Read Konyak Naga LUK 24 Bible Online

LUK 24 - Konyak Naga bible

LUK 24

¹Hüpoi hat me üwangpu nap wangngai shaome shekolan iman-e tümpu üpe ümei yahyange mangjong te pei.

²Hüyange mangkoksa mepu longa shunge winyange iman-e nge,

³hüpoi aope iman üsha te ong iman-e Youngwanpa Jesu mang ye-nge.

⁴Hüyange tüo ngai, iman tüopa jingne nüngneiye ngohwante, mokhshe kahta ni phihlangpu inkhek inyange iman phin me yong;

⁵hüyange nyamme iman sheta kahtokte khuhta wante iman-e imante, “Hangne numan-e üyin-a lipu yo me yampu shi? I tüome yenang; hüpoi yange ye ngohnang!

⁶I aope üne-o Galilee me ngoh, Iye numante hangke i, teih tüoyah,

⁷hüke Kahta Üha ünulan yak me phünne phalak, hüyange tangpem me taklak, hüyange nyih lüm shepupa me nishe yange yelak she i.”

⁸Hüwante shekolanne I ngaolan teihtüo.

⁹Hüwante iman-e mangjong mepu leihye-e, hüyange tüolan üshei pen me ja te hüyange ülao khongkümpu te i.

¹⁰Hüyange iman-a Mary Magdalene, Joanna, hüyange Jeams ünyu Mary ngohyangki; hüyange iman phei ülao shekolanne kahta lante tüolan i.

¹¹Hüpoi tüolan ngao khongkümpu pinlan shaome jajang japu ngaopu ne meng, hüyange imante üting yelak.

¹²Hüpoi Peter yayonge mangjong te phet, hüyange Iye khuh tawe ümongte leiwante, Iye nye ükhai hei ülao nyoi me nge. Hüyange hanghe ngai she yashanne Iye yoi nokte ye.

¹³Tüopa nyih memuh iman kahta ni Jerusalem mepu mile nyit phei me tangkhüw, jaipu Emmaus chingte taiye ngoh,

¹⁴hüyange hanghe ngai, tüolan khongkümpu jeng imnipa me teingao.

¹⁵Aope iman-e jamjamshe ngaowe teitong kemwante, Jesu imni yome pei, hüyange iman phei tai.

¹⁶Hüpoi I shinglak mepu iman mük büange ang.

¹⁷Hüyange Iye imante i, “Numan kemwante teingaopu ngaowa hanghe shi?” Hüwante sheta yengaipe iman-e yepope yong.

¹⁸Hüyange iman kahta ja Kleopas she minpuwe janne Ite i, “Jerusalem me nyoiyange tüome tüolan nyih hipak me hanghe ngai sha-a ngoiye yeshingpu-a nang ja shing a?”

¹⁹Hüyange Iye imante i, “Hangkih-e?” Hüyange iman-e Ite i, “Nazareth mepu Jesu jeng ao ngao hei toi me Kahwang hüyange kahta üshei tangme wongnangpu hipa ja ne ngoh;

²⁰hüyange hangke ngengpalan hüyange teman wanglamlampa lanne I li ne tamlak jingne yeine tamme phünne pha, hüyange I tangpem me ep.

²¹Hüpoi I Israel Yinyepa ngoh nang she toman-e monghümme ngohyangki. Eiyang, tüolan khongkümpu kaiye, tüolan ngaiyang phei me sha-a nyih lüm shepupa ngohnang.

²²Tüopahi angyange toman eihalan sheko ütamme toman yashanne tam. Napning shomme iman mangjong me ngoh,

²³hüyange I mang ye-nge; wangdang shongmokpalan ngaipu nge she, hüyange I üyin me ngohnang she iküja she iye iman leihye.

²⁴Hüyange toman phei ngohpu ütamme mangkoksate leine wenne shekolanne ipuke nge, hüpoi iman-e I ye-nge.”

²⁵Hüwante Iye imante i, “O üngapalan, hüyange hipalanne ipu üshei monglaowe menglaklan!

