Read Konyak Naga HINSHEN 1 Bible Online

HINSHEN 1 - Konyak Naga bible

HINSHEN 1

¹Tüolan ngaowa Israel kahtalan khongkümpute Jordan kaiyang phei me phaonyu jongme Suph ngoishao me Arabah me, Paran hei Tophel nipa, Laban, Hazeroth, hüyange Dizahab me Mosawe ngaopu ngohnang.

²Hatüowa Horeb mepu Edom kahtang lamyete Kadesh Barnea ngoiye nyih pen me ja lam ngohnang.

³Wangpeng deli leat pen me ja shepupa, üwangpa nyih me, Youngwanpawe hangheyin Israel kahtalante ngaowe tamlak jingne Ite hangheyin ngao phayangki khongküm imante Mosawe ngao.

⁴Hatüowa Heshbon me ngohpu Amor ahngpa Sihon, hüyange Edrei me Ashtaroth me ngohpu Bashan ahngpa Og Mosawe okyang phei me.

⁵Jordan kaiyang phei me Moab kahtok me tüopa ngaokhüm Mosawe khoih ngaolak jingne wange i:

⁶“Horeb me teman Youngwanpa Kahwange temante i, Tüopa kahtang me numan wangman-e nyoitepu.

⁷Lakjing sheihtüoh, hüyange yayong tüoh. Amorlan kahtang yete hüyange neikon-e ngohpu kahmüklan üshei yete taitüoh: Jordan kahjee yete, phaotang kahmük yete hüyange üsho yekaote, heyekao kahmükte hüyange Mediterranean yengnah yete. Kanan kahtokte taitüoh, hüyange Lebanon kahtang kaiye Euphrates Yengyin üyong ngoiye taitüoh.

⁸Leihuyah, tüolan kahmük khongkümpu Taowe numan sheshao me angteki. Tao Youngwanpawe numan jing pajeiyonglan Abraham, Isaac, hüyange Jacob, iman hüyange iman pheite imanjing huhayim lante phalak jingne janpu kahtok te ongtüoh hüyange yahtüoh.”

⁹“Hüwante taowe numante ngaoyangki, ‘Numante namnowe numan woilak üjingne jamloipu toishao ne mengteki. Taowe ü-shahawe tüopa hangki ki ne ye-ok;

¹⁰Youngwanpa numan Kahwange numan yeonge jalun-e tamteki, hüyange leihu, tenyih numan ükhong wangdang shanhalan shinne ngohnang.

¹¹Hüke Youngwanpa numan pajeiyonglan Kahwange numan haja tokte haja ngoiye üne-o ünyei ngaiye tamshih, hüyange Iye numante janpu kih-e, numan moiman tamtüoh!

¹²Hüpoi hangke tao ü-shahawe numan hangki yih, hüyange moppu kiye oklak?

¹³Numan nokphonglan phe phe mepu konnangpu, shinge yah okpu, hüyange üpong tüowe okpu kahta letüoh, hüyange taowe numan tangme iman woipa ne menge tamlak.’

¹⁴Numan-e üte jan-e iyangki, ‘Nange toman jingne ipuwa linglak jingne meinangki.’

¹⁵Tüokhei numan nokphong lwngmeilan mepu konnangpu kahta, hüyange shinge okpu kahta leyange numan tangme woipa ne menge tam, hüyange ütam-a haja tangme woipa, ütam-a gho ja tangme woipa, ütam-a denga tangme woipa, hüyange ütam-a pen tangme woipa ne menge tam. Taowe üne-o nokphong lili mepu ülao woipalan-o leyetam yangki.

¹⁶“Hüyange numan kahtalante taowe hüke nyüoweleiye ngaowe i, ‘Numan jeihei naolan pa me ngao jaitüoh, hüyange kahta ja hüyange I jeiheinao nipa me hüyange I phei ngohpu kahhenglan phei ngaoting iye ngao phüntüoh.

¹⁷Ngaophün wante numan-e sheta tahlei; numan-e üjoi hei üyongte jakih-e jailak yang; numan-e kahta sheta te tahnyam, hangjingne ngaophün puwa Kahwang jing ngohnang; hüyange numan jingne meiyange wanpu ngaowa numan-e ü-tangte yah peikei, hüyange hatüo taowe jailak.’

¹⁸Hüyange tüopa hipak me numan-e linglak khongkümpu taowe numante nyüoweleiye ngaowe tamyangki.”

¹⁹“Hüyange Youngwanpa teman Kahwange ngaowe tampukih-e, teman-e Sinai kahtang mepu yayonge tai, hüyange numan-e ngepu wanwüngjeng üyong hüyange nyamlakpa yüngnyu linne Amorlan kahtang kahmük yekaote tai; hüyange teman Kadesh Barnea ngoi.

²⁰Taowe numante i, ‘Youngwanpa teman Kahwange phapu Amorlan kahtang kahmük te numan peiteki.

²¹Leihuyah, Youngwanpa numan Kahwange kahmük-a numan sheshao me angyange ngohnang; Youngwanpa numan pajeiyonglan Kahwange numante ngaopu kih-e, ongtüoh hüyange yahtüoh; tahnyam, yejema-a tahmokh.’

