Read Konyak Naga LUK 22 Bible Online

LUK 22 - Konyak Naga bible

LUK 22

¹Sha-a do yenyütpu an mo, hanghepa te Yinyepu Mo she nyikyapeih tüopa mo owe pei.

²Ngengpalan hüyange ngaokeng konnyüopalan ne Jesu toilak ülam lowe yam; hangjingne kahtalan te iman nyam.

³Hüwante Iskariot she nyikpu Judas, pinlan pen-me-ni yome ja te kahshih ong.

⁴Tüokhei ngengpa hei yopnok yompu üyonglan tangte Judas taiye, iman yakme Jesu phünne phapu oklak ngao i.

⁵Hüyange iman yeonge mongmei, hüyange Ite ngin phalak jingne tümme ngao.

⁶Judaswe tüopa ngao mongte onge yah hüyange kahtalan te tüopa jeng shingne yetampe imante Jesu phowe phalak hipak ümei Iye leiye ngoh.

⁷Tüopa nyih do yenyütpu an mo hüyange Yinyepu mo jingne nyeeha toipu nyih ne pei.

⁸Jesuwe Peter hei John nite tüopa ngao iye shon: “Taitüoh hüyange teman-e hahlak jingne yinyepu mo tümtüoh.”

⁹Imniye Ite tong, “Toman-e üme kenme tümne tamhunangki?”

¹⁰Iye imante jan; “Jaitehu! Numan chingnyu te ngoipu phei jam jamshe yengtük kiyange kahta ja hüolak. I pheite woiye I ngoipu nokte ongtüoh;

¹¹hüyange nokpupa te hüke itüoh: ‘Konnyüopawe nangte hüke ipu üja: ü pinlan hüyange Taowe Yinyepu mo hahlak nyoi üme ngoh nangki?’

¹²Iye yeonge meiye tümyangpu nok ütokpa nyoi hüophalak; tüoken me numan-e lampheli tümlak.”

¹³Iman yanne tai hüyange Jesuwe iyangpu kih lamphe li tüo, hüyange Yinyepu mo tüm.

¹⁴Aope hipak ngoipei, pinlan phei Jesuwe yoi nyoijing khao me shot.

¹⁵Hüyange Iye imante i: “Tao shange pongshao me numan phei tüopa Yinyepu mo teshinne hahhu!

¹⁶Hangjingne Taowe numante tüo ngao inang, Kahwang ahngching me hatüopa ütahte manngai manngai Taowe tüopa mo yehahlak;”

¹⁷Tüophei me Jesuwe wan ja yah, Kahwang te minyong pha, hüyange Iye i, “Tüopa yahtüoh hüyange numan teitamyah;

¹⁸hangjingne Taowe numante inang Kahwang ahngching manpei manpei sha-a me peiye Taowe tüopa wulick yeng yeyinglak.”

¹⁹Tüophei me Iye an yah, Kahwangte minyong pha, tüopa khoih, hüyange imante hüke iye pha, “Hatüowa numan jingne phapu ü-püm. Tao teihtüowe tüopa jontüoh.”

²⁰Tüokih-e muh hah phei me Iye imante wan phayange hüke i, “Tüopa wan-a ü-iy me jiengjeppu üla ngohnang, hanghepa numan jingne shai.”

²¹“Hüpoi leihu, ao yakke Tao lowe tam, Iya ü-phei khao me jamme ngohnang!

²²Hangjingne Kahwange tümyangpukih, Kahta Üha lilak; hüpoi I lowe tampupa jingne hangshin yemeipu!”

²³Tüophei me tüopa linglak jingne iman yo me ao ngailak she iman teitongne ükong wang.

²⁴Iman yo me ao üyongpa ne menglak she pinlan yo me teingaowe mop ngai.

²⁵Hüwante Jesuwe imante i: “Tüopa kahtoknyu ahnglan-e, iman pinnyuha tangme wong ngohnang, hüyange wanglamlampa lante pinnyuha shempalan she nyik nang.

