Read Konyak Naga LUK 5 Bible Online

LUK 5 - Konyak Naga bible

LUK 5

¹Hipak ja me Jesu Gennesaret yengtung phin me yonge ngohwante, kahtalan Kahwang ngao jaine iman hei iman teishunge pei.

²Iye yengnah me lisheng ni nge, hüyange tüopa lisheng mepu nyah ompalan-a iman shaan poine taiteiye ngoh.

³Jesu lisheng ja te ong hüyange tüopa lishenga Simon jingne ngoh, hüyange lishenga yengnah mepu üjinghawe teilak jingne tong. Jesu lisheng me shotyange ükhong te konnyüo.

⁴Iye ngao iye shoyang pheime Simon te i, “Yeng shelupute lisheng wentüoh hüyange numan shaanlan nyah omlak jingne shaitüoh.”

⁵Simon-e jan, “Konnyüopa, wangnyak phapan toman yeonge ngang yangki hüyangpoi hango ye-om. Hüpoi, nange iphei ma-a taowe shaan shaiye nyaohu hahma.”

⁶Iman-e shaan shai hüyange shaan-o hitlak pa ne nyah maawe om.

⁷Tüokhei ülao lisheng me ngohpu shümpalan te, wenne imante jamlak jingne yakyüp. Iman-o wenne ngoi, moini lisheng nyah-e jamloi maa, yengme lisheng pa hümshe ta.

⁸Aope Simon Peterwe tüolan ngaipu ngeyapeih, Jesu sheshao me yatuh shünge ümme khüm hüyange i, “Oh Youngwanpa, ü-mepu yantepha, hangjingne taowa ünu kahta ja!”

⁹Hangjingne I hüyange Iphei ngohpu üshei iman-e ompu nyah te yashan.

¹⁰Simon shümpalan Jeams hei John Zebedee ühalan-o yashan; Simon te Jesuwe i, “Tahnyam, sha-a me peiye nange kahta omlak.”

¹¹Tüophei me iman-e yengphan ngoiye lisheng aiye ye, hüyange lamphe li angyange Jesu pheite woi.

¹²Hipak ja me Jesu chingnyu ja me ngoh hüyange tüopa chingme ngondake maawe kahta ja ngoh. Aope Iye Jesu nge, I sheta küppe büangyange ümme ta hüyange i, “Youngwanpa, nange mongma-a ü-dak jaowe tampu oklak!”

¹³Hüyange Iye yoi yak nowe Ite jonne i, “Taowe mongnang. Nang jaotüoh!” Mamshe ngondak I mepu yan.

¹⁴Jesuwe Ite ngaowe i, “Ao te-o tah i, hüyangpoi tingkhakke ngengpa tangte taitüoh hüyange Iye nangte leilak, taowa jaoteki she aoyinne teihyapeih tüolan-e dotüoh she Mosawe ngaopuke nange nang jaoyangpu jingne dotüoh.”

¹⁵Hüyangpoi Jesu hüyange I toishao kahtalan-e ünyei ne jaiye tai, hüyange kahta maawe I ngao jai ne hüyange yoi dak meine jem.

¹⁶Hüyangpoi wanwüng jeng yamme yoplak jingne I tai.

¹⁷Nyih ja aope Jesu konnyüowe ngoh, Galilee hei Judea hüyange Jerusalem ching lili mepu peipu Pharisee hei Ngaokeng nyüopalan shotte ngoh. Dakpalan meiye oklak ne Youngwanpa wong Jesu phei ngoh.

¹⁸Kahta ütamme yimtin dakpu kahta ja lengme paiye pei, hüyange iman-e Jesu sheshao me angne noksate inne ngang.

¹⁹Hüpoi kahta jamloi she ngohpu nanjingne iman-e noksa te inlak lam yetüo. Tüokhei iman-e noktok yete paiye in, hüyange jaklong ütam yahyange, Jesu sheshao me tinge kahtalan yo me leng phei yeiye tai.

