Read Konyak Naga HINSHEN 12 Bible Online

HINSHEN 12 - Konyak Naga bible

HINSHEN 12

¹Youngwanpa numan pajeiyonglan Kahwange, kahtoknyu me numan üyin ngohpute ngoiye phalak jingne ngohpu kahmük me numan-e kentinge jonlak meipu ngaokhüm hüyange linglak ngaokhüm tüolan ngohnang. Tüolante jai yah!

²Nyoijing lili ümeken me aoyin jat numan-e yahlak ne ngohpu jatlan ngohnang, iman kahtang shedaopu me, kahtang üjoiha me, hüyange peshüm phang ümeken me iman kahwang shaoshan-e ngohnang, tüolan khongkümpu numan-e meimei-e mahtam lakyang.

³Iman khümjing menge tamtüoh, hüyange iman üjao shongnyulan khüw wintüoh, hüyange Asherim jakke wintüoh; hüyange iman moung khüw-e menge wintüoh, hüyange tüome iman min mahne tamtüoh.

⁴Numan-e Youngwanpa numan Kahwangte tüolan wanglam kih-e tahyop-tahkhüm.

⁵Hüpoi Youngwanpa numan Kahwange numan nokphonglan üshei mepu I min anglak jingne hanghepa nyoi lelakei I ngohjing tüokente numan-e yam-e peilak yang;

⁶Tüokente numan-e jakke dolak, numan-e toipu dopu, hüyange numan penphong meitam, hüyange numan hünghao dopu, hüyange numan-e phalak jingne jiengpu hüyange mongloong dopu, hüyange numan mahu hüyange nyee üwangne puhpu numan-e yah peilak yang.

⁷Hüyange tüome Youngwanpa numan Kahwang sheshao me hahlak yang, hüyange numan-e lingpu khongkümpu hanghe me Youngwanpa nang Kahwange numan moimantam nang, nenok noksalan omme mongmeilak.

⁸Numan-e tenyih tüome teman-e lingpu kih-e, kahta liliye yoiye mongpu kih-e linge hango yejonlak yang;

⁹hangjingne Youngwanpa nang Kahwange numante phane ngohpu numan ngohjing hüyange mothleilak-a numan-e üne-o manngoipe ngohnang.

¹⁰Hüpoi aope numan-e Jordan kailakei, hüyange Youngwanpa numan Kahwange numante phalakpa kahmük me ngohlakei, hüyange numan neikon-e ngohpu wepa khongkümpu mepu numante toloimei ne tam-e numan yinne tampu me ngohlakei;

¹¹hüwante hanghepa kahmük me Youngwanpa numan Kahwange I min angtamlak jingne lelakei tüoken me taowe numante ngaowetampu khongkümpu yah peitüoh; numan jakke dopu, numan-e toidopu yinmok, numan jing penphong dopu hüyange numan yak mepu dopu, hüyange numan lepu jiengjeppu, hanghepa numan-e Youngwanpa te phalak jingne jieng, yah pei tüoh.

¹²Hüyange Youngwanpa nang Kahwang sheshao me numan, numan shela hüyange yhalalan, numan rhapa hüyange rhanyulan hüyange numan ching me ngohpu Levilane-o mongmeilak; hangjingne iman numan phei meitam yejema-a mothlei yenang.

¹³Nange ngepu nyoijing lili me jakke dopu yedolak jingne kenting yah.

¹⁴Hüpoi numan nokphong yikeng mong yo me nyoijing ja hanghepa me Youngwanpawe lelakei, tüome nange nangjing jakke dopu phatüoh, hüyange tüome taowe nangte ngaowe tampu khongkümpu lingtüoh.

¹⁵Tüoyangpoi, Youngwanpa nang Kahwange nangte phapu moiman phei shuwe, meishi kihpu, hüyange tok kihpu, yejaopu hüyange jaopu yinmok, nange hangshin hahhulakei, numching wankam mong üshei me toine ok hüyange hahne ok.

¹⁶Hüpoi nange iy yehahlak yang; nange hatüowa kahtok me yeng yünpu kih-e shokke wintüoh.

¹⁷Nang tah penphong meitam, yejema-a nang jing wuwüngti, yejema-a nangjing olive minnga, yejema-a nang jing mahulan, yejema-a nang nyee ükhong mepu üwangne puhpu, yejema-a nange jienge angpu ütam, yejema-a nange mongloong dopu, yejema-a nang yak mepu phapu dopu penphong meitam, nange numching chingkam mongme yehahlak yang;

¹⁸hüpoi nange Youngwanpawe lepu nyoi me, nang, nangha, nang yhala, nang rhapa hüyange rhanyu hüyange numan yo me ngohpu Levilan-e Youngwanpa nang Kahwang sheshao me hahlak yang, hüyange nange lingpu khongkümpu me Youngwanpa nang Kahwang sheshao me mongmei sheiye nang ngohlak.

¹⁹Nang, nang kahtok me ngohpute ngoiye Levilan win-e ye-anglak jingne kenting yah.

²⁰“Aope Youngwanpa nang Kahwange nang yikeng khaowe tamlakei, hüke Iye nangte janpuke, hüyange ‘taowe mei hahlak,’ she aope nange ilakei, hangjingne nange mei hahlak lahnyik nang, nange hangshin hahhu hahpu oklak.

²¹Youngwanpa nang Kahwange I min anglak lepu nyoi nang mepu jamloi jaiye taiye ngohma-a, hüwante nang mahu yejema-a nyee ükhong Youngwanpawe nangte phapu mepu toitüoh; hüyange taowe nangte ngaowe tampuke, nang yahawe hangshin-e hahhu hatüowa numching wankam mongme hahne ok.

²²Wanglam me yejaopu hei jaopu ne jeyah, hanghene menglakei hatüo meishi, tok hüyange yejaopu hüyange jaopu jamme hahpuke, hatüo hahlak yang.

²³Iy hei yehahlak kentingyah, hangjingne iy-a üyin ngohnang, hüyange nange üyin-a mei phei yehahlak yang.

²⁴Nange iy-a hahying phei yehahlak yang; nange hatüowa kahtok me yeng kih-e yünne tamlak yang.

²⁵Youngwanpa sheshao me hanghe shunang hatüo nange lingtüoh, nang hüyange nang phei me nanghayim moimanlak jingne nange hatüo yehahlak yang.

²⁶Hüpoi nang jing hanghe üjao toinan hüyange jienge tampu ngohnang, hüyange nange jiengpu dopu, nange yahlak, hