Read Konyak Naga LUK 7 Bible Online

LUK 7 - Konyak Naga bible

LUK 7

¹Aope Jesuwe tüolan khongkümpu kahtalante ngaowe shoyapeih. I Kapernaum te ong.

²Hüwante tüome ngohpu Roman woipa ja, Iye kenpu yoi shaoshanpa yeonge yemeipe dak hüyange pali she ngoh.

³Aope tüopa woipawe Jesu jeng jaiyapeih, Iye Jewish jeiyonglan ütam shonne, peiye yoi shaoshanpa meiye tamkhu she tonge Jesu tangte shon.

⁴Jesu tangte iman pei hüyange ümme khümme i: “Tüopa kahtawe nang wong ütingme wongpong ne mengnang.

⁵Hangjingne Iye toman kahta te yeonge kennang hüyange Iye toman jingne synagogue weye tamnang.”

⁶Tüokhei iman phei Jesu tai. Hüwante I nok mepu meiyange manjaipe ngohwante, Ite tüopa ngao iye, woipawe yoi shümpalan I tang te shon; “Youngwanpa, nang nying nyingke tahshang ngoh, hangjingne tenok yaoshüm phangte nang peitamlak, ü me wangpu yenang.

⁷Tüojingne ü-man manke nang tangte ü-püm ngoiye peilak nehoi yewangpu she teih. Hüpoi ngaopha ja phatüoh hüyange shaoshanpa meilak.

⁸Hangjingne tao-o ü-tok mepu üyongpa phang me ngohnang, hüyange üphang me kengphetlan ngohnang. Hüyange taowe sheja te nang taitüoh she ima-a I tainang, taowe tüopate nang peikei she itüohme peinang, hüyange taowe ü-rha te, tüo lingtüoh she ima-a Iye tüo lingnang.”

⁹Aope Iye tüo ngao jaiyapeih Jesu yashan, I tokphei me ngohpu ükhong yete leppe ye hüyange i, “Taowe numante iphaning, Israel yo me nehoi hükih-e ütinglakpu kahta Taowe mannge!”

¹⁰Shong shonne teipalan woipa nokte leih ye, hüyange I shaoshanpa mei teiye nge.

¹¹Tüophei me nünge Jesu Nain chingnyu te tai; I pinlan hüyange ülao kahtalan maawe I phei tai.

¹²I chingnyu pejong ngoipu phei jamshe, mang lünge taipalan ngaipu hüo. Tüopa manga wamnyu üha I shaha ngohpu lipu ne ngohyangki hüyange I phei chingshao mepu kahtalan-o maawe ngohyangki.

¹³Aope Youngwanpawe wamnyu nge, I mongme yeonge yayenge teih, hüyange Iye shekonyute i, “Tahshap.”

¹⁴Tüophei me I owe wen hüyange mangsheng te jon, hüyange mangpaipalan lak. Jesuwe i, “Naoshe! Taowe nangte inang, lüotüoh!”

¹⁵Hüwante liye ngohpu kahta lüo hüyange ngao ine wang, hüyange Jesuwe Inyute I ye-e pha.

¹⁶Kahta üshei nyampuwe maa, hüyange iman-e Kahwang te müktishiwa tamme i: “Hipa üyong teman yo me peiteki!”

¹⁷Tüopa ngaolan hüyange Jesu jeng Judea kahtok hei chingyo yupi üshei yete ponge tai.

¹⁸Hüyange John pinlanne ngaipu ngaolan üshei Ite i. Hüwante Johnne yoi pin ni ngoiye nyik-e peiye

¹⁹Jesu tangte ngaotonglak jingne shon, “Peikülak she Johnne ipuwa nang heiya ülao kahta she toman-e monglak shi?”

²⁰Aope iman ngoiye pei iman-e Jesute hüke i, “Baptipa Johnne toman nang tangte shonküja, ‘Peikülak she Iye ipuwa nang a, heiya ülao kahta she toman-e tanlak shi?’ ”

²¹Tüohipak me Jesuwe dak meng hei daktinpu hei ünu yahalan mepu meitam hüyange kahta maawe mük eppe tam.

²²Johnne shongshonne peipalante Iye janne i: “Numan leih yetüoh hüyange Johnte tüo ngao itüoh: nange hanghe nge hüyange jai: Mük müopawe ngepu ok, yafaipa kempu ok, ngonpalan jaowe tam, napan palan-e jaipu ok, lipalan yange yepu ok, hüyange Pungao ümei ye-ok yeshangpalante nyüo.

²³Aowe tüolan jingne mong apu yenang I hangshin mongmeilak!”

²⁴Shongshonpalan yetephei me, Jesuwe ükhong te John jeng ine wang: “Aope John wanwüng jengte taiyapeih, hanghe ngelak she numan-e teih ei? Wangyang hok yenaopu ngeihyan heiya?

²⁵Numan hanghe te leine tai ei? Yejema-a kahta jawe bangni o opute leine tai ei? Ütingme aoyinne hükihpu o tümyapeih hüyange lengpukih ngoh tüolan-a Ahngnok me ngekülak!

