Read Konyak Naga LUK 4 Bible Online

LUK 4 - Konyak Naga bible

LUK 4

¹Jesu, Yaha Üjaowe maawe, Jordan mepu leih ye hüyange Yahawe wanwüng jengte woitei;

²ümeken me kahshih-e Ite nyih deli tokpu pha. Tüolan nyih hipak me Iye hango yehah, hüyange aope tüolan üküm ngoi-e pei, tüophei me I seanyao.

³Kahshih-e Ite i, “Nang Kahwang üha ne mengma-a, hatüo longe an ne menglak itüoh.”

⁴Hüpoi Jesuwe jan, “Ngaolaiye inang, ‘An’ shaha phei kahta üyin yengoh ok.”

⁵Nishe shedaopupa kahtang te woiye inne kahtoknyu ahngchinglan üshei hüo.

⁶Hüyange kahshih-e Ite i, “Taowe nangte hatüolan wong üshei, hüyange toinyu nanha üshei phalakei.” Tüome ngepu üshei üte phayangki, hüyange ao taowe lelakei Ite taowe phapu oklak.

⁷“Nange ü-sheshao me ümme khümma-a, tüolan khongkümpu nangjingne menglak.”

⁸Jesuwe Ite jan, “Ngaolaiye inang, üyongpa Kahwang te nange khümtüoh hüyange I shaoshaha shantüoh!”

⁹Tüophei me kahshih-e Jerusalem te I woiye tei, hüyange yopnok shedaopupa me shot, hüyange Ite i, “Nang Kahwang üha ne mengma-a, tüomepu nang nying nyingke yüttüoh.

¹⁰Hangjingne ngaolaiye hüke inang, nang yiünge yahlak jingne Kahwange yoi shongmokpalan te ilak.”

¹¹Üne-o hüke inang. “Nang longme yashah hüowe yetamlak jingne iman yakke nang paiye yahlak.”

¹²Jesuwe Ite janne i, “Ngaolaiye hüke inang, ‘Nange üyongpa nang Kahwang te tahtok.’”

¹³Aope kahshih-e Jesu ülam lili me tokpu shoyapeih, hipak ütenja pu jingne I yanne tai.

¹⁴Tüophei me Jesu Galilee te ye, hüyange Yaha Üjao wong I phei ngoh. Ijeng ngaolan kahtok üshei yete wünge tai.

¹⁵Iye synagogue hei chingjem nyoi üshei me nyüo hüyange kahta üsheiye yihlupu pha.

¹⁶Tüophei me Jesu Nazareth te pei, ümeken me I jongyapeih, hüyange I wanglamke Sabbath me synagogue te pei. I Ngaolai ilak jingne yong:

¹⁷hüyange Isaia hipa laitee Ite pha. Iye laitee laan hüyange hüke ngohpu nyoi Iye tüo:

¹⁸“Youngwanpa Yaha üme ngohnang. Hangjingne toihalan te pungao ümei nyüolak jingne Iye tao minnga phowe tam; Sha-pu nokme ngohpalan tangte lanpu ngaolan pongtamlak Iye tao shon, mükmüopalan ngeye tamlak jingne, shaoshi yaliye angpalan lanne tamlak jingne,

¹⁹Aope Youngwanpawe yoi kahtalan yinlak tüopa wang shingne tamlak jingne!”

²⁰Tüophei me Jesuwe laitee küppe ye, shotte ngohpalan te phawe ye, hüyange shot. Synagogue me ngohpu kahta üsheiye Ite mük hü-ünge lei.

²¹Iye imante ngaone yong; “Sha-a ngaowante numan-e jaiyangki, tüopa Ngaolai ütingpa me tenyih peiteki.”

²²I kaiye iman üshei monghah ne tam, hüyange Iye ngao yangpu ngao meipute yashan. Iman-e i, “Hatüowa Joseph üha yeje a?”

²³Iye imante i, “Taowe ütingme iye oknang, numan-e tüopa detngao üte ilak, ‘Meiye tampupa, nang manmanke meitüoh.’ Üne-o numan-e üte ilak, ‘Hangyin nange Kapernaum me lingpu toman-e jai, hatüo muh tüome yoi kahtok me-o lingtüoh.’ ”

²⁴Hüyange Iye i, “Taowe numante ütingme inang, hipa-a aope-o yoi nyupuh kahtokke yeyah ja.

