheta nehoi yelei, hüpoi yoi mongjang te tüppe i, ‘O Kahwang, ünupa üte yayeng pha!’ ”

¹⁴Jesuwe i, “Taowe numante ipha ning, aope I nokte leihyelakei, jempa yeje, tüopa kahta Kahwang phei shuwe ngohlak; hangjingne aoyinne yoi üyongne menghu innyailak, hüyange aoyin yoi nying nyingke innyai üyongne menglak.”

¹⁵Sha-a kahta ütamme iman naotak halan nehoi iman tangme Jesuwe yak jontamlak jingne yah pei. Hüpoi pinlanne ngeye hüke lingpalante tee.

¹⁶Hüpoi Jesuwe I tangte nahalan nyik hüyange i: “Nahalan ü-tangte peine tamtüoh! Imante lakne tahtam, hangjingne Kahwang ahngchinga tüolan kihpulan jing.

¹⁷Hatüo teih tüoyah! Aoyinne nahaja leye Kahwang ahngching yeyahlakei tüome ongpu ye-oklak.”

¹⁸Jehudi wanglam lampa jawe Jesute tong; “Konnyüopa ümei, jintepu üyin tüolak jingne taowe hanghe linglak?”

¹⁹Hüyange Jesuwe Ite i, “Nange hangne üte ümei she nyiknangki?” “Kahwang shaha tokte ao-o ümei yenang.

²⁰Nange ngaokenglan shingnang: ‘Phwngngampu tahjon, tah toi, tah kuh, ngaoleih tah i, nangnyu nangpa te iye she yah.’ ”

²¹Hüwante kahtawe janne i, “Tao naha me ngohwante muh tüolan ngaokeng khongkümpu jonne wenyangki.”

²²Aope Jesuwe tüopa ngao jai, Iye Ite i, “Nange üne-o ülam jawe manwang. Nang me ngohpu üshei yüotüoh hüyange toihalante ngin phatüoh, hüyange wangdang me nang moth ngohlak; tüophei me tümtüoh hüyange ü-phei te woikei.”

²³Hüpoi kahtapawe aope tüopa ngao jai, I yeonge mongmeng, hangjingne I meiyangpu hakpa ne ngoh.

²⁴I mongmeng nang she Jesuwe shing hüyange i: “Hakpalan jingne Kahwang Ahngching te yulak hangshin wanpu!

²⁵Hangjingne Kahwang ahngching te hakpa kahta onglak leima, vemei wo me udh ja helak she-oklak.”

²⁶Kahta aoyinne I ngao jai hüke tong, “Hüma-a, ao yinpu oklak shi?”

²⁷Hüpoi Jesuwe hüke jan, “Kahta jingne hanghe ye-oklak ne ngoh, Kahwang jingne hei oklak.”

²⁸Hüwante Peterwe i, “Leihuyah! Nang phei te woilak jingne toman-e toman nokyin tüohyangki.”

²⁹Hüyange Jesuwe imante i, “Eihyang,” “Hüyange taowe numante tüo inang: Kahwang ahngching jingne aowe yoi nok yejema-a sheko yejema-a jeihei naolan yejema-a nyupalan yejema-a hayim tüohlakei,

³⁰iman-e tüopa jin me sheyong she moiman tüolak, hüyange ngoikülak jin me yemahyemee üyin tüolak.”

³¹Jesuwe pinlan penme ni woitei hüyange imante i, “Jaiyah, teman Jerusalem te ongnang ümeken me lampheli jingne Kahta Üha jeng hipalanne nyan hüyange ütingme ngailak.

³²I yinhulante phünne phakülak, iman-e Ite nyilak, teelak, hüyange Ite iyphao phaolak.

³³Iman-e Ite shetlak hüyange I toilak, hüpoi lüm shepu nyih me I yinne yange yelak.”

³⁴Hüyangpoi pinlanne tüoyin mepu ja-o yeshing: hanghe jeng ngaoyapeih iman-e shinglak mepu lowe ang, hüyange Jesuwe hanghe ngao iman-e yeshing.

³⁵Hüke Jerikho phei owe Jesu peiwante mükmüopa kahta ja lamnah me shotyange hahyuwe ngoh.

³⁶Aope kahta ükhong üngang I kaiye linne taipu jai, Iye tong, “Tüowa hangshi?”

³⁷Iman-e Ite i, “Nazareth mepu Jesu linnangpu.”

³⁸Hüwante Iye üngwünne i, “David üha Jesu: üte shüpshe pha!”

³⁹Shaoye me ngohpu kahtalanne Ite tee hüyange jünge ngohkei she i. Hüpoi Iye sheyong she üngwünne i, “David üha: üte shüpshe pha!”

⁴⁰Tüokhei Jesu lakke yong, hüyange mükmüopa I tangte peilak jingne ngaopha. Aope I owe pei, Jesuwe Ite tong,

⁴¹“Nang jingne Taowe hanghe lingne tamhu nangki?” Iye jan, “Üyongpa,” “Taowe nishe ngehu nangki.”

⁴²Tüokhei Jesuwe Ite i, “Nang ütinglakpuwe nang meipu okteki, ngetüoh!”

⁴³Mamshe Iye ngepu ok, hüyange Kahwangte müktishiwa ne tamme I Jesu pheite woi. Aope ükhonge tüopa nge, iman üsheiye Kahwang te minyong pha.