Read Konyak Naga LUK 9 Bible Online

LUK 9 - Konyak Naga bible

LUK 9

¹Jesuwe pinlan penme ni jamshe nyik hüyange laa hei ünu yaha khongkümpu janglak hüyange dak mei oklak üngan wong hüyange wong imante pha.

²Tüophei me Kahwang ahngching jeng nyüolak jingne hüyange dakpalan meiye tamlak jingne Iye iman shonne tei.

³Hüyange Iye imante i, “Numan kemlak jingne hango tah yah: shengshaoh, nyekhok, nük hei ngin, hüyange phakshao ni hango tah yah she i.

⁴Hüyange ao nokke numan mongmei yahlakei, tüopa ching mepu mantai mantai tüopa nokme nyoitüoh;

⁵hüyange aoyin kahta lanne numan yeyahlakei aope numan tüopa ching mepu yayonglakei, ümeng hüowe numan yapha mepu mak nehoi konge tüohyange taitüoh.”

⁶Pinlan yayong hüyange pungao ümei konnyüowe hüyange dakpalan meiye tamme chingshao üshei yete tai.

⁷Sha-a Galilee me wanglam lampa Herod-e hanghe ngaiyapeih khongküm jai, hüyange I yeonge nüngnei, hangjingne kahta ütam-e iyangki, “Baptipa John yange yeteki!”

⁸Hüyange ütam-e i, Elijah peiteki, tüohipak memuh ütam-e i, üshongwante ngohyangpu hipa ja yange yeteki.

⁹Tüoyin khongküm jaiye Herodte i, “Taowe John shang yahyang phei ma-a, ao kahta jeng taowe jai hümpu shi?” Hüyange Iye Jesu ngehuwe leipu yelak.

¹⁰Hüyange pinlan leihye, hüyange iman-e hanghe ling khongkümpu Jesute i; Iye iman khongküm woiyange Bethsaida she minpu ching ja te tai.

¹¹Aope ükhonge tüopa ngao jaiyapeih, iman üshei I pheite woi. Iman üshei I phei woine tam, Kahwang ahngching jeng imante ngaowe hüyange dakpalan meiye tamjang tamme tai.

¹²Aope ün hipak ngoi pinlan penme ni I tangte pei hüyange i, “Hatüowa hango yenangpu nyoiyang, ü-o me ngohpu ching hei kahtalan tangte taiye yoi yoi hahying hüyange lojing minyam yahne kahtalan yene tamtüoh.”

¹³Hüpoi Jesuwe imante i, “Iman jingne numan-e hahlak ütam phatüoh.” Iman-e janne i, “Toman-e ngohpu khongkümpu ne an ütoi nga hüyange nyah ni ngoh nangki. Tüome ngohpu kahta khongkümpu jingne toman taiye hahying shakne tamhuwe nange teih pu a?”

¹⁴(Hangjingne netanlan shaha haja nga nanjing ngoh). Hüyange Jesuwe I pinlante hüke i, “Tüome ngohpu khongkümpu, denga pong ükhong ükhong shotne tamtüoh.”

¹⁵Iye ipu kih pinlanne ling hüyange iman üshei shotne tam.

¹⁶Jesuwe antoi nga nyah ni jonyange wangyete lei, tüolan jingne Kahwangte minyong pha, hüyange khoih, tüophei me kahtalan te tamme phalak jingne pinlan yakme pha.

¹⁷Iman üsheiye wangpu shinne moh-hah; hüyange kahtalanne hahyange topu heeito muhto penme ni ngoiye pinlanne shaiye jem.

¹⁸Hipak ja me Jesu I shaha yoppe ngohwante, pinlan I tangte pei. Iye imante tong, “Kahtalanne Tao ao she inangki?”

¹⁹Iman-e jan, “Nanga baptipa John she ütamme inangki,” “Ütamme üne-o nanga Elijah she inangki, hüwante üne-o kahta ütamme nanga üshong wante ngohpu hipa ja yange yepu she inangki.”

