Read Konyak Naga HINSHEN 10 Bible Online

HINSHEN 10 - Konyak Naga bible

HINSHEN 10

¹“Tüopa hipak me Youngwanpawe üte i, ‘Üwangpa kih-e nange longsheng ni khüw-e lingtüoh, hüyange pee phei ghonu ja lingtüoh, hüyange ü-tangte kahtangte ongkei.

²Nange üwangne mengyangpu longsheng me ngohpu ngaolan-a Taowe tüopa longsheng me nyantamlak; hüyange nange tüolan-a ghonu me hinlak.’

³“Tüokhei taowe acacia pee phei ghonu ja ling, hüyange longsheng ni üwangne khüw-e lingpu kih-e lingyange hüyange longsheng ni jonyange kahtang te tao ong.

⁴Hüyange üwangne nyanpu kih-e ngaokhüm pen Youngwanpawe longsheng me nyan, hanghepa numan jempu nyih me Youngwanpawe kahtang me vün mepu numante ngao; hüyange tüolan-a Youngwanpawe üte pha.

⁵Hüwante tao leih ye hüyange kahtang mepu yuwe, taowe lingpu ghonu me longsheng ni-a taowe hin ang; hüyange Youngwanpawe üte ngaowe tampuke, tüolan-a tüohipak mepu tenyih ngoiye tüoken me ngohnang.”

⁶(Hüyange Israel hayim Beeroth-Benejaakan mepu yayonge Moserah ngoi. Tüoken me Aaron li, hüyange tüoken me I muwe tüoh; hüyange Iha Eleazarwe ngengpa toi me I nanlei.

⁷Tüomepu iman-e Gudgodah te yayonge tai, hüyange Gudgodah mepu Jotbathah yengyin yeng ngaijing te pei.

⁸Tüopa hipak me Youngwanpa ghonu pailak, Youngwanpa sheshao me yongyange I shaoshanlak, hüyange I min me moiman tamlak, hüke tenyih ngoiye iman-e lingpuke, Youngwanpa Levi nokphong yanne ang.

⁹Tüojingne Levi nokphonge yoi pheipulan phei hanghe meitam-o yejema-a mothlei yenangpe ngohnang; Youngwanpa nang Kahwange Ite ngaopu kih-e, Youngwanpa iman mothlei ngohnang.)

¹⁰“Hüke üwangpu kih-e tao kahtang me nyih deli hüyange pha deli ngoh; hüyange tüopa hipak me-o Youngwanpawe ü-ngao jai; Youngwanpawe numan mahne yetam.

¹¹Hüyange Youngwanpawe üte i, ‘Yayongtüoh, hüyange kahtalan shaoyete nang yayong taitüoh, hüyange iman pajeiyonglan imante phalak she janpu kahtokte iman onglak hüyange yahlak.’

¹²“Hüyange sha-a, Israel kahtalan, Youngwanpa nang Kahwange nang mepu hanghe lengpu shingyah; nang Kahwang Youngwanpa te nyamlak, hüyange I lamnyu üshei me kemlak, Ite kenlak, hüyange Youngwanpa nang Kahwangte nang mongjang üsheiye hüyange nang yaha üsheiye shaoshanlak,

¹³hüyange I ngaokhümlan üshei jontüoh; tenyih taowe numante meilak jingne tüolan phanang!

¹⁴Leihuyah, wangdang hüyange ütangye wangdanglan, kahtoknyu hüyange tüome khongkümpu Youngwanpa nang Kahwangjing ngohnang.

¹⁵Tüoyangpoi numan pajeiyonglan imante kenlak Youngwanpawe loishe monghah, hüyange tenyih ngoiye eiha phei numante ünyei lahnyik mongkowe ngohpu kih-e, iman hayim numan leyangki.

¹⁶Tüokhei numan mongjangte küppu üsho khüptüoh, hüyange shaaji numan mükshukhulu ne meng tahngoh.

¹⁷Hangjingne Youngwanpa nang Kahwang kahwanglan tangme Kahwang, nokpulan tangme Nokpu; üyongpa, wong üyongpa, hüyange nyamlakpa Kahwang, aowe sheta yelei, yejema-a yakjai yeyah.

¹⁸Iye khaha hüyange wümnyulan jingne ngaoting phei phüntam nang, hüyange yinpate nyemo hüyange hahying phawe kennang.

¹⁹Tüokhei numan-e yinpalante kentüoh; hangjingne numan hipak ja me Egypt kahtok me yinpa ne menge ngoh yangki.

²⁰Nange Youngwanpa nang Kahwangte nyamme lelak yang; Ite nange shaoshanlak yang; hüyange Ite nange mongjüonge kentüoh; hüyange I min shaha me nange jiengjeplak yang.

²¹I-a nang minyong ngampai ngohnang, hüyange I nang Kahwang aowe nang yoi mükke ngeye tüolan toi üyong hüyange nyamlakpa jingne ling.

²²Aope nangjing pajeiyonglan Egypt te ta, hüwante iman kahta denyit hei tayangki. Hüyangpoi shaapa-a Youngwanpa nang Kahwange wang mepu shanhalanke nang ükhong ngaitam teki.