Read Konyak Naga LUK 8 Bible Online

LUK 8 - Konyak Naga bible

LUK 8

¹Hipak ütenja linyang phei me Pungao ümei hüyange Kahwang ahngching jeng nyüowe chingnyu chingha üshei linne Jesu tai. Pinlan penme ni I phei jamme tai,

²hüyange iman phei shekolan aoyin ünu yaha ompu mepu mei hüyange iman dak mepu meiye tampalan; Mary (Magdalene she ao te nyik), ao mepu ünu yaha nyit jange tei;

³hüyange Herod ngaophünpalan mepu woipa ja Chuza sheko Joanna, hei Susanna hüyange ülao shekolan aoyin Jesu hei I pinlan toishao me jam üshei woiye tai.

⁴Aope Jesu tangte kahta peipu yelakpe ching ja mepu ching ja ngoiye tai hüyange aope ükhong maawe jem, Jesuwe tüopa ngaolep ngaowe i:

⁵“Üli deipa ja yoi üli deilak jingne tai; Aope Iye kahte üli deiyapeih, üli ütam lamko me hüt, hüyange wang awhalan ne toon küm.

⁶Ütam-a longpieng tang me yei, hüyange kahyao yenang tüowe mamshe phao hüyange liye mah.

⁷üli ütam huhphüm yo te yei, hüyange iman phei jongwante shümme mah.

⁸Hüyange üli ütam kahtok ümei me yei, tahphao jong hüyange peeja gho ngoiye ülick lick.” Jesuwe nishe i, hüma-a, “Leiyah, aoyin me jailak jingne na ngoh jaiyah.”

⁹Aope I pinlanne Jesute tong, ngaolep jonpuwa hangne wongpong shi.

¹⁰Jesuwe imante janne i, “Kahwang ahngching hanghepa üngan ülong jüowe angyapeih tüopa numante phayangki; hüyangpoi ülaolan ne ngaolep kaiye hei shingnang, tüokaiye iman-e leine ok hüpoi ye-ngelak, hüyange jailak hüpoi yeshinglak.”

¹¹Sha-a ngaolep te leppuwa hatüo ngoh nang: üli te leppuwa Kahwang ngao.

¹²Lamko te yeipu üli te leppuwa aoyinne ngaowa jaiyah, hüpoi kahshih peiye iman mintah yin she iman mongjang me peiyangpu yinyelak ngaolan yahteipu.

¹³Longpieng tangme yeipu üli leppuwa aoyinne yinyepu ngaolan jaiyapeih mongmei me mamshe yahpu. Hüpoi ümong yengoi, hipak ütenjapu jingne hei iman-e ütinglak hüyange tokpu hipak aope peiyapei iman lemme mah.

¹⁴Hanghepa üli huhphüm yo me yei tüote leppuwa aoyinne jai, hüpoi shangshih hei hakke hepu hüyange otamaohepu üyin yo me iman ompu kaiye, iman toishao me ülick ye-nge.

¹⁵Hanghepa üli kahtok ümei me yei, leppuwa aoyinne pungao ümei jai hüyange üyin ümei phei yoi mongme tükke jonne ülick lick ne tam! Tüopa hüo nang.

¹⁶“Aowe-o vüntük pahyange muhto me küppe yejema-a liengphang me ye-ang. Hüke anghah shepu nanleiye, kahta peipu üsheite teetamlak jingne Iye vüntük yongjing kenme angnang.

¹⁷Hanghepa jüowe anglakei tüopa ütahte ngaiye tamlak, hüyange hangheyin büange angyapeih tüolak hüyange wangngaite yah peilak.

¹⁸“Numan-e hangke jai, kentingyah; hangjingne ao me üjingha ngoh, Ite paowe phalak, aoyin me hango yenang, hüpoi I me üjingha ngohnang she aoyinne teihyapei lanshe yahteilak.”

¹⁹Hüwante Jesu Inyu hei inaolan I tangte pei, hüpoi ükhong maawe ngohpu jingne I phei yehüo ok.