²⁵Ü-ngao jaikhu: Hatüowa üting, Elijah hipak me Israel yo me wamnyu maawe ngohyangki, aope wangpeng lüm lekeng wok wai yekei hüyange kahtok üshei yeme seanyao yenglepu üyong ngoh!

²⁶Hüke ngohyapoi Elijah-a Israel wamnyu ao tangte-o yeshon, hüyangpoi Sidon yikeng me ngohpu Zarephath wamnyu ja shahate shon.

²⁷Hüyange Elisha hipa hipak me Israel yo me ngonpa maawe ngoh; hüyangpoi Syrian kahta Naaman tokte kaiye, ja nehoi jaone yetam.”

²⁸Aope iman-e tüolan ngao jaiyapeih, synagogue me ngohpu kahta üshei mongshih ngai.

²⁹Iman yong, hüyange ching mepu Jesu janglak i, hüyange hanghe kahkeng me iman chingnyu nyoi ngoh, tüopa kahkeng wakme I üshang shongkülonge yeitai ne woiyetei.

³⁰Hüyangpoi iman pa me pit-e I kemme linne tai hüyange yoi lamte tai.

³¹Tüophei me Jesu, Galilee me ngohpu Kapernaum ching te tai, hüyange Sabbath me kahtalante Iye konnyüo.

³²Iye nyüopu konte kahta üshei yashan, hangjingne I ngao me üngan wong ngoh.

³³Ünu yahawe ompu kahta ja synagogue me ngoh, hüyange Iye ngao üyong phei üngwünne i:

³⁴“Hai! Nazareth mepu Jesu, toman phei nang hanghe linglak ngoh nangki? Nanga toman menge tamlak jingne tüome ngohnang kü a? Nang ao taowe shingnang; Nanga Kahwang mepu üjaopa Shongmokpa!”

³⁵Hüpoi Jesuwe ünu yaha te tee: “Yelangmanpe ngohtüoh hüyange kahta mepu ngaitüoh!” Iman sheshao me kahshihye tüopa kahta shunge shüp, hüyange Ite hang ümengo yelingpe yanne tai.

³⁶Kahta üshei yashan, hüyange iman-e teingaowe i: “Tüowa hangkihpu ngaoshi? Üngan hüyange wongphei, ünu yahate tüopa kahtawe ngaokeng pha, hüyange iman ütingme ngai!”

³⁷Hüyange iman-e kahtok üshei yete Jesu konyongpu ponge tai.

³⁸Jesuwe synagogue angyange Simon nokte ong. Simon ünyei tinye-e (jüodak) loishe dak-e ngoh, hüyange iman-e Jesute yha jeng ngao,

³⁹I wenne dak-e ngohpu lengshong me yong, hüyange dakyanlak jingne tinye te teeye ngao. Mamshe yha mepu dak yan, hüyange hüwante muh lüowe imante namnowe pha.

⁴⁰Sha-a wanghe nyip phei me, lamme lamme dakpu kahtalan iman shümpalanne Jesu tangte woiye pei; hüyange iman üsheite I yakke jon hüyange moilan meiye tam.

⁴¹Hüyange kahta maapu mepu ünu yahalan lüowe ngaiyange ütahte ngaiye üngwünne i, “Nang Kahwang üha!” Hüyangpoi Jesuwe imante teeye ngaone yetam; hangjingne iman-e Iya Messiah she shing.

⁴²Hüyange napning ching angyange I ngaiye wanwüng jeng ja te tai. Ükhonge I yam, hüyange iman-e aope I nge, I tangte peiye yanne yetailak jingne tük-hu.

⁴³Hüpoi Iye imante i, “Ülao chingnyu me-o Taowe Kahwang ahngching pungao ümei konnyüolak wongpong, tüopa toi linglak jingne Kahwange Tao shonyangki.”

⁴⁴Tüokhei Judea mepu synagogue üshei yeme Iye konnyüo.