Read Konyak Naga LUK 20 Bible Online

LUK 20 - Konyak Naga bible

LUK 20

¹Nyih ja, aope Jesuwe khümjing me kahtalante nyüowe hüyange Pungao ümei konnyüo, ngengpa ütahpa hüyange ngaokeng nyüopalan, jeiyonglan phei jamshe I tangte pei,

²hüyange Ite i, “Tomante ipha, tüoyin linglak jingne nangme hanghe wong ngoh nangki? Tüoyin linglak jingne nangte aowe wong pha ei?”

³Jesuwe imante janne i, “Sha-a Taowe-o numante ngao ja tongpha ning; Üte itehu!

⁴Johnne baptilak jingne Kahwang mepu heiya kahta mepu pei ei?”

⁵Iman yo me hangke janhah she teingaone wang; “Teman-e hang ilak shi? ‘Kahwang mepu,’ she teman-e ima-a, Iye ikülak, ‘Hümma-a hangne, Johnte üting yelak?’

⁶Hüpoi ‘teman-e kahta mepu’ she ima-a, tüome ngohpu ükhong üsheiye temante longe shüpkülak, hangjingne John-a hipa ja she iman monglüp ne tamyangpu.”

⁷Tüokhei iman-e jan, “Ü-mepu peiyapeih toman-e yeshing.”

⁸Hüyange Jesuwe imante i, “Hümma-a hanghe wonge tüoyin toi lingpu, taowe-o numan te min i.”

⁹Tüophei me Jesuwe kahtalante tüopa ngaolep i: “Kahta jawe wulick kah ham, wulick ngaine tam, hüyange hipak laowe ngohlak jingne kahmük ja te tai.

¹⁰Aope wulick ülick yolak hipak ngoi, wulick kahme pümpalan tangte I jing meitam yahlak jingne rhapa ja shon. Hüpoi kahme pümpa lanne rhapa te shetyange ükeng me ye ne tam.

¹¹Tüokhei Iye ülao rhapa ja shon, hüpoi kahpüm palan-e I te-o shet, wüotüone tam, hüyange ükeng me yene tam.

¹²Tüophei me Iye rha ja muh lüm she shon, kahpüm palan-e Ite-o mako sha hüyange jange tei.

¹³Tüophei me wulick kah nokpuwe i, ‘Taowe hang linglak shi? Taowe ü-mongkenpu üha shonlak; ütingme iman-e Itepa-a wangshüm hüokülak!’

¹⁴Hüpoi aope kahpümpalanne I nge iman yo me teingaowe i, ‘Hatüowa nokpu üha yang. I toihah, hüyange wulick kah-a teman-e mothlei lak!’

¹⁵Tüokhei iman-e wulick kah kaiye jange tei hüyange I toi. ‘Hümma-a, wulick kah nokpupawe kahpüm palante hanghe linglak shi?’ she Jesuwe imante tong.

¹⁶‘I peilak hüyange tüolan kahta toilak, hüyange wulick kah-a ülao kahpümpate phalak.’ ” Aope kahtalanne tüopa ngao jai iman-e i, “Kahwange tientüoh!”

¹⁷Hüyangpoi Jesuwe imante lei hüyange i, “Hümma-a, üyin ngaolai me nyanpu leppuwa hanghe shi? “ ‘Nokwepalanne yemei she hanghepa long win tüopahi nokjing longnyu ne meng.’

¹⁸Kahta üshei aoyin tüopa long tangme yeilakei khoih nyai-e pailak; hüyange kahta ütam tangme tüopa yeima-a, kahmak ne menge khuilak.”

¹⁹Ngaokeng nyüopalan hüyange ütahpa ngengpa lanne tüome muh Jesu pholak jingne ngang, hangjingne Iye hanghe ngaolep i, tüowa iman phei tüi-e ipu she shing; hüpoi kahta lante iman nyam.

²⁰Tüokhei hipak ümei jingne iman-e tan. Iman ütam lahnyikpalan yang she shinge tamlak jingne kahta ütamte hünghao lowe pha, hüyange Jesu yeitamlak ngaotong ne tei; tüome ütahpalan yak hüyange wong pheipu Governor yak me iman-e I phünne phalak.

²¹Tüolan kuhshükpalanne Jesute i: “Konnyüopa, nange hanghe ngao hüyange nyüo tüolan-a üting she toman-e shingnang. Kahtawe hanghe mong tüome nange mong yepha she teman-e shingnang, hüpoi kahta jingne ütingpa Kahwangpa jeng nyüonang.

