Read Konyak Naga LUK 19 Bible Online

LUK 19 - Konyak Naga bible

LUK 19

¹Jesu Jerikho te ong hüyange kaiye tai-e ngoh.

²Tüome Zacchaeus she minpu hakpa hüyange kahngin shaipa üyong ja ngohyangki.

³Jesu ao shi, leilak jingne I meiyange ngang, hüyangpoi I püm shoipu kahta ükhangha hüyange ükhong yeonge yonge ngohpu nanjingne Iye Jesu ye-nge.

⁴Tüokhei ükhong sheshao yete I phette wen hüyange Jesu peilak lam me yengphuk pee ja te ong.

⁵Aope tüopa nyoi ngoiye Jesu pei Iye nganne lei hüyange Zacchaeus te i, “Zacchaeus, mamshe yukei, hangjingne tenyih Tao nenok me ngoilak.”

⁶Tüokhei Zacchaeus mamshe yu, hüyange yeonge mongmei puphei I nyik.

⁷Kahta üshei aoyinne tüopa ngeyapeih ngu ngu she i, “Ünu kahta nokte tüopa kahta yinpane ngoiteki!”

⁸Zacchaeus yong hüyange Youngwanpa te i, “Üyongpa, jaikhu! Taowe ü-moth jakih-e tange toihalante phalakei; hüyange taowe kahta ütam mepu kange yahyange ngohma-a, üphong peli nyeiye taowe shümlak.”

⁹Hüyange Jesuwe Ite i, “Tenyih hatüo nok me yinyepu peiteki; hangjingne tüopa kahta-o Abraham nokli mepu.

¹⁰Hangjingne Kahta Üha yamlak hüyange aoyin mah ngoh yinlak jingne pei.”

¹¹Tüophei me aoyinne I ngao jai tüolante yelakpe Jesuwe ngaoleppu me tüopa ngao i. Hangjingne shaaji I Jerusalem oteiye ngoh, hüyange Kahwang ahngchinga ngoilak oteiye ngohnangpu she iman-e teih.

¹²Tüokhei Iye i, “Hipak ja me lwngpa ja ngoh hüyange kahmük üjai te ahngne mengyange nokte leih yelak jingne tai.

¹³Tüokhei I yayong shaome, Iye yoi shaoshanpalan pen ngoiye nyik-e jem hüyange hon ngin khaoja pong phayange hüke imante i, ‘Tao taitephei me tüopa kaiye numan-e hanghe ngaipu oklakei leipha ning.’

¹⁴Sha-a, imching kahta lanne Ite nuwetei. Tüokhei I tokphei te ngaophei kahta shonne hüke i, ‘Tüopa kahta ahngne menglak jingne toman-e yeleng.’

¹⁵“Tüopa kahta üyong ahngne meng hüyange leihye. Iman-e hangshin küw ngaiyapeih shinglak jingne mamshe I sheshao me jemkei she I shaoshanpalan te ngao pha.

¹⁶Üwangpa peingoi, hüyange i, ‘Üyongpa, nange phapu tüopa ngin kaiye taowe hon ngin pen küw tüoki.’

¹⁷Hüwante Iye jan, ‘Meiteki, nanga shaoshanpa ümeiyang! Üjinghapu toi me nang lah nyikpu hüoyangki, tüokhei ching pen me nokpu ne menglak jingne taowe nangte tamnang.’

¹⁸Nishepupa shaoshanpa pei hüyange i, ‘Üyongpa, nange phapu ngin kaiye taowe hon ngin khao nga omyangki.’

¹⁹Tüopa te Iye i, ‘Nanga ching nga tangme nokpu ne menglak.’

²⁰Ülaopa shaoshanpa pei hüyange i, ‘Üyongpa, hatüowa nange phapu hon-ngin; taowe nyephin ha ja me peiyange lowe angki!

²¹Nang sheshao me tao nyamme teih, hangjingne nanga meiyange mengshipu kahta. Nang jing üjepu nange yahpu oknang, hüyange nange yedeipu kenme nange wetnang.’

²²Iye Ite i: ‘Nang shaoshanpa ümeng! Nang yeitamlak jingne taowe nang ngao jonning. Tao mengshipu kahta she nange shing, üjing yejepu me yah hüyange taowe yedeipu wet.

²³Meiteki, hümma-a, nange üngin ngin angnyoi me hangne ye-ang ei? Tao aope yelakei tüo hipak me ngin angnyoi mepu üla omme ye ok hah shepu.’