²⁰Iye imante tong, “Hüma-a numan-e Taowa ao she teihnangki?” Peter janne i, “Nanga Kahwangpa Messiah!”

²¹Hüyange Jesuwe imante ao te-o tah i she mongjüonge ngaokeng phawe i,

²²“Kahta Üha yeonge shaoshilak, hüyange jeiyonglanne, ütahpa ngengpa lanne, hüyange Ngaokeng nyüopalanne yeyahlak, I li ne tamlak, hüyangpoi nyih lüm shepu nyih me yange yelak.”

²³Hüyange Iye üsheite ngaowe i: “Ütamme ü-phei woihuma-a, Iye yoi nying nyingke tükyah, hüyange nyih jeih yoi tangpem paiyange ü-phei te woiyah.

²⁴Hangjingne aowe yoi üyin yinhuya peih I mahlak; hüpoi üjingne aowe I üyin mahyapeih I yinlak.

²⁵Hangjingne kahta ütamme yoi üyin mah ne tamyange kahtoknyu nopu okpu me hanghe küw ngohlak? Üting me tüone yeje!

²⁶Kahta ütamme üjingne hüyange Taowe nyüopu konte wüowe teihma-a, aope Kahta Üha yoi müktishiwa phei hüyange üpa, hüyange üjaopa shongmokpalan müktishiwa phei yulakei, I jingne wüolak;

²⁷Hüpoi ütingme Taowe numante ipha ning! Hatüo me yonge ngohpulan yo me ütamme Kahwang ahngching mannge mannge she, lipu yengsheng ye yinglak.”

²⁸Hüyange tüolan ngao ngao yang phei me hat ja nanjing ngohyange Jesu Peter, John hei Jeams woiyange kahtang ja te yopne ong.

²⁹Aope I yoppe ngohyapeih, I sheta hei müklei lanshe leijeipu ngai hüyange I nyemo phihlange henge ngai.

³⁰Mokhshe I phei kahta ni ngai hüyange I phei ngao. Tüolan-a Mosa hei Elijah ne ngoh yangki.

³¹Iman wangdang müktishiwapu phei peiyangki hüyange Jerusalem me I lipu kaiye Kahwange mongpu ütahte ngailak jeng ngaowe i.

³²Hüyangpoi Peter hei I phei ngohpu shümpalan shihupuwe naoteiye ngohyangki, hüpoi loine tamme ang, hüyange iman-e müktishiwapu phei Jesu phei kahta ni yongyange nge.

³³Aope Jesu mepu kahta ni yanne tai, Peterwe I te i, “Konnyüopa, teman tüome ngohpu yeonge meiteki. Toman-e tüome panha lüm nang jingne ja, Mosa jingne ja, hüyange Elijah jingne ja welakei.” (Iye hanghe ngaoyapeih meimei-e yeshingpe ngao)

³⁴I ngaojang ngaowe ngohwante wangphom pei, hüyange imante büang, hüyange wangphomme iman tei ye-ngepe büangwante pinlan yeonge nyam.

³⁵Tüohipak me wangphom mepu ngao ja ngaiye hüke i: “Hatüowa taowe lepu üha, Ite jai tüoh!”

³⁶Hüyange aope ngaopu lakyapeih, Jesu shaha yongyange ngoh. Hüyange hanghe ngaiyapei, hatüo jeng ao te-o yengaipe pinlanne lowe ang.

³⁷Ünepu nyih aope iman kahtang mepu yu, ükhong üyong maawe peiye Jesu phei hüo.

³⁸Ükhong yo mepu kahta jawe üngwünne i: “Konnyüopa, üha I shaha ngohpu üha te leipha she taowe nang te yoppuweih!

³⁹Hangjingne mokhshe ünu yahawe I pho hüyange yashong me toiyeta, tüo kaiye I ju me mopphot ngai; tüo kaiye I kemme yongne yemeipe shaoshine tamnangki!

⁴⁰Nang pinlante tüopa jange winyang pha she taowe tong hüyangpoi iman-e ye-ok.”

