Read Konyak Naga LUK 2 Bible Online

LUK 2 - Konyak Naga bible

LUK 2

¹Sha-a tüopa nyih hipak me tüo ngai; kahtoknyu üshei me shangtoi min nyanlak yangshe Kaisar Augustus mepu ngaolan yan.

²Hatüowa Syria me Quirinius governor ne ngohwante üwangpa min nyanpu hipak yah.

³Hüyange üshei yoi min nyanlak jingne yoi yoi chingnyute yan.

⁴Hüyange Galilee me ngohpu Nazareth chingmepu Joseph-o David nokli mepu ne menge, David ahngpa puhpu ching Bethlehem ngoine tai.

⁵Joseph, I phei ngohne jiengyangpu, püm yekengpe ngohpu Mary phei yoi min nyan ne tai.

⁶Aope iman Bethlehem me ngoh, Mary me yoi ha wangngai ngelak hipak ngoi.

⁷Hüyange yhawe yoi halom puh, hüyange nye ükhaiye inne tam, hüyange mahu-sheng ja me lam ne tam, hangjingne iman ngoilak jingne yinnok me nyoi yenangpe ngoh.

⁸Hüyange tüopa kahtok me yoi nyee yomme wangnyak phapan pümpu Nyeeyompalan ükhong ja ngoh.

⁹Hüyange Youngwanpa shongmokpa ja peiye iman shongme yong, hüyange Youngwanpa müktishiwa iman neikonne tee, hüyange iman meiyange nyam.

¹⁰Hüpoi shongmokpawe imante i; “Tahnyam, kahta üshei jingne ye-ongpu mongmei peilak, ngaolan ümei yahyange tao peinang.

¹¹Hangjingne, teyapu wangnyak me David chingnyu me numan Yinyepa Youngwanpa Khrista puh ngohnang.

¹²Numan-e füo ne hatüo ngekülak: Naha-a yeonge meiye nyeye lümme inyange mahu-sheng me shinne ngelak.”

¹³Hüyange mokhshe shongmokpalan phei wangdang banghalan nangyange wangmepu ngaiye Kahwang te yihlupu hem lokke i:

¹⁴“Ütahpa me Kahwang te müktishiwa tüoh, hüyange kahtoknyu me yoi mong hahpu kahta yo me chingmei!”

¹⁵Aope shongmokpalan iman mepu yan hüyange wang te ong, nyeeyompalanne iman yo me teingaowe i, “Youngwanpawe temante hanghe i, hüyange hanghe ngai tüote leine Bethlehem te taihah!”

¹⁶Iman mamshe yayonge tai; Mary hei Joseph ni, hüyange naha-a mahu-sheng me lam yange nge.

¹⁷Aope iman-e tüopa nge, shongmokpalanne naha jeng hangke iyapei tüopa imante shingne tam;

¹⁸hüyange aoyinne tüopa jeng jaiyapeih, iman üshei nyeeyompalanne imante ipu ngao me yashan.

¹⁹Hüpoi Mary-e tüolan üshei teih-e tüo, hüyange tüolan jingne meiyange luwe teih.

²⁰Hüyange shongmokpalanne imante hangke i, hüyange iman-e jaipu hei ngepu üshei jingne Kahwang te yihlupu hem lokke nyeeyompalan leih ye.

²¹Hüyange I nyih tet ngoi, aope üshokhüp, wangdang shongmokpawe nao nyoi me yha püm yekengpe man ngai wante min phapuke, I min Jesu she nyik.

²²Hüyange Mosa ngaokeng kih-e momowe jaowe tamlak hipak aope ngoiyapeih, Joseph hei Mary niye Youngwanpate naha-a phalak jingne iman-e Jerusalemte yahpei,

²³(hangjingne Youngwanpa ngaokeng me hatüo nyanne ngohnang: “Üwangne ngaipu halom üshei Youngwanpa te phünne phalak.”)

²⁴Hüyange Youngwanpa ngaokeng me ipuke, “Iman-e awshu ni yejema-a awyei ni yahyange khümne pei.”

²⁵Tüohipak me Simeon she minpu kahta ja Jerusalem me ngoh, hüyange tüopa kahta khakshupu hüyange phünne phawe, Israel kahtalan hangke yinlak she tanne leiye ngoh yangki, hüyange Yaha Üjao I tangme ngoh

²⁶hüyange Iye Youngwanpa Khrista mannge mannge I yelilak she, Yaha Üjaowe ütahte ngaiye hüoyange ngoh.

²⁷Yaha Üjao woipu phei, Simeon khümjing te ong: aope naha Jesu ngaokeng wanglamme ngohpuke jonglak jingne nyu heipa lanne I yah pei,

²⁸Simeonne yoi yak me naha-a paiyange Kahwangte minyong phawe i,

²⁹“Sha-a Youngwanpa, nange janyangpu aope-o yepin, nange nang shaoshanpa toloimeipu me yanne tamtüoh;

³⁰hangjingne, ü mükke nang yinyepu ngeteki

³¹hanghepa nange kahta üsheiye shinge tümme ang,

³²nang kahta Israel lante okpu phalak, hüyange yinhulante wangngai ütahte ngaiye hüolak.”

³³Naha jingne Simeonne ipu ngaote Inyu hei Ipa meiyange yashan;

³⁴hüyange Simeonne imante moipha, hüyange Inyu Mary te i, “Hüowü, sheyongpu jingne teihpu ütahte ngaiye hüolak, Israel ünyong yete taipu loiyahlak jingne, hüyange I Kahwang mepu füo ne menge, kahta maawe I phei tüi-e ngaolak;

³⁵tüokaiye iman juteih ütahte ngaitamlak; hüyange iman mongmengpu, ünah ni yanglow kih-e yoi mongjang te lütte peilak jingne, tüopa naha-a leye ngohnang.”

³⁶Hüyange Asher jat mepu Phanuel üha, Anna she minpu hinyu ja ngoh; I wunyu ne mengteiye ngoh, hüpoi wangpeng nyit ngoiye yoi netanpa phei ngoh phei me,

³⁷wangpeng detet me peli ngoiye wamnyune ngoh. Hahyingpu üshei angyange yhawe wangnyak wangngai Kahwang khümjing me yoppe ngoh.

³⁸Tüopa hipak me khakshuwe yha pei, hüyange Kahwang te minyongpu pha, hüyange Jerusalem yinyelak jingne tanne ngohpu üsheite tüopa naha jeng i.

³⁹Aope iman-e Youngwanpa ngaokenge yahhupuke lampheli tümme sho, Galilee me ngohpu yoi chingshao Nazareth yamme leih ye.

⁴⁰Hüyange naha-a jong, hüyange Ime wong pei, Ime üngan ülong maawe pei, hüyange Kahwang shüpshe Ime ngoh.

⁴¹Sha-a wangpeng lep iye yinyepu mo jingne Jesu nyupalan Jerusalem te ong.

⁴²Aope Jesu wangpeng penme ni ngoiyapei, iman wanglam kih-e mo te omne ong.

⁴³Aope mo hipak shoyapei, iman chinglam yamme ye, hüyangpoi Jesuwa Jerusalem me lakteiye ngoh. I laktepu she Inyu hei pa niye yeshing;

⁴⁴I eihalan ükhong phei ngohlak she teihyange, nyihlao hipak kemme ngohyange, I shümpalan hüyange nok kahta lanphei ngohkülak she yam.

⁴⁵I yenangpe ngoh, tüokhei I yamme Jerusalem te nishe leihye.

⁴⁶Nyih lüm shepupa nyih me iman-e Jesuwa konnyüopalan phei kon teinyüowe hüyange ngao jaiye Jerusalem khümjing me shotte ngohpu iman-e nge.

⁴⁷Aoyinne jelo phei janpu I ngao jaiyapeih üshei meiyange yashan.

⁴⁸Aope Inyu hei pa niye I ngeyapeih meiyange yashan, hüyange Inyuwe Ite i, “Ü-ha, nange tomante hang hüopuweih? Nangpa tomni nang yamme yeonge mong shang yangki.”

⁴⁹Iye jan, “Numan-e Tao yamme hangne ngohlak shi? Üpa nok me Tao ngohlak she numan-e yeshing a?”

⁵⁰Hüyangpoi imante Iye hang iyapeih, iman-e yeshing.

⁵¹Hüyange iman pheite woiye Jesu Nazareth te ye, hüyange iman phang me ngao jaiye ngoh; hanghe ngaiyapeih khongkümpu Inyuwe yoi mongme yepipe ang.

⁵²Hüyange Jesu püm hei ta hei konjong me, hüyange Kahwang hei kahta monghahpu me jong.