²⁰Kahta ütamme Jesute i, “Nangnyu hei nang naolanne nang phei hüo huwe nokshao me yonge ngohnangki!”

²¹Hüpoi iman te Jesuwe i, “Ünyu hei ünaolan-a aoyinne Kahwang ngao jai hüyange shaoshan tüolan ngohnang.”

²²Nyih ja Jesu hüyange I pinlan lisheng ja me ong, hüyange Iye imante i, “Tüopa yeng kaiye jaye kaote wenhah.” Tüokhei iman yayong.

²³Iman yengme lisheng yeih-e kem jang kemme Jesu mükngoih shonge shiye ta. Iman yengching üwo me ngohwante waishihwangkhah üyong pei hüyange lishenga yenge maa, hüyange iman shaaji wengtuh me ngoh.

²⁴Pinlan Jesu tangte peiye loiye i, “Konnyüopa, konnyüopa: teman shaaji lilak yang!” Jesu shiye ngohpu lüo, hüyange wangyang hei yengmokh te ngaowe tee, wangyei yepo hüyange yeonge meiye ümok hümme lak.

²⁵Tüophei me Jesuwe pinlan te i, “Numan ütinglakpu üpu?” Hüyangpoi iman yashan hüyange nyam, hüyange iman-e jawe ja te ngaowe i: “Hümma-a hatüo kahta-a aoshi? Iye wangyang hei yeng te ngaowe i, hüyange iman-e I ngao jai!”

²⁶Galilee yengching kaiye ngohpu Gerasenes janye te iman pah pei,

²⁷Jesu yengnah ngoiye peipu phei jam she, laa omme ngohpu kahta ja ching mepu peiye I phei hüo. Hipak nangjange laowe nokme yengoh hüyange nyemo yeyah, hüpoi mangkoksa yo me ngoh-e I hipak win.

²⁸Aope Iye Jesu nge Iye yeonge yonge üngwün, hüyange I sheshao me lamyange üngwünne i: “Ütahpa Kahwang üha Jesu! Nange ü-mepu hanghe jaihu nangki? Üte tahtee pha she taowe nangte tongnang!”

²⁹Iye hüke ngaopuwa Jesuwe I mepu ünu yahalan tailak jingne ngaokeng phayangki, tüokhei Iye tüopa ngao. Yelakpe Iye tükke angyangki hüyange I ya hei yak me yanne khakyange angyapoi ünu wong kaiye Iye lanpu ok hüyange laawe yelakpe wanwüng jeng te woiye ngohyangki.

³⁰“Nangte hangke minpu?” she Jesuwe tong. Iye janne i, “Ü-min-a üngang” hangjingne laa maawe Ite ong;

³¹hüyange iman-e Jesute iman-a kongpeilei (kahmong) te shonne yeteilak jingne yelakpe yoppe tong.

³²Hüyange tüo ngai, iman phei owe phaoye kaome aklan heei hah-e ngoh yangki. Laa lanne iman kahta mepu jangpu ne mengma-a aklan yo me inne tamlak jingne Jesute tong, hüyange Jesuwe inne tam.

³³Tüokhei laalan kahta mepu yuwe aklan te ong; aklan khongkümpu phaoyete phet hüyange khongküm yengnah wak me yei, shamyeng me hüng.

³⁴Aope ak yomme ngohpu kahtalanne hanghe ngaiyapeih nge, hüyange iman phette ye-e chingshao me ngohpu kahhampalan üshei te tüopa pong.

³⁵Hanghe ngaiyapeih leilak jingne kahtalan pei. Iman Jesu tangte pei, hüyange ao mepu laa yanne taiyapeih tüopa kahta inkhek inyange, Jesu yashong me ütahpa ne shotte nge, hüyange iman üshei nyam.

³⁶Aoyinne tüolan ngaipu ngeyapeih, tüopa kahta meipu jeng kahta lilite i.

