Read Konyak Naga LUK 6 Bible Online

LUK 6 - Konyak Naga bible

LUK 6

¹Hüyange tüo ngai, Sabbath me kah linne Jesu tai. I pinlanne nyinshao shaowe ngohpu tah yitte yah, hüyange iman yakpha me noiyange wong hah.

²Pharisee ütamme hüke i, “Toman Ngaokeng me yenangpu Sabbath yelinglak toi numan-e hangne lingnangki?”

³Jesuwe imante jan, “David hüyange I kahtalan seanyaowante hang lingpu numan-e ye-i a?

⁴Kahwang khümjing te I ong. Kahwangte dopu an Iye yah-e hahyange, yoi kahtalan te-o phayangki. Ütingme toman ngaokeng me-o ngohnang, ngengpa kaiye aowe hahlakei, Iye ngaokeng mengnang.”

⁵Hüyange Jesuwe hüke i, “Kahta Üha Sabbath tepu Youngwan ngohnang.”

⁶Ülao Sabbath ja me Jesu synagogue te ong hüyange konnyüowe ngoh. Yakjah ye yimdak pah-e wanne mengtepu kahta ja iman yo me ngoh.

⁷Pharisee hei Ngaokeng nyüopalan ütamme, Jesuwe wanglam phei yeshupu toi ütam lingma-a ümeng pho ne she Sabbath üjingha nehoi pienkei-o she leiye ngoh.

⁸Hüyangpoi Jesuwe iman juteih shing hüyange yak mengteiye ngohpu kahta te i, “Yongtüoh hüyange ü-sheshao me owe wenkei.” Tüopa kahta yong hüyange I sheshao me yong.

⁹Tüophei me Jesuwe imante i: “Taowe numante tongpuweih: Teman Ngaokenge Sabbath me hang linglak temante inangki? Ümeng linglak heiya jamlak? Kahta üyin ja yinne tamlak heiya menge tamlak?”

¹⁰Iye iman üsheite leiye pongyang phei me yakfaipa te ngaowe i, “Nang yak tingkhakke notüoh.” Hangke iyapeih Iye hüke ling, hüyange I yak üshong pukih mei.

¹¹Hüyangpoi iman üshei yeonge mongshih ngai hüyange Jesute hang linghah she iman taisho.

¹²Tüopa nyih hipak me Jesu kahtang yete yopne ong, hüyange wangnyak phapan tüome Kahwangte yoppe hipak win.

¹³Aope nyih üla ngaiyapeih Iye yoi pinlan I tang te nyik hüyange iman yo mepu penme ni leye, imante Iye lampulan she nyik (min):

¹⁴Simon (ao te Iye Peter she nyik) hüyange Inao Andrew; Jeams hei John, Philip hei Bartholomeo,

¹⁵Mattheu hei Thomas, Alphaeus üha Jeams hei Simon (ao te jatte kenpa she nyik)

¹⁶Jeams üha Judas hei Judas Iskariot ao lopa ne meng.

¹⁷Iman phei jamme kahtang mepu ye, hüyange kahjee me I pinlan maawe ngohpu yo me Jesu yong. Judea kahtok üshei mepu, hüyange Jerusalem mepu, hüyange Tyre hei Sidon yengnah chingnyu yin mepu kahtalan maawe jemme ngoh yangki.

¹⁸Iman üshei I ngao jaihuwe hüyange iman daktin meihuwe pei. Aoyin ünu yahawe toiteiye dakyapeih iman-o pei hüyange meiye tam.

¹⁹Kahta üsheiye Ite jonlak jingne ngang, hangjingne I mepu üngan ngaiye tai hüyange iman üshei meiye tam.

²⁰Jesuwe yoi pinlan te lei hüyange i: “Numan toinanpalan mongmeilak, hangjingne Kahwang ahngching numan jing!

²¹Sha-a aoyin seanyao yapeih numan mongmeilak; hangjingne numan mohlak! Sha-a aoyin shapyapeih numan mongmeilak, hangjingne numan nyilak.

²²“Kahta Üha jingne aope kahtalanne numante nulakei, hüyange numante teelakei, hüyange numan-a ünu she ilakei, numan mongmeilak.”

²³Aope hüke yaowe leye ipu hüolakei, numan mongmeipu phei hemlok tüoh; hangjingne khintak üyong numan jingne wangdang me angnang. Hangjingne, hipalante iman ülang lanne-o hüke muh lingyangki.

²⁴“Hüpoi sha-a hakpa ne ngohpu numan jingne onyukei: hangjingne nange mongpukih nang üyin ngoh yangki.

²⁵“Sha-a numan aoyin moh hahyange ngohyapeih onyukei: hangjingne numan seanyaopu phei ngohlak. “Sha-a numan aoyin nyiye ngohyapeih onyukei: hangjingne numan shaplak hüyange yoonglak.

²⁶“Aope kahta üsheiye numan meipu jeng ilakei onyukei: hangjingne tahleih hipalan te-o iman ülang lanne tüo meimei kih iyangki.”