²⁰Aope Jesuwe iman ütinglakpu nge, Iye kahta te i, “Kahta, nang ünu winyangki.”

²¹Pharisee hei Ngaokeng nyüopalan-e iman nying nyingke ngaowe i: “Kahwang phei tokteiye ngaopu hatüo kahta ao shi? Kahwang tokte kaiye aowe-o ünu winpu ye-oklak!”

²²Iman juteih Jesuwe shing hüyange imante i, “Numan mongjang me hüke hangne teihnangki?

²³Nang ünu nangte winyangki she ipu shemeilak heiya, yejema-a lüotüoh hüyange kemtüoh, she ipu she-o lak shi?”

²⁴Hüpoi hatüo numan-e shinglak, kahtoknyu me Kahta Üha me ünu win oklak üngan wong ngohnang she shinglak jingne, Iye yimtin dakpa te i Taowe nangte iphaning, “Lüotüoh, hüyange nang leng paiyah, hüyange nenokte leih yetüoh.”

²⁵Kahtalan üshei sheshao me, tüopa kahta mokhshe lüo, I lamyange ngohpu leng paiyange Kahwang minyonge nokte ye.

²⁶Hüwante iman üshei lanshe yashan; Nyampu phei iman-e Kahwang minyonge hüke i, “Tenyih hang yashan yalipu toi toman-e ngeyapu shi!”

²⁷Tüophei me Jesu nokshao te yu, Levi she minpu kahngin shaipa ja I toijong ken me shotte nge. Jesuwe Ite i, “Ü-phei te woikei.”

²⁸Levi nünge yong hüyange lamphe li angyange I pheite woi.

²⁹Hüyange Leviye Jesu jingne Inok me mo üyong tüm, hüyange kahngin shaipalan phei ülao kahtalan-o nangyange I phei shotte ngoh.

³⁰Iman phei jampu ükhong Pharisee hei Ngaokeng nyüopalan ütamme Jesu pinlante monge yehahpe langmanne i, “Kahngin shaipalan hei eiha jat phei hangne hah hei ying nangki?” she iman-e tong:

³¹Jesuwe imante janne i: “Meiye ngohpalan jingne meiyetampa wongpong ne yeje, hüyangpoi aoyin dakyapeih iman jingne hei wongpong.

³²Khakshupalan nyiklak jingne yeje, hüyangpoi ünu me ngohpu eiha jatlan mong lüppe tamlak jingne Tao pei.”

³³Kahta ütamme Jesute i, “John pinlanne yehahpe yelakpe yoppe ngoh, hüyange Pharisee pinlanne-o hüke muh ngoh ok, hüyangpoi nang pinlanne yelakpe hahying.”

³⁴Jesuwe imante i, “Aope nyemthepa iman phei jam-e ngohlakeih, nokyammo te peipu yinpalan nyaole ne yetamlak; numan-e hüke linglak a?

³⁵Hüpoi hipak ja peilak, aope nyemthepa iman mepu yah teilakeih, hüwante iman-e tüolan nyih hipak me nyaolelak.”

³⁶Jesuwe imante tüopa ngaolep i: “Aowe-o phakshaoh ülang shinglak jingne phakshaoh üla hitte yeyah. Iye hüke lingpu ne mengma-a, Iye phakshaoh üla hitte mengnang, hüyange phakshaoh ülang phei tüo yepah.

³⁷Yejema-a aowe-o meisho khok ülang me wuwüngti üla yehin; Iye hüke lingma-a wuwüngti ülawe meisho phüplak, wuwüngti shailak, hüyange nyekhok menglak.

³⁸Hüyangpoi wuwüngti üla-a meisho nyekhok üla me hinlak yang!

³⁹Hüyange aowe-o wuwüngti ülang yingyang phei me üla yeying hu; hangjingne ülangpa shemeiki she Iye inang.”