Read Konyak Naga HINSHEN 11 Bible Online

HINSHEN 11 - Konyak Naga bible

HINSHEN 11

¹“Tüokhei nang Kahwang Youngwanpate kentüoh, hüyange jinte Iye lingne tampu, I ngaokhüm, I ngaophünpu, hüyange Iye ngaowetampu jontüoh.

²Hüyange numan-e tenyih-a shingtüoh; hangjingne numan hayim aoyinne Youngwanpa numan Kahwange teetampu yeshing yejema-a üyin me tokpu yenang, I yonglüopu, I wong nangpu yak hüyange yakhongpu,

³Iye shaonahpulan, hüyange I toishaolan Egypt ahngpa Pharaoh te Egypt me, hüyange I kahmük khongkümpu me lingpu;

⁴hüyange Egypt nyahponglan ükhongte Iye hanghe ling, I koiponglan hüyange tongtoilan, hanghe Ütak yengchinge iman- numante jange woiwante neikon-e tam, hüyange tenyih ngoiye hangke Youngwanpawe iman mahne tam;

⁵hüyange numan-e tüopa nyoijing manngoi manngoi phaonyu jong me Iye numante hanghe ling;

⁶hüyange Reuben hayim Eliab üha Dathan hüyange Abiramte Iye hanghe ling, hangke kahtok-e yoi ju ka, hüyange Israel khongkümpu sheshao me inok noksa, I nyenok, hüyange iman pheite woipu üyin ngohpu khongkümpu omme, iman lünge mah;

⁷hüke Youngwanpawe toi üyong lingpu khongkümpu numan mük-e ngeteki.

⁸“Tüokhei numan wong nangyah, hüyange numan-e hanghepa kahmük Jordan kaiye yahlak jingne ongnang tüokente onge ngohlak jingne, taowe tenyih ngaotampu ngaokhüm khongkümpu jonlak yang;

⁹hüke düamyeng hüyange zahtai jelo yünne ngohpu kahmük hanghe Youngwanpawe numan jing pajeiyong lante hüyange hayimlante phalak jingne jan, tüome numan jinlaowe ngohlak.

¹⁰Hangjingne kahmük hanghepa yahlak numan-e ongnang, hatüowa numan ngoiyange peipu Egypt kahmük me ngohpu, numan-e üli deiye, nang yaphei yeng shaitam yange hoilai hei pesha ngaipu kihpu ne yeje;

¹¹hüpoi numan-e shaaji omne ngohpu kahmük-a kahtang, hüyange kahjee kahmük, hüyange wang mepu yeng yingnang;

¹²Youngwanpa nang Kahwange paowetükpu kahmük; wangpeng üwang mepu wangpeng üküm ngoiye yelakpe Youngwanpa nang Kahwange mük-e leipu kahmük ngoh nang.

¹³“Tenyih taowe numante phapu ngaokhümlan numan-e jailakei she ima-a, Youngwanpa numan Kahwang te kenlakei she ima-a, hüyange nang mongjang üsheiye hüyange nang yaha khongkümpuwe I shaoshan lakei she ima-a,

¹⁴hipak khakshuwe Iye numan kahmük jingne wai shonlak, hüke üwangpa wai hüyange pheimepu wai phalak, tüokaiye numan-e numan tah, wuwüngti hüyange olive minnga yahlak.

¹⁵Hüyange Iye numan tampu yinmok jingne numan phaome phümha ngaine tamlak, hüyange numan-e hahlak ülam lili hüyange numan seanyu mohlak.

¹⁶Numan ülao kahwang yete lüppe ye-e iman shaoshan-e hüyange imante khüm-e numan mongjang lowelamne yetamlak jingne numan kenting yah;

¹⁷hüyange Youngwanpa mongshih numan phei tüi-e ngaiye, Iye wai yekeitamlak ne wang küpne tam-e, hüyange kahtok-e ülick yelick tampe, hüyange numante phane ngohpu kahmük ümei mepu numan mamshe Youngwanpawe yemahtamlak jingne Ite jaiyah.”

¹⁸“Tüojingne numan-e ü-ngaolan numan mongjang hüyange numan üyin yaha me yowe angtüoh; hüyange füo ja leye tüolan-a numan yak me shayange angtüoh, hüyange tüolan-a numan shekeng me füo ja ne shayange angtüoh.

¹⁹Numan-e tüopa-a numan hayimlante nyüotüoh, nang nok me shotte ngohwante hüyange nang yin me kemwante, nang shinlengte ongwante hüyange shinlüo wante tüolan jeng nange ngaotüoh,

²⁰Hüyange nange nenok tashüp hei shonglan me hüyange peten pong me tüolan-a nyantüoh;

²¹tüome nakshih nang üyin hüyange nanghalan üyin, Youngwanpawe numan pajeiyong lante, kahtoknyu ütangye me wang ngohpu mongme imante phalak janpu kahmük me jinlao shangshaowe ngohlak.

²²“Taowe numante ngaowe tampu khongkümpu numan-e kentinge jonma-a, Youngwanpa numan Kahwangte ken-e, I lamnyu khongkümpu me kem-e, Ite mongjüonge tükyange ngohma-a,

²³hüwante numan sheshao mepu Youngwanpawe tüolan jat khongkümpu jange teilak, hüyange numan phei sheyongpu hüyange wong shenangpu jat numan-e ching hahpu oklak.

²⁴Ümeken nyoi me numan yaphawe loklakei, numan jingne menglak; phaonyu jong mepu Lebanon ngoiye Euphrates yengyin mepu henyip ye me Mediterranean yengching ngoiye numan yikeng ne ngohlak.

²⁵Numan phei tüi-e aowe-o yeyong oklak; hüyange Iye numante ngaopu kih-e Youngwanpa numan Kahwange numan ümeken nyoi me ya lokne tamlakei, khongkümpu kahmük me numante nyampu hüyange mokhpu ngaine tamlak.

²⁶“Leihuyah, tenyih taowe numan sheshao me moiman ja hüyange phoiwümpu ja, jajapa hi lelak jingne tüohnang;

²⁷tenyih taowe numante phapu Youngwanpa numan Kahwange ngaowe tampu numan-e jaima-a, moiman-e ngohlak;

²⁸hüyange Youngwanpa numan Kahwange ngaowe tampu numan-e yejaima-a, hüpoi tenyih numante ngaowe tampu mepu yanne taiye numan-e yeshingpu ülao kahwang pheite woiye taima-a, phoiwümpu ngohlak.

²⁹“Aope Youngwanpa nang Kahwange numan-e yahlak jingne taiye ngohpu kahmükte numan woi peilakeih, numan-e moiman-a Gerizim kahtang me ponge tamlak hüyange phoiwümpuwa Ebal kahtang me pongtamlak.

³⁰Moreh me longkham pee phin me, Gilgal sheshao yeme, Arabah me ngohpu Kananlan kahmük me Jordan kaiyange, wanghe nyippu yekao me tüolan-a yenangpu a?

³¹“Hangjingne Youngwanpa numan Kahwange numante phapu kahmük yahne Jordan kaiye numan ongne hei ngohnang; aope numan-e tüopa yahlakei, hüyange tüome ngohlakei,

³²taowe numan sheshao me tenyih angtampu linglak ngaokhüm hüyange ngaokhüm khongkümpu jonlak numan-e kenting lakyang.”