²²“Hüpoi numan kahta lili ü-tangte peiye i, ‘Teman jingne kahmük-a leiye tüohne tailak, hüyange teman hanghepa lam me onglak hüyange chingnyu hanghe yinte teman peilak, tüopa ngaolan teman tangte yahpeilak teman shaoyeme teman-e kahta shonhah.’

²³“Tüopa-a taowe meiye teih; hüyange numan mepu taowe kahta pen me ni nokphong phe phe mepu japong le;

²⁴iman kahtang yekaote ong, hüyange Eshcol kahjee te peiye tüopate kuhshük-e pong.

²⁵Hüyange kahmük me ngohpu pelick ütam iman yak me yahyange hatüo teman tangte yah pei, hüyange ngaolan peipalan peiye i, ‘Youngwanpa teman Kahwange phapu kahtok-a yeongpu kahmük ümei ne ngoh nangki.’”

²⁶“Tüoyangpoi numan-e min ong she mopngai, hüyange Youngwanpa numan Kahwange ngaowe tampu phei tüi-e numan yong.

²⁷Hüyange numan-e numan nyenok me ngao ngaiye ngu nga-e i, ‘Youngwanpawe temante nupuwe Amorlan yak me teman mahtamlak phünne phalak jingne Iye teman Egypt kahtok mepu woipei.

²⁸Teman ümpeyekaote tailak? Teman jeiheinaolan-e teman mongjang paine tam-e hüke i, “Kahtalan-a teman phei sheyong hüyange jin shedao she ngohnang; tüome chingnyu üyong hüyange wang ngoiye pee peyange ngohnang; hüyange tüo tokte kaiye toman-e tüome Anakim hayim nge!” ’ ”

²⁹“Hüwante taowe numante i, ‘Tahmokh, yejema-a imante tahnyam.

³⁰Youngwanpa numan Kahwang ao numan shaoye me tainang, Iye Egypt me numan-e ngeye lingpu khongkümpu kih-e, Iye numan jingne hoklak;

³¹hüyange phaonyu jong me, numan-e shing, hüke kahtawe yoiha tokme puhpu kih-e tüopa kahmük manngoi manngoi Youngwanpa nang Kahwange numan kempu lamnyu püowe puhyange peiyangki.’

³²Tüoyangpoi taowe ngaojang ngaowe tüopa me Youngwanpa numan Kahwangte numan-e üting yelak ok.

³³Iye numan nyenok yongjing yomlak jingne yaning vün shongnyu me, hüyange numan hanghe lamnyu me tailak tüopa hüolak nyihning wangphom shongnyu me numan sheshao me taiyangki.”

³⁴“Aope numan-e ngao ngaipu Youngwanpawe jai, I mongshih ngai hüyange jiengjep-e i,

³⁵‘Ütingme tüopa jin ümeng tüolan kahta jawe nehoi kahmük ümei hanghepa numan pajeiyong lante taowe phalak jingne jan, ye-ngelak.

³⁶Jephunneh üha Caleb Iye hei ngelak: hüyange Ite hüyange I halante, I yalokjing kahmük-a Taowe phalak; hangjingne Iye phünne phawe Youngwanpa pheite woi!’

³⁷Üne-o numan jingne Youngwanpawe üte nehoi mongshih ngaiye i, ‘Nango tüopa kahtokte ongpu ye oklak:

³⁸Hüpoi nange Nun üha Joshua ao nang sheshao me yonge ngohnang I tüote ongpu oklak; nange Ite henge tamtüoh; hangjingne Iye Israel te hatüo mothlei ne tamlak.

³⁹Üne-o numan üjoihalan aoyin toitamlak jingne hei meng eija she numan-e ngaoyangki, hüyange numan hayim aoyinne tenyih ngoiye ümeng ümei yeshing, iman tüote onglak, hüyange imante Taowe hatüo phalak, hüyange iman-e hatüo yahlak.

⁴⁰Hüpoi numanpa-a tok lüptüoh hüyange wanwüng jengte leih yetüoh, hüyange Ütak Yengching püowe kemtüoh.’

⁴¹“Hüwante numan-e jan-e üte i, ‘Youngwanpa phei tüi-e toman ne ünu omyangki, Youngwanpa teman Kahwange tomante ngaowe tampu khongkümpu kih-e, toman-e onghah hüyange hok hah.’ Hüyange numan kahta liliye wehoklak ngou hei yang jon, hüyange kahtang yekaote onglak jingne tanwaak-e teih.

⁴²“Youngwanpawe üte i, ‘Imante deingao phatüoh: numan wepate numan okne tam-e ngoh ei ja tah ong, yejema-a hok-o tah hok, hangjingne Tao numan phei omme yenang.’

⁴³Hüke taowe numan phei ngao hüpoi numan-e yejai; hüpoi Youngwanpawe ngaophawe tampu phei tüi-e numan-e yong hüyange ngün ngünme kahtang te ong.

⁴⁴Hüwante tüolan kahtang me ngohpu Amorlan numan phei tüi-e yong, hüyange nyahlange jangpu kih-e numan jange tei, hüyange Edom mepu Hormah ngoiye numante jange naone tam.

⁴⁵Hüwante numan leihye hüyange Youngwanpa sheshao me shap; hüpoi Youngwanpawe numan ngaowüng yejai, yejema-a numan te na yeshong.

⁴⁶“Tüojingne numan Kadesh me nyih nangjange nyoi ngoh yangki.”