³⁷Tüophei me Gerasenes kahtok yeme ngohpu kahta üshei jem hüyange iman kahtok mepu yanne tailak jingne Jesute tong, hangjingne I toi ngeyange iman yeonge nyam. Tüokhei Jesu lisheng te ong hüyange leihye.

³⁸Ao kahta I mepu laa Jesuwe jange tei. Iye Jesute yoppe i, “Nang phei tao woiküning.” Hüyangpoi Jesuwe Ite hüke iye tei,

³⁹“Nokte leih-e yetüoh hüyange Kahwange nang jingne hanghe ling itüoh.” Tüopa kahta, Jesuwe Ite hanghe lingyapeih tüopa jeng iye chingshao kaiye ye.

⁴⁰Aope Jesu jaye yengjan mepu leih yeyapeih, ükhong üyong I yekülak tanne ngoh hüyange mongmei me yah.

⁴¹Tüopa ching hüyange synagogue woipa Jairus she minpu kahta pei. I nying nyingke Jesu yashong me ümme khüm hüyange Inokte peilak jingne yoppe tong.

⁴²Hangjingne I me wangpeng penme ni sheko naha ja shingha ngoh hüyange yha li ne dak. Jesu kemjang kemme, ükenphe mepu kahtalan teishunge I shongte jem.

⁴³Kahtalan yo me wangpeng penme ni ngoiye yelakpe iy taiye shange pongpu sheko ja omme ngoh; soihüngpa pong yamme yha me ngohpu shengngin üshei win, hüpoi aowe-o yha meiye yetam ok.

⁴⁴Ükhong phei yha pei hüyange Jesu shongme yongyange I nyejeng te jon, hüyange hüwante muh yha iy yünpu lak.

⁴⁵“Üte aowe jon ei?” she Jesuwe tong. Aowe-o yejon she jan, hüyange Peter i, “Konnyüopa, nang phin me kahtalan teishunge ngohnang hüyange nangte shah nang.”

⁴⁶Hüyangpoi Jesuwe i, “Kahta ütamme üte jonyangki, hangjingne ü-mepu üngan taipu Taowe shingnang.”

⁴⁷Yhawe jonpu shingyang puyang hüyange lowe ngohne ye-oklak she shekonyuwe shing. Tüokhei nin ninshe yha pei hüyange Jesu yashong me ümme khüm. Tüome kahta üshei sheshao me, hangne Iye jon hüyange hüwante muh hangke mei, yhawe i.

⁴⁸Hüwante yha te Jesuwe i. “Yhamei, nang ütinglakpu kaiye nang meiteki. Toloimei me yetüoh.”

⁴⁹Aope Jesuwe tüo ngao iye sho, woipa nok mepu shongshonpa ja peingoi. Jairus te Iye i. “Konnyüopa, meiyange shange hipak yah tahngoh tam, nangha liteki.”

⁵⁰Hüpoi Jesuwe tüo ngao jai hüyange Jairus te i, “Tahnyam, ütinghei laktüoh, hüyange yha meilak.”

⁵¹Aope Inok ngoi, Peter, Jeams hei John hüyange nao Inyu Ipa lan kaiye ao-o noksate inne yetam.

⁵²Tüome ngohpu kahta üshei naha jingne shappe yoonge ngoh. Jesuwe i, “Tahshap, naha lipu yeje, I-a shipu hei üja!”

⁵³Hüpoi iman üsheiye Ite haiye ngao, hangjingne I litepu she iman-e shing.

⁵⁴Hüpoi Jesuwe yha yakme pai, hüyange nyik-e i, “Lüotüoh yhamei!”

⁵⁵Yha yange ye hüyange nünge lüo hüyange yha te hahlak ütam phalak jingne Jesuwe ngaopha.

⁵⁶I nyu heipalan yeonge yashan, hüyangpoi hanghe ngaiyapeih tüopa jeng ao te-o ye-ilak jingne Jesuwe imante i.