⁴¹Jesuwe janne i: “Üting yelakpu hüyange teikhahpu jin! Numan phei Tao hangshin ngohlak shi?” Tüophei me kahta te i, “Nang ha tüome yahpei kei.”

⁴²Tüopa naha kemjang kemme ünu yahawe Ite shung, hüyange yashong me kahtok te lam. Jesuwe ünu yaha te ngaokeng phawe ngaowe i, tüophei me naha mei, hüyange Ipa te I phaye.

⁴³Ütahpa Kahwang wong ngeye kahta üshei yashan. Jesuwe lingpu toishao lili ngeyange kahtalan yelakpe moppe yashan, tüohipak me Iye yoi pinlan te hüke i:

⁴⁴“Taowe sha-a numante hanghe ngaolakei tahpe! Kahtalan yak me Kahta Üha phünne phalak oteki.”

⁴⁵Hüyangpoi Iye hanghe ngaoyapeih iman-e yeshing. Iman-e min tah shing she iman mepu tüopa lowe ang, hüyange iman-e tüopa jeng Ite tonglak jingne nyamme teih.

⁴⁶Pinlan, iman yo me ao üyongpa ne menglak shi she, teingaowe mop ngai.

⁴⁷Iman-e hanghe teih Jesuwe shing, tüophei me Iye naha ja I phin me yongne tamyange, iman te hüke i:

⁴⁸“Aowe Ü min me tüopa naha yah yapeih Iye Tao yahnang; Hüyange aowe Tao yahyapeih. Iye aowe Tao shonyapeih I-o yahnang. Hangjingne numan yo me ao üjoipa ne menglakei I üshei yome üyongpa ne menglak.”

⁴⁹Johnne hüke ngaowe yong. Iye i, “Konnyüopa.” “Nang min me kahta jawe ünu yaha jange teipu toman-e ngeki, hüyange toman-e Ite büangyangki, hangjingne Iya teman ükhong ne yeje.”

⁵⁰Hüpoi Jesuwe Ite janne i: “I lakne tahtam tüoh.” “Hangjingne numan phei tüi-e yeyongpu üshei numan pheipu.”

⁵¹Aope Jesu wangdang te woiye inlak hipak owe peiyapeih, Iye yoi mongme teih-e Jerusalem te peilak jingne tüm.

⁵²Samaria ching ja me peiye I jingne lampheli tümme tanlak jingne, sheshao yete shongshonpalan ütam Iye shon.

⁵³Hüyangpoi tüome ngohpu kahtalanne I yeyah, hangjingne Jerusalem yete linne tai lakne I pei.

⁵⁴Aope I pin Jeams hei John lanne tüo nge, iman-e tüo ngao i, “Youngwanpa, wangdang mepu vün yeiye iman üshei shuwe tamlak jingne nange tomante lingne tamhuya?”

⁵⁵Hüpoi Jesu lüppe ye hüyange imante tee,

⁵⁶hüyange iman ülao ching jate tai.

⁵⁷Iman lamme kemjang kemme ngohwante, kahta jawe Jesute i, “Nang ümeken me tailakei, tao woilakei;”

⁵⁸Hüwante Jesuwe Ite i, “Hiyanlan-e longsa ngohnang, hüyange wang awhalan ne ülüp ngohnang, hüyangpoi Kahta Üha shangje jing hüyange toloi meijing yenang.”

⁵⁹Iye ülao kahta ja te i, “Ü-pheite woikei.” Hüpoi Iye i, “Konnyüopa, üwangne tao hüng yeshihning hüyange üpa mang muyang küning.”

⁶⁰Hüpoi Jesuwe janne Ite i, “Lipalanne yoi mang minmu yah. Hüpoi nanga taitüoh hüyange Kahwang ahngching konnyüotüoh.”

⁶¹Ülao kahta jawe i, “Konnyüopa, nang pheite tao woilakei, hüpoi üwangne tao nokte ye-e yan ngao iyangkü ning.”

⁶²Jesuwe Ite i, “Kahta aoyinne yayonge tailak jingne tümyange, tokphei yete leilakei, Kahwang ahngching jingne iman wangpu ne yeje.”