²⁶Üte itehu, hang ngelak she numan-e teih ei? Hipaja heiya? Üting, Taowe numante ipha ning, numan-e hipa phei shenyeipu ngeyangki.

²⁷Hangjingne ngaolaiye ao jing iyapeih tüowa John, Kahwange i: ‘Ü-shongshonpa tüome ngohnang, taowe nang jingne lam eplak jingne nang sheshao me I shonlak.’ ”

²⁸Jesuwe nishe i, Taowe numante iphaning, “Inyuwe puhpu kahta üha yo me sheyong pupa-a John; hüyangpoi Kahwang ahngching me aoyin üjoipa ne meng iman I phei sheyong pupa.”

²⁹Kahngin shaipalan hüyange ülao kahta üsheiye I ngao jai, üjaopa Kahwange hanghe lengyapeih tüolan kahtawe jaiye lingyangki, hüyange iman üshei John kaiye bapti.

³⁰Hüyangpoi Pharisee hei ngaokeng nyüopalanne Kahwange mongpu iman-e yeyah hüyange John kaiye bapti ne yetam.

³¹Hüma-a sha-a hatüo jin kahtalan jingne Taowe hanghe phei phinne ngaolak shi? Iman-a hanglepu shi?

³²Iman-a hat me nahalan wonpu lenang. Ükhong jawe eihalan te üngwün, “Numan jingne nokyam mo hem hinnang, hüyangpoi numan yelok! Toman-e lipu hem lok, hüyangpoi numan yeshap!”

³³Baptipa John pei, hüyange Iye yehahpe nünne ngoh ok hüyange wuwüngti yeying, tüohipak me numan-e iyangki “Iya ngapa ja!”

³⁴Kahta Üha pei, hüyange Iye hahying, hüyange numan-e i, “Tüopa kahta te leitüoh! Iya ünu üshei ompupa hüyange yuyingpa, hüyange kahngin shaipalan hei eiha jat shümpa!”

³⁵Aoyinne üting she yahyapeih tüolan jingne Kahwang üngan ütingpa she hüoyangki.

³⁶Hüyange Pharisee kahta jawe I phei jamme yaning nük hahlak jingne Jesute nyik. Inok te Jesu pei hüyange nük hahlak jingne shot.

³⁷Tüopa ching me meiyange ünu toi jonpu sheko ja ngoh. Jesu Pharisee nok me peiye nük hahnang she yhawe jai, tüokhei yhawe üpi meipu minnga longsheng tük ja maawe yahpei,

³⁸hüyange Jesu yashong me tokphei yeme shapjang shappe yong hüyange I mükphiye Jesu ya team ne tam. Tüophei me yha shangmin ne I ya shit, hüyange ya te jüpjang jüppe üpi meipu minnga phowe tam.

³⁹Aope Phariseepa aowe Jesute nyik Iye tüo nge, hüyange yoi nying nyingke teihyange i, “Ütingme tüopa kahta hipa ne mengma-a, aowe Ite jonyapeih tüopa sheko, hangkihpu ünu toime I üyin ngohpei shinghah shepu!”

⁴⁰Jesuwe ngao ngai hüyange Ite i, “Simon, Taowe nangte ülam ja ilak ngohnangki.” Iye jan, “Konnyüopa, üte ipha;”

⁴¹Jesuwe hüke wang, “Hipak ja me kahta niye üsea phapa mepu ngin sheyange ngoh, kahta jawe ngin gho nga hüyange kahta jawe denga sheyange ngoh.

⁴²Imni yo me jawe nehoi shümme üye ok; tüokhei, moini pheeisea Iye lanne tam. Hüma-a aowe Ite sheyong she kenlak shi?”

⁴³Simon-e janne i, “Taowe teihma-a, aohipa te sheyong she ngohpu lanne tam.” (I mongmeilak) Jesuwe i, “Nange janpu shunang.”

⁴⁴Tüophei me shekonyu yete I lüppe ye hüyange Simonte i: “Nange tüopa shekonyu ngeya? Tao nenokte pei, hüyange ü-ya poilak jingne nange üte yeng yepha, hüyangpoi yhawe yoi mükphiye ü-yapoi hüyange I shangminne ya shütte tam.

⁴⁵Nange üte mongmei me nyikyange ü-ya te ja me nehoi yejüp, hüpoi Tao peipu me peiye yhawe ü-ya te jeppu yelak.

⁴⁶Nange ü-shang me minnga phowe yetam, hüpoi yhawe ü-ya-a üpi meipu minngawe maawe tam.

⁴⁷Tüokhei Taowe nang te inang, yhawe yeonge kenpu hüopu kaiye yha me maawe ngohpu ünu winyangki. Aoyinne üjinghawe ken, tüolan te üjinghawe ümeng win she hüonang.”

⁴⁸Tüophei me shekonyute Jesuwe i, “Nang ünu winyangki.”

⁴⁹Jamme shotte ngohpu ülao lanne iman manmanke i, “Ünu nehoi winne okpu tüowa ao shi?”

⁵⁰Hüyangpoi Jesuwe shekonyu te i, “Nang ütinglakpu kaiye nang yinyangki; chingmei me taitüoh.”