Read Konyak Naga LUK 21 Bible Online

LUK 21 - Konyak Naga bible

LUK 21

¹Jesuwe leiye ngoh hüyange hakpalan ne khümjing dojing me iman hünghao hei dopu phapu nge,

²hüyange Iye leiye ngohwante muh yeonge toipu wamnyu jawe nginmei poisa ni hinpu nge.

³Hüyange Iye i: “Taowe numante iphaning üshei phei sheyong she ütingme tüopa wamnyuwe hin yangki.

⁴Hangjingne ülao lanne phapuwa, iman-e jonyange topu hei phayangki: hüyangpoi, tüopa wamnyu, tüolan me I üyin ngoh hüpoi üshei phayangki.”

⁵Pinlan ütamme khümjing jeng ngaowe ngoh, hüyange hüke i, long ümei shaha phei hüyange Kahwang te hünghao ne phapu hangshin meipuweih no! Hüpoi Jesuwe i,

⁶“Hipak ja peilak, numan-e ngepu tüolan long khongkümpu yeiteiye, ja nehoi yoi yoi nyoijing me angyange ye-ngelak.”

⁷Iman-e Ite tong, “Konnyüopa, tüolan aope ngailak? Hüyange tüolan khongkümpu jingne hipak oteki she hanghe füo kaiye hüolak shi?”

⁸Jesuwe janne i: “Kentinge yomme ngoh yah. Hangjingne ü-min me kahtalan maawe hüke ngaowe peikülak, ‘I-a tao üja!’ hüyange ‘Hipak owe peiteki!’ Hüpoi iman pheite tahwoi.

⁹Aope numan-e hokpu hei moppu jailakei tahnyam; üwangne tüoyin ngaiye wanglak, hüyangpoi tüolan kaiye üküm hipak owe peipu ne yeje.”

¹⁰Iye yelakpe imante hüke i: “Jat jawe jat ja phei tüi-e, hüyange ahngchinge ahngching phei tüi-e yonglak;

¹¹nyamlakpa ne minweleipu ngohlak, seanyao yenglepu, hüyange kenphe me dak ümeng ngailak; yashanpu toi hüyange wangme füo üyong ngelak.

¹²“Tüolan khongküm ngai eipe, numan phophalak hüyange shangne tamphalak; synagogue me ngaophünlak jingne numan phünne phakülak hüyange numan shapu nok me angphalak; ü-min jingne ahnglan hei wanglam lampalan shaome numan woipei phalak.

¹³Numan-e Pungao ümei ngaowe tamlak jingne hipak ümei tüone menglak.

¹⁴Hüpoi nang nying nyingke hangke tienlak she mong yeshanglak jingne hipak ngoishao memuh nang juteih mongjang tümme tanyah:

¹⁵hangjingne wepalanne nang phei yela oklak ne Taowe nang ju me konjong hintam phalak.

¹⁶Numan nyupalan-e, numan jeihei naolanne, numan pheipu lanne, hüyange numan shümpa lanne numan phünne phakülak; iman-e numan ütam-a li ne tamphalak.

¹⁷Ü-jingne kahta üsheiye numante nuphalak.

¹⁸Hüpoi numan shang mepu shangmin ja nehoi yemahlak.

¹⁹Numan nün-okpu ngohtüoh, hangjingne hükih-e numan yinpu oklak.”

²⁰“Hüyangpoi aope nyahponglanne Jerusalem neikon yange ngelakei, chingnyuwa mamshe mengkülak she numan-e shinglak.

²¹Tüophei me aoyin Judea me ngoh kahtang yete phettüoh, hüyange aoyin chingnyu me ngoh, tüolan-a yanne taitüoh, hüyange aoyin chingnyu mepu yanne taiye ngoh, chingnyu yamme yene tahtam.

²²Hangjingne tüoyin khongkümpu üyin laime ngohpu ütahte ngailak jingne peipu ‘Shaoshi yali phapu nyih ngohnang.’

²³Tüoyin nyih hei hipak me aoyin sheko püm yekengpe ngoh, hüyange naotak halan phei ngohpu nyuyonglan jingne hangshin shaomenglak! Tüopa kahmük me yashan yali shaoshi peilak, hüyange Kahwang mongshihpu tüolan kahta tangme ngohlak.

²⁴Yanglow-e iman toilak, hüyange kahmük üshei yete iman phowe teilak, hüyange iman hipak manlin manlin eiha jat lanne Jerusalem wanglam lamlak.”

²⁵“Wanghe, linnyu, hüyange shanha me füo ngohlak. Kahtoknyu me jat hei li üshei, yengching hüyange yengmokh ngaipu wüng jaiye nyamme yanlak.

²⁶Kahtoknyu me hanghe peikülak she tanne ngohpu peipu kaiye kahtalan nyampuwe liye talak; hangjingne wangtok me hanghe wong ngoh iman nyoite jange teilak.

²⁷Tüophei me wangphom me Kahta Üha yoi wong üyongpu phei hüyange müktishiwa puphei ngaipu iman-e ngelak.

²⁸Aope tüoyin ngaine ükong wanglakei, yongtüoh hüyange numan üng ngantüoh, hangjingne numan yinyelak oteki.”

²⁹Tüophei me Jesuwe imante tüopa ngaolep ngaowe i: “Phukpee hüyange ülaolan peete leiyah:

³⁰Aope iman peeyak üyoi ngaine ükong wangpu numan-e ngeya peih jüo hipak ngoi nang she numan-e shingnang.

³¹Tüo ja leye, aope tüoyin ngaipu numan-e ngeyapeih, Kahwang ahngching peine oteki she numan-e shinglak.

³²Ütingpa me Taowe numante inang, tüolan lili manngai manngai, tüopa jin linne yetailak.

³³Wangdang hüyange kahtoknyu linne tailak; hüpoi ü-ngao aope-o linne yetailak.”

³⁴“Hüpoi numan kentinge ngohyah! Meiyange motappu, hüyange yujok hah-ngapu, hüyange mongshangpu üyin ja ne, numan menge tah tam, yejema-a tüonyih mokhshe hankhak shümpuke yu ne ok.

³⁵Hangjingne tüopa-a hankhak kih-e kahtoknyu kahtalan nopu tangme peilak.

³⁶Tüokhei numan kentinge ngohyah hüyange peikülak üshei me yinpu oklak jingne hüyange Kahta Üha sheshao me yongpu oklak nanjingne, jinte yoppe ngohyah.”

³⁷Hüyange nyihjeih she Iye khümjing me konnyüo, hüyangpoi wangnyak me Olive Kahtang yeme taiye phapan hipak win.

³⁸Hüyange napning shomme I ngao jailak jingne kahta üshei khümjing me I shongte pei.