²⁶Hüpoi numan jingne tüopa ne yeje, hüleima, numan yo mepu üyongpa-a üjoipa leye ngohyah, hüyange woipa-a shaoshanpa ja leye ngohlak.

²⁷Hüma-a ao üyongpa ne menglak, khao me hahne shotpupa heiya namnowe Ite phapupa? Khao me shotpupa muh üyongpa. Hüpoi aowe namnowe pha, tüopa leye Tao numan phei ngoh nang.”

²⁸Üte shangne tampu hipak lili me numan ü-phei ngohyangki.

²⁹Hüyange üpawe wanglam lamlak wong phapu kih-e, taowe numan phei hükih-e teimongpu linglak.

³⁰Ü-ahngching phongshong khao me numan hahlak hüyange yinglak, hüyange Israel jat penme ni ngao phünlak jingne ahngpa shotjing me numan shotlak.

³¹“Simon, Simon! Jaiyah! Kahhampawe üphan mepu tahlick lepukih, numan üshei te toklak jingne satanne wong yahteki.

³²Hüyangpoi Simon, nang ütinglakpu mepu ye-okpu ye-ngetamlak jingne Taowe nang jingne yopyangki. Hüyange aope ü-tangte lüppe yelakei, nange nang jeinaolan wongnange tamlak.”

³³Hüpoi Peterwe jan, “Youngwanpa, küpnok ngoiye nangphei tailak hüyange lilak jingne tao tümyange ngoh nang!”

³⁴“Jesuwe jan, Taowe iphaning Peter,” “Nange lümme Tao yeshing she manjan manjan tenyih awha yekolak.”

³⁵Tüophei me Jesuwe imante i, “Aope Taowe numan ngin-nyekhok, nyekhok, yejema-a yashom yenangpe tei, numan ülam jawe nehoi yewangpe ngohya shi?” Iman-e jan, “Yewangpe hango yenang ei.”

³⁶Jesuwe i, “Hüpoi sha-a, aome ngin-nyekhok yejema-a nyekhok ngoh ngaitüoh; hüyange aoyinne yanglow yenang iman-e yoi phakshaoh yaoyange hüyange ja shaktüoh.

³⁷Hangjingne Taowe numante tüo inang Laishipa me tüo inang, ‘I-o ümeng lingpalan phei om,’ tüopa ütingme üte ngailak. Hangjingne üjingne hanghepa nyan ütingme ngaiteki.”

³⁸Pinlanne i, “Youngwanpa, leihu! Tüome yanglow ni ngohnang,” hüwante Iye jan, “Hatüowe wangpu!”

³⁹Jesuwe chingnyu tüohyange I wanglamke Olive Kahtang te ong; hüyange pinlan I pheite woi.

⁴⁰Hüyange aope nyoijing te I pei Iye imante i, “Ütuh me yeyeilak jingne numan-e yoptüoh.”

⁴¹Tüophei me iman mepu I shejai she taiye yatuh shingyange yop.

⁴²“Opa,” Iye i, “Nange mongma-a, ü-mepu tüopa wan yahtepha. Hüke jeyapoi, ümongne yeje, hüpoi nange mongpu lingpha.”

⁴³Hüwante I tangte wangdang shongmokpa pei hüyange wong nange tam.

⁴⁴Hüyange yeonge innyaiye mongkhah ngaipu phei Iye yop; hüyange I mepu ngaipu wanglüm iy sehpukih-e ngaiye kahtokte yei.

⁴⁵Hüyange aope I yoppu sho, hüyange pinlan tangte I leihye, hüyangpoi jamloi mongmengpu kaiye iman shiye ngohpu nge.

⁴⁶Hüyange Iye imante i, “Hangne numan shiye ngohpu shi? Lüotüoh hüyange numan ütuh me yeyeilak jingne yoptüoh.”

⁴⁷Aope I yelakpe ngaowe ngohyapeih hüwante ükhong owe pei, hüyange Judas she minpu pinlan penme ni yo mepu jawe woiyange pei, hüyange Jesu phei hüone I shaoyete kemme pei hüyange Ite omhüp.