²⁷“Hüpoi aoyinne ü-ngao jaiyapeih numante iphaning: nang wepa te kenyah, aoyinne nangte nulakei tüolante ümei lingtüoh,

²⁸aoyinne nangte phoi lakei moiman phatüoh. Hüyange aoyinne nang ünyong yete woilakei, iman jingne yoptüoh.

²⁹Kahta ütamme nangte jaye meng te epma-a, jayekao te-o epne Ite tamtüoh; kahta ütamme nang phakshaoh üyong yah ma-a üjoipa-o yahne tamtüoh.

³⁰Kahta ütamme nang mepu toi ütam yahhuwe tongma-a japhatüoh, hüyange kahta ütamme nang jing yah yange ngohma-a, yepha she tah yu.

³¹Nang te eihawe hangke lingne tamhuyapeih, tüo kih-e nange-o eihate lingtüoh.”

³²Numante aoyinne kenyapeih tüolan shahate numan-e kenma-a, moiman tüolak she hangke teihnangki? Aoyinne imante kenyapeih tüolan te ünulanne nehoi kennang!

³³Hüyange numante aoyin meiyapeih tüolan shahate numan-e meima-a, moiman tüolak she hangke teihnangki? Ünu lanne nehoi eihate meipu mannang!

³⁴Hüyange aoyinne nangte shümme yepu oklak she teihyapeih tüolan shahate nange üsea phapu ne mengma-a, hangke nange moiman tüolak she mongnangki? Ünu lanne nehoi iman shümpalante seaye phanang, phayangpu kih muh iman-e shümme yepu tüonang.

³⁵Hüpoi tüo yeje, numan wepalante kentüoh hüyange imante ümei lingtüoh, seane tamtüoh hüyange iman mepu shümme yekülak te mong tah hüm. Hüyange nange hünghao üyong tüolak, hüyange Ütahpa Kahwang üha ne nang menglak. Hangjingne eihate minyong phapu ye-okpu hei ye-ok yeshangpulan te I yeonge meinang.

³⁶Nangpa hangkih-e shüpshe phei ngoh tüo kih-e shüpshe phei ngoh yah.

³⁷“Ngaotahphün, hüyange numante-o ngaoyephünlak. Ümeng tahpha, hüyange nangte-o ümeng yephakülak. Ümeng wintüoh, hüyange nangte-o ümeng winkülak.

³⁸Phatüoh, hüyange tüowe nangte-o phakülak. Meiye-tok-heiye, sünge taitüoh, jam jamshe powe hüyange maaphai ne tamme, nang yungkeng ngoishe yünshok tamtüoh. Hangjingne nange jonpu tok-heipu tüowe nangte-o tok-heilok.”

³⁹Hüyange Jesuwe imante tüopa ngaolep ngaowe i: “Mükmüopa kahta jawe mükmüopa ja woipu oklak a? Yeoklak moini jhomte yeilak.

⁴⁰Konnyüopa phei aope-o naha üyongpa ne yeje: hüyangpoi naha lili aope shinge manne oklakei, konnyüopa kih mengpu oklak.

⁴¹“Hüyange nang mükme ongpu müksa te yeleipe, hangne nang jeihei nao müksa ongpu te leinangki?

⁴²Nang jeihei naote hangke ilak, nang mük mepu mak nehoi yelei okpe angyange nang jeihei nao ja te kei, nang müksa lei pha ning she hangke iye oklak? Nang jutok meipa, üwangne nang mük mepu mak hüng winyah, tüophei me nang jeihei nao mük me ngohpu mak nange meiye ngelak hüyange winpu oklak.”

⁴³“Pee ümei jawe aope-o pelick ümeng yelick, yejema-a ümeng ja me ülick ümei lickpu ye-ok.

⁴⁴Pee üshei iman me lickpu pelick me shingnang; hangjingne numan-e huhpee me phuklick yekhai yejema-a aweitingtei pee mepu wuwünglick yekhai.

⁴⁵Yoi mongjang me ngohpu juteih ümei kaiye kahta ümeiye juteih ümei ngainang: mongjang me juteih ümeng ngohpu kahta juteih ümeng ngainang. Hangjingne kahtawe ngaopuwa yoi mongjang me hanghe maawe ngohyapeih tüo hei ngainang.”

⁴⁶“Taowe numante ipu yelingpe angyange, hüyange hangne üte ‘Youngwanpa, Youngwanpa,’ she nyiknangki?

⁴⁷Aoyin ü-tangte pei, hüyange ü-ngao jaiye tüoyin linglakei I hangke ngohlak Taowe numante hüo phaning.

⁴⁸Iya long watte nokjing linge lulünge shaoyange nok wepu kahta leye ngohlak. Yengyong muleam pei hüyange tüopa nokte shung, hüyangpoi yenge yepo ok, hangjingne tüopa nok yeonge monge we.

⁴⁹Hüpoi aoyinne ü-ngao jai hüyange toine menge yeling, tüolan kahta-a nokjing yelingpe nok wepu ja leye ngohlak; Aope yengyong mulem pei hüyange tüopa nokte shung mamshe toiye ta, toi tapu tüopa nok hangshin yonge ngohlak!”