Read Konyak Naga LUK 3 Bible Online

LUK 3 - Konyak Naga bible

LUK 3

¹Ahngpa Tiberius wangpeng penme nga shepu wanglam lampu wangme, Judea me Pontius Pilate governor ne, Galilee me Herod wanglam lamwante, hüyange Inao Philip Iturea hei Trachonitis yikeng me wanglam lamwante, Abilene me Lisanias wanglam lamwante,

²hüyange ütahpa ngengpa ne Annas hei Kaifas ngohwante; tüohipak me wanwüng jeng me Zekharia üha John tangte Kahwang ngao pei.

³Tüokhei Jordan yengyin yikeng neiye John tai. “Nang monglüppe baptitüoh, Kahwange nang ünu winphalak, she Iye konnyüo.”

⁴Isaia hipa laitep me tüopa ngaolan nyanpu kih-e: “Wanwüng jengme ütamme üngwünpu ja, I jingne Youngwanpa lam tümtüoh, I kemlak lamjong tingkhak-ange lingtüoh!

⁵Kahkook nyoi üshei maalak, wak hei pieng üshei kahjee ne menglak; kompu lamnyu tingkhak ange linglak, yeshinpu lam shinne linglak,

⁶hüyange kahtanyuha (mei) üsheiye Kahwang mepu yinyepu ngelak!”

⁷Iye baptiye tamlak jingne kahta ükhong maawe John tangte pei. Iye iman te i, “Numan pu hayimlan! Peine ngohpu Kahwang mongshih pu mepu numan yinphalak she aowe i ei?

⁸Numan monglüp teki she hüowe oklak toi lingtüoh; Hüyange numan yo me, ‘Abraham-a teman üpa she ine tahyong.’ Taowe numante ipha ning, Kahwange tüopa long yahpu oklak hüyange Abraham hu hei ha ne lingne tamlak!

⁹Üya me pheakke pee akke winlak jingne sha-a muh wa tümteki; ülick ümei yelickpu pee üshei aklak hüyange vün me jaklak.”

¹⁰Kahtalan-e Ite tong, “Hüma-a toman-e hang linglak shi?”

¹¹Iye jan, “Ao me phakshaoh ni ngoh, lanshe yenangpupate ja phatüoh, hüyange aoyinne hahlak ngoh tüolane-o hüke tamtüoh.”

¹²Kahngin shaipalan ütam baptilak jingne pei, hüyange iman-e Ite tong, “Konnyüopa, toman-e hang linglak shi?”

¹³Iye imante i, “Numan-e halan shin-e hei shailak she ngohpu tokte nyeiye tah shai tüowa yeshupu toi.”

¹⁴Kengphetlan ne-o tong, “Toman-a hangke? Toman-e hang linglak shi?” Iye imante i, “Kange ngaoleih iye ao mepu-o ngin tah yah; hüyange nange tüopu le-ngin te monghah tüoh.”

¹⁵Kahtalan juteih üla ngaine wang, hüyange Johnte hatüowa Messiah heiya she teih-e yashanne ükong wang.

¹⁶Tüokhei Johnne iman üsheite i, “Taowe numante yenge bapti nang, hüyangpoi ao ü-phei sheyong pupa ngohyapeih tüopa peikülak. I yashom wu lanne nehoi tao yewang. Iye numante Yaha Üjao me hüyange vün me bapti phalak.

¹⁷Tahphan üshei teppe winlak jingne Iye yoi tahnoijing hei oun ngohnang, ülick pheipu tah üshei yoi bungme yolak, hüyangpoi Iye tahphan üshei yemeipu vün me jaklak.”

¹⁸Tüokhei Iye pungao ümei nyüowante kahtalanne shinglak jingne yoi yoi lamme Johnne ngaowe nyüoyangki.

¹⁹Hüpoi wanglam lampa Herod-e yoinao sheko Herodia yahpu jingne hüyange ünu maawe lingpu jeng Johnne yemeipe ngao.

²⁰Tüophei me John phowe küpnok me angpu kaiye Herod-e ünyei ne ünu omyangki.

²¹Sha-a aope kahta üshei bapti Jesu-o bapti. Aope Iye yopyapeih wangdang taküp ep,

²²hüyange pümme hüowe awshu lepu me Yaha Üjao I tangte yu. Hüyange wangdang mepu ngao ja pei: “Nanga ü-mongkenpu üha. Taowe nangte yeonge monghah nang.”

²³Aope Jesuwe toikong wangyapeih, wangpeng delüm jaju ngoiteiye ngoh yangki. I netan naha ja. Tüokhei Heli üha Joseph, (üha heiya she kahta lanne teihnang.)

²⁴Matthat üha, Levi üha, Melkhi üha, Jannai üha, Joseph üha,

²⁵Mattathias üha, Amos üha, Nahum üha, Esli üha, Naggai üha,

²⁶Maath üha, Mattathias üha, Semein üha, Josekh üha, Joda üha,

²⁷Joanan üha, Rhesa üha, Zerubbabel üha, Shealtiel üha, Neri üha,

²⁸Melkhi üha, Addi üha, Kosam üha, Elmadam üha, Er üha,

²⁹Joshua üha, Eliezer üha, Jorim üha, Matthat üha, Levi üha,

³⁰Simeon üha, Judah üha, Joseph üha, Jonam üha, Eliakim üha,

³¹Melea üha, Menna üha, Mattatha üha Nathan üha, David üha,

³²Jesse üha, Obed üha, Boaz üha, Salmon üha, Nahshon üha,

³³Amminadab üha, Admin üha, Ami (Ram) üha, Hezron üha, Perez üha, Judah üha,

³⁴Jacob üha, Isaac üha, Abraham üha, Terah üha, Nahor üha,

³⁵Serug üha, Reu üha, Peleg üha, Eber üha, Shelah üha,

³⁶Kainan üha, Arphaxad üha, Shem üha, Noah üha, Lamekh üha,

³⁷Methuselah üha, Enokh üha, Jared üha, Mahalaleel üha, Kainan üha,

³⁸Enos üha, Seth üha Adam üha, Kahwang üha.