²²Roman wanglam lampate kahngin phalak-a toman ngaokeng me shupu heiya yeshupu shi, tomante itehu?”

²³Hüpoi Jesuwe iman kon nge hüyange imante hüke i,

²⁴“Üte nginmei ja hüotehu. Tüome ao sheta hüyange min ngohnangki?”

²⁵“Kaisar jing,” she iman-e jan. Tüokhei Jesuwe i, “Hümma-a Kaisar sheiya Ite phatüoh, hüyange Kahwang sheiya Kahwangte phatüoh.”

²⁶Kahtalan sheshaome iman-e I ümeng yepho ok. Tüokhei, ngao yengaipe Iye janpu ngaote yashanne ngoh.

²⁷Sadducee ütam Jesu tangte pei. (kahta lipu mepu yange minye ja she ngaopuwa iman ükhong) Iman-e Ite tong:

²⁸“Konnyüopa, toman jingne Mosawe tüopa ngaokeng nyanyangki: ‘I sheko angyange kahta ja lima-a, hüyange hayim-o yenangma-a, lipupa Inaowe tüopa wamnyu yahlak, hüyange lipupa jingne hayim ngohlak.’

²⁹Hipak ja me naoshe nyit ngoh, jeiyongpawe sheko yah, hüyange hayim yenangpe limah.

³⁰Tüophei me Inaowe tüopa sheko yah,

³¹hüyange lümshepupawe yah, yelakpe naoshe nyit ükümpa manngoi manngoi yah, iman üshei hayim yenangpe shaha li küm.

³²Üküm ne tüopa shekonyu-o li.

³³Sha-a, aope nyih lipulan üshei yange yelakei, ao sheko ne I menglak shi? Naoshe nyit üsheiye yha yah yangki!”

³⁴Jesuwe imante jan: “Tüopa jin hayimlanne nokyamnang, hüyange nokne mengetam nang:

³⁵hüpoi sheko hei netan aoyin lipu mepu yange yelak wang, hüyange ngoikülak jin me nyoilakei, nok yamlak wongpong ne yeje.

³⁶Hangjingne iman üshei wangdang shongmokpalan phei ja kih-e ngohlak hüyange yelilak. Iman-a Kahwang hayim ne menglak hangjingne lipu mepu iman yange yeyangki.

³⁷Hüyange Mosawe yeonge meiye iyangki, lipu lan-a üyin me yange yelak. Vün shongnyu hüowante Iye Youngwanpa-a Abraham Kahwang, Isaac Kahwang, hüyange Jacob Kahwang she ngaoyangki.

³⁸Tüote leppuwa I-a lipu yeje üyin Kahwang, hangjingne üshei Ime üyin ngohnang.”

³⁹Hüwante Ngaokeng nyüopalan ütamme hüke ngaowe i, “Konnyüopa, yeonge shunangki!”

⁴⁰Hangjingne tüome peiye iman-e Jesute tonglak jingne ao-o mong yeyong ok.

⁴¹Jesuwe imante i, “Khrista-a David nokli mepu üja she hangke ine?

⁴²Hangjingne TÜOWELAIHEM LAITEP me David-e yoi nying nyingke inang: “ ‘Youngwanpawe ü-Youngwanpate i:

⁴³Taowe nang wepalan nang yaphang me man ang man ang, ü-yakjah ye, tüome shottüoh!’

⁴⁴Hüma-a, David Ite Youngwanpa she nyik. Ha-a David nokli mepu üja she hangke ilak shi?”

⁴⁵Aope ükhong üyonge I ngao jaiye ngoh, Jesuwe yoi pinlante ngaowe i,

⁴⁶“Ngaokeng nyüopalan aoyinne phakshaoh ülao yahyange hüyange chingyang lamnyu me kahta lanne minyong phawe salam phapu lenge hüyange synagogue hei mo pu nyoi me nyoijing ümei iman nying nyingke leye shotte kemyapeih, tüolan jingne kentingyah:

⁴⁷Aoyinne wamnyulan jingne meiyange lahnyik hüyange iman noksalan kuhleihne tam, tüophei me ngelak jingne yeonge laowe yop! Iman shaoshiyali ne tampuwa jaja phei-o shemeng she ngohlak!”