Read Konyak Naga LUK 23 Bible Online

LUK 23 - Konyak Naga bible

LUK 23

¹Hüyange ükhong üshei yong hüyange Pilate tangte Jesu woi pei;

²ümeken me iman-e Ite ümeng yamne wang. “Ngaoleih iye teman kahtalan woipu tüopa kahta toman-e phoki, Ahngpate kahngin tahpha she iman te i, hüyange I nying nyingke Iya Khrista, hüyange ahngpa she i.”

³Pilate Ite tong, “Nanga Jehudilan ahngpa a?” “Eihja, nange Tao üja she iyangki,” she Jesuwe jan.

⁴Tüophei me Pilate ütahpa ngengpa hüyange jamme ngohpu ükhong te i, “Tüopa kahta me taowe ümeng hango ye-nge.”

⁵Hüpoi iman-e ünyei ne teeye hüke i, “Iye kahta lilite konnyüowe powe pongyang küja! Iye Galilee me ükong wang, Judea kahtok üshei te kemme pong hüyange sha-a tüome ngoiye ngohnang.”

⁶Aope Pilate-e tüopa jai Iye tong, “Hatüo kahta-a Galillee lan a?”

⁷Jesuwa Herod-e wanglam lampu kahmük mepu she aope Iye shing, Iye Herod tangte Jesu shon, ao tüohipak me Jerusalem me ngoh.

⁸Aope Iye Jesu nge Herod yeonge mongmei, hangjingne I jeng Iye jaiye ngoh hüyange hipak yeonge laowe I ngehuwe teih-e ngoh; Iye Jesuwe lingpu yashan toi ütam ngehuwe teih.

⁹Tüokhei Herod-e Jesute ngao maawe tong, hüpoi Jesuwe ngao pha ja nehoi yejan.

¹⁰Ütahpa ngengpa hüyange ngaokeng nyüopalan sheshao yete ngai hüyange Jesu te yeonge yemeipe ngao.

¹¹Herod hüyange I yompalanne Jesute nyiyai-e hüyange Ite ye-i-yeshepu ngaowe tam. Iman-e yeonge meipu inkhek Ite inne tamyange Pilate tangte muh shonne ye.

¹²Tüonyih me peiye Herod hei Pilate ni shümpa ne meng; tüoshao me imanpa me wepa ne teingoh yangki.

¹³Pilate-e ütahpa ngengpa üjenglan, wanglam lampalan, hüyange kahtalan üshei nyik-e jem,

¹⁴hüyange imante hüke i: “Hatüo kahtawe kahtalan ünyong yete woinangki she iye numan-e ü-tangte pho pei. Sha-a numan-o omme tamyange taowe Ite tokke leipuweih, hüyange numan-e yemeipe Ite kanglak ne taowe I me ümeng hango ye-nge.

¹⁵Yejema-a Herodte-o I me ümeng hango ye-nge, tüone menge Iye temante I shonne yeyangki. Hatüo kahtawe lilak shange toi meng hango yeling puyang.

¹⁶Tüokhei Taowe Ite shetning, hüyange tüophei me I lanne teining.”

¹⁷Sha-a Yinyepu mo hipak lep iye Pilate-e iman jingne küppe angpalan yo mepu ja lanlak wongpong.

¹⁸Tüoyangpoi ükhonge ja ne menge üngwünne i, “I toitüoh! Toman jingne Barabbas lan pha!”

¹⁹(Iye chingnyu me chingphei weih-e mop ngaipu jingne hüyange kahta toipu jingne Barabbas küpnok me ang.)

²⁰Pilate-e Jesu lanne teihu; tüokhei ükhong te Iye nishe ngao.

²¹Hüyangpoi iman-e üngwünne ye, “I tangpem me taktüoh! Tangpem me taktüoh!”

²²Pilate-e imante lüm she ngaowe i, “Hüpoi Iye hanghe ümeng lingyangpu shi? Lilak ne Iye ümeng lingyangpu taowe ye-nge! Taowe Ite shetne tamlak hüyange I lanlak.”

²³Hüyangpoi yelakpe Jesu tangpem me eptamtüoh she iman-e yeonge üngwün; hüyange ükümne iman-e üngwünpu ütahte ngai.

²⁴Tüokhei iman-e tongpu linglak jingne Pilate-e Jesu toine phünne pha.

²⁵Iman-e yah-hupu kahta Iye lanne tam, aowe chingphei weih-e mopngai hüyange kahta toi, hüyange iman-e mongpu kih linglak jingne Jesu lanne pha.

²⁶Hüyange aope iman-e I woitei, Sairin mepu Simon üjai me peipu ngeye, iman-e pho, hüyange Jesu pheite tangpem pailak jingne Ite tangpem-a paine tam.

²⁷Hüyange ükhong üngang Iphei te woi, hüyange shekolanne iman jakuhte tüppe I jingne yeonge mangshappe woi.

²⁸Hüpoi Jesuwe iman yete lüppe yeyange i, “Jerusalem hayimlan, ü jingne tahshap, hüpoi numan hüyange numan hayim jingne shapyah.

²⁹Hangjingne leihu, nyih hei hipak peiküki, hanghepa me iman-e ilak, moikolan, hüyange aope-o nao yepuhpalan, hüyange aope-o düamyingne yetampalan mongmeilak.

³⁰Hüwante iman-e kahtanglante ilak, ‘Toman tangme yeitüoh,’ hüyange kahkenglan te ilak, ‘Toman te küppha!’

³¹Hangjingne iman-e pee ühüng me ngohwante tüolan lingma-a, pee üli me hanghe linglak?”

³²Hüyange ümeng lingpu ülao kahta-o ni I phei li ne tamlak jingne woipei.

³³Hüyange aope iman-e “Shangwaan” she nyikpu nyoite pei, tüome iman-e I tangpem me daktoi; hüyange ümeng lingpu ja I yak jah yeme, hüyange ja I yaknya yeme tangpem me daktoi.

³⁴Hüyange Jesuwe i, “Opa, imante ümeng wintüoh, hangjingne iman-e hanghe lingnang tüopa iman-e yeshing.” Hüyange iman-e I jing inkhek iman yo me tamlak jingne phongyeng.

³⁵Hüyange kahtalanne leiye yong; hüpoi wanglamlampa lanne-o Ite phoiye i, “Iye eiha yin ok; I nying nyingke yinne tamtüoh, I Khrista Kahwange leye ngaipupa ne mengma-a!”

³⁶Hüyange kengphet lanne-o Ite phoi, owe wenne Ite ükhah yeng pha;

³⁷hüyange i, “Nang Jehudilan Ahngpane mengma-a, nang nying nyingke yintüoh!”

³⁸I shangtang me-o hüke nyanpu ngoh, “Hatüowa Jehudilan Ahngpa.”

³⁹Hüyange ümeng lingpa tangpem me eppu jawe Ite yaoweleye i, “Nang Khrista ne yeje a? Nang nying nyingke hüyange toman-o yinkei!”

⁴⁰Hüpoi ülaopawe Ite janne teeye i, “Nange-o shaoshipu jakih-e ngeyange, nang Kahwangte yenyampu a?

⁴¹Hüyange temanpa-a ütingme shupu; hangjingne teman-a teman toishao phei shuwe ümee tüonangki. Hüpoi tüopa kahtawe hang ümengo yeling.”

⁴²Hüyange Iye i, “Jesu, aope nang ahngching te peilakeih, tao teih-e tüoyah!”

⁴³Hüyange Jesuwe Ite i, “Ütingpa me Taowe nangte inang, tenyih nang ü-phei chingmei nyoi me ngohlak.”

⁴⁴Hüyange sha-a hipak penme ni paji nanjing ne ngoh, hüyange lüm paji ngoiye kahtoknyu üshei me wanghe ütee yengaipe nyakke mah.

⁴⁵Aope wanghe ütee yepha ok; hüwante khümjing me tienpu nye ni ne tang.

⁴⁶Hüwante Jesuwe ngao üyong ngaiye üngwün phei me, ngaowe i, “Opa nang yak me Taowe Ü yaha phanang!” Hüyange tüopa ngaoyang phei me, I lüo mah.

⁴⁷Hüyange aope gho ja woipawe hanghe ngai tüopa nge, Iye Kahwang te yihluwe i, “Ütingme tüopa-a khakshupu kahta ne ngohyangki!”

⁴⁸Hüyange aope tüome jemme ngohpu bangha khongkümpuwe hanghe ling tüopa nge, iman jakuh te tüppe nokte yan.

⁴⁹Hüyangpoi Iphei teishingpu üshei hüyange Galilee mepu I pheite woipu shekolanne üjai me tüolante leiye yong.

⁵⁰Sha-a Joseph she minpu Jehudi ching Arimathea mepu kahta ja ngoh. I-a kahta ümei, hüyange khakshupu, hüyange ngao ipalan yo mepu ja ne ngoh:

⁵¹aowe iman kon hüyange toi me ye om, hüyange Iye Kahwang ahngching peilak te leiye ngohyangki.

⁵²Tüopa kahtawe Pilate tangte taiye Jesu mang yu.

⁵³Tüophei me Iye tüopa yei-e nye ükhaiye nyeih, hüyange long watte lingyange ngohpu kahta aope-o man mupu mangkoksa me I ang.

⁵⁴Hüyange tüopa tümtapu nyih ne ngoh, hüyange Sabbath oteiye ngoh.

⁵⁵Hüyange Galilee mepu I phei peipu shekolan I pheite woi, hüyange I mang hangke ange ngoh mangkoksa te lei;

⁵⁶tüophei me iman leihye, hüyange üpe ümei hei pholak tüm. Sabbath me iman-e ngaokeng kih-e toloi meiye nyoi.