²⁴Tüophei me aoyin yongyange ngoh tüolante Iye i, ‘I mepu hon-ngin yahtüoh, hüyange hon ngin pen ngohpupate paowe phatüoh.’

²⁵Iman-e Ite i, ‘Üyongpa, Ime-a nginkhüo pen ngoh nangki!’

²⁶Iye janne i, ‘Taowe numante ipha ning, aoyin yakme ngohlakei, sheyong she paophalak; hüpoi ao yak me yenang hüyange I me üjingha ngohpu nehoi yahteilak.

²⁷Sha-a aoyin ü-wepa ne menge hüyange iman ahngne tao yeyah hupe teih, iman üshei woi peiye ü-sheshao me toitüoh!’ ”

²⁸Jesuwe tüolan ngaoyang phei me iman sheshao ye me Jerusalem ngoine yayong.

²⁹I Olive Kahtang yemepu Bethphage hei Bethani owe peiwante, pinlan ni ngoiye Iye

³⁰tüopa ngaophei sheshao yete shon: “Numan sheshao me janhüowe ngohpu ching te ongtüoh; numan aope owe peilakeih, aope-o kahtawe manjonpu gado üha shinyange ngekülak; tüopa lantüoh hüyange tüome woipeikei.

³¹‘Hangne lanki?’ she kahta ütamme tongma-a, Ite hüke itüoh, ‘Konnyüopawe tüopa-a wongpong ne mengnangki.’ ”

³²Iyangpu lamme iman yayonge tai, lamphe li Jesuwe iyangpu kih-e ngoh.

³³Iman-e gado üha lanne ngohwante, numan-e “Hangne tüopa lannangki?” she nokpuwe tong.

³⁴“Konnyüopawe wongpong ne mengnangki,” she iman-e jan,

³⁵hüyange Jesu tangte gado üha woipei. Tüophei me iman gado tangme iman inkhek angne tam hüyange Jesu shotne tam.

³⁶I ongyange peipu phei jam jamshe kahtalan-e yoi yoi inkhek lamnyu me nyüm.

³⁷Aope I Jerusalem phin mepu Olive Kahtang lampong owe pei, ükhong üyongpu I pinlanne Kahwang min yongne wang hüyange iman-e ngeyangpu toi nyulan üshei jingne minyong phawe üngwün.

³⁸“Youngwanpa minme ao Ahngpa pei Kahwange moimantüoh! Wangdang me chingmei hüyange ütahpa me Kahwang te müktishiwatüoh!”

³⁹Tüophei me ükhong yo mepu Phariseelan ütamme Jesute hüke i; “Konnyüopa, nang pinlante yemoppe ngohlak iyangkei!” she iman-e i.

⁴⁰Jesuwe janne i, “Taowe numante iphaning, iman-e yemoppe ngohtüoh ma-a longlanne iman nying nyingke wenkülak.”

⁴¹Hüyange aope chingnyu shongte owe I pei hüyange aope Iye tüopa nge I shap.

⁴²Hüyange hüke i, “Chingmei jingne hanghe wongpong numan-e tenyih hei shingpu yangno! Hüpoi sha-a nange tüopa ngene ye-ok:

⁴³Hangjingne wepalan ükhong ükhonge nang neiye konlak nyih hipak peikülak, hüyange jaye jaye neikonlak.

⁴⁴Iman-e lanshe nang hüyange nang pemong me ngohpu kahtalan mengwinlak; long ja nehoi i nyoi jing me angne yetamlak, hangjingne aope nang yinlak jingne Kahwang peiyapeih nange tüopa hipak yeshing!”

⁴⁵Tüophei me Jesu khümjing te ong hüyange pheeileih palante jangne wang,

⁴⁶imante hüke i, “Üyin lai me hüke nyanne ngohnang, ‘Ü nokte yoppu nok she nyiklak (she Kahwange i).’ Hüyangpoi numan-e kuhpa lojing nyoine linge tam!”

⁴⁷Jesuwe nyihjeih yopnok me konnyüo, Ütahpa ngengpa, Ngaokeng jonpalan, hüyange woipalanne I toihuwe teih.

⁴⁸Hüpoi hangke linglak iman-e yeshing, hangjingne kahta üsheiye ngao pha ja nehoi linne yetampe I ngao jaihuwe teih.