⁴⁸Hüpoi Jesuwe i, “Judas, ütingme om ja me hüppu kaiye nange Kahta Üha yüopu a?”

⁴⁹Aope Jesu phei ngohpu pinlanne, hanghe ngailak iman-e nge, hüyange hüke i, “Youngwanpa, toman yanglow phei lük hahyao!”

⁵⁰Hüyange iman yomepu shejawe ngengpa ütah rhapa te lük hüyange I yakjah ye na lange win.

⁵¹Hüpoi Jesuwe janne i, “Hükihpu shaaji ülinglak!” Hüyange Iye tüopa kahtapa nate jon hüyange meiye tam.

⁵²Tüophei me I pho ne peipu ütahpa ngengpalan hüyange khümjing tepu nyanpa ütahlan hüyange jeiyonglan te Jesuwe hüke i: “Kuhpa ja phei tüi-e yongpu kih-e, yanglow hei peshüm phei numan peipu a?

⁵³Aope Tao numan phei khümjing me nyih jeih she ngoh, numan-e üte yak yele. Hüpoi tüopa-a numan hipak hüyange wangnyak wong.”

⁵⁴Tüophei me iman-e Jesu pho hüyange ngengpa ütahpa nok te woiye pei; hüyange Peter-o üjai me woi.

⁵⁵Nokshao longkon hotan me vün jak, Peter peiye tüome vünlüm meiye ngohpalan phei jamme shot.

⁵⁶Aope shaoshannyu jawe I-o vünlüm meiye shotte nge, Iye tingkhakke Ite lei hüyange i, “Tüopa kahta-o I phei ngohyangpu üja!”

⁵⁷Hüpoi Peterwe tüote lan: “Sheko, taowe I yeshing!”

⁵⁸Kenja ngohyang phei me kahta jawe I shinge pei hüyange i, “Nango iman yo me ja üja!” Hüpoi Peterwe janne i, “Kahta, tao yeje!”

⁵⁹Hüyange ghonda ja nanjing ngohyang phei me kahta jawe Ite yeonge kange i: “Tüopa kahta I phei ye-ngoh ja she ilak hangte-o nüngneilak yenangja, hangjingne I-o Galilee mepu!”

⁶⁰Hüpoi Peterwe janne i, “Kahta, nange hanghe jeng ngaoyapeih taowe yeshing!” Mokhshe, I ngaopu manlakpe ngohwante awha ko.

⁶¹Youngwanpa lüppe ye hüyange Peterte tingkhakke lei, hüyange Youngwanpawe ngaoyangpu Peterwe teihpei, “Teya awha ka shaome nange lümme Tao yeshing she ilak.”

⁶²Peter nokshaote yu hüyange yeonge ükhah ngaiye shap.

⁶³Sha-a Jesu neikonne ngohpu yompalanne Ite phoitam hüyange Ite shet.

⁶⁴Iman-e I mük büangne tam hüyange hüke i, “Aowe nangte shetnangki, itehu!”

⁶⁵Hüyange Ite yaolepu ülao ngao maawe iman-e i.

⁶⁶Aope wanghe ong, Jehudi jeiyonglan, ütahpa ngengpalan, hüyange ngaokeng nyüopalan jemmeta, hüyange iman jemjing me Jesu woipei.

⁶⁷Iman-e i, “Tomante ipha,” “Nanga Messiah a?” Iye janne i: “Taowe numante ima-a, numan-e üte üting yelaklak,

⁶⁸hüyange Taowe numante ngaoja tongma-a numan-e üte minjan ja.

⁶⁹Hüpoi sha-a me peiye Kahta Üha wongnangpupa Kahwang yak jah yeme shotlak.”

⁷⁰Hüwante iman üsheiye i, “Hüma-a, nanga Kahwang üha a?” Iye imante janne i, “Numan-e Tao üja she ipu shunang.”

⁷¹Hüyange iman-e i, “Teman-e ülao saki wongpong ne yeje; I nying nyingke yoi ju me ngaopu teman-e muh jaiyangki!”