²⁶Khrista tüopa shangepongpu ngeye I müktishiwa te onglak wongpong ne yejepu a?”

²⁷Hüyange Mosa hei hipalan üshei mepu wange laingao üshei me I jeng nyanpu Iye imante khoih-e hüo.

²⁸Tüokhei iman ümeken me taiyapeih tüopa ching owe pei. Jesu I üne-o tailak kih hüo,

²⁹hüpoi iman-e Ite henge i, “Toman phei ngohkei, hangjingne shaaji ün ngoinang hüyange nyih-a yeonge taiteki.” Tüokhei I iman phei jamme ngohlak jingne ong.

³⁰Hüyange tüo ngai, aope Iye iman phei hahlak jingne shot, Iye an yahpuwe moiman, hüyange tüopa khoih-e imante pha.

³¹Hüwante iman mük eppe ngai, hüyange iman-e I shing. Hüpoi iman-e ye-ngepe I mah.

³²Hüyange imanpa me teingaowe i, “Lamme Iye teman phei ngaowe laingao khoih-e hüowante, teman mongme powe yeteih a?”

³³Hüyange tüopa hipak memuh iman yayonge Jerusalemte leih ye hüyange penme ja hüyange iman phei ngohpalan jamshe jemme nge,

³⁴hüyange i, “Youngwanpa ütingme yange yeteki, hüyange Simon tangte ngai!”

³⁵Hüyange lamme ngaipulan hüyange hangke an khoihwante Iye imante shingne tam, she iman-e ngao.

³⁶Hüyange iman-e tüolan ngao ngaowante, Iye yoi nying nyingke iman hotan me yong (Hüyange imante i, “Numan phei chingmei ngohtüoh.”)

³⁷Hüpoi iman mokh hüyange nyam, hüyange moung ja ngenang she teih.

³⁸Iye imante i, “Hangne numan shangpu, hüyange hangne numan mongjang me teitongpu shi?

³⁹Ü-yak hüyange ü-yate leitüoh, tüopa-a ütingpa Tao. Üte jontehu hüyange leitüoh, hangjingne numan-e Tao ngepuke yaha ja te mei hei üwaan yenang.”

⁴⁰Aope Iye tüo ngao, Iye yoi yak hüyange ya imante hüo.

⁴¹Hüyange aope iman üne-o mongmeipuwe ütingyelak okpe yashanwante, Iye imante i, “Tüome numan-e hahlak ütam ngohyah?”

⁴²Iman-e Ite nyah üyang üpüm ja pha,

⁴³hüyange Iye tüopa yah, hüyange iman sheshao me hah.

⁴⁴Hüyange Iye imante i, “Tüolan-a Ü-ngao hanghepa Taowe numan phei ngao, Tao aope üne-o numan phei ngoh, hüke Mosa ngaokeng hüyange hipalan hüyange Tüowelaihem me üjingne hanghe yin nyan, tüolan-a ütahte ngailak she i.”

⁴⁵Hüwante iman-e laingao shinge oklak, Iye iman kenmong eppetam,

⁴⁶hüyange Iye imante i, “Hüke hatüo nyanne ngohnang, Khrista shanglak, hüyange nyihlüm shepupa lipu mepu yange yelak,

⁴⁷hüyange Jerusalem mepu wange jat üshei monglüppu hüyange ünu winpu jeng I min me konnyüolak.

⁴⁸Tüolan jingne numan saki ngohnang.

⁴⁹Hüyange leihu, Üpawe janpu Taowe numan tangte shonnang, hüpoi ütang mepu numan tangte ünganwong manpei manpei numan chingnyu me nyoitüoh.”

⁵⁰Tüophei me Iye iman Bethani yekao yete woi, hüyange Iye yoi yak nowe honge, imante moiman tam.

⁵¹Aope Iye imante moimantam, I iman mepu yan, hüyange wangdangte woi in.

⁵²Hüyange iman-e Ite khüm, hüyange mongmei üyong phei Jerusalemte leih ye.

⁵³Hüyange Kahwang minyonge, iman khümjing me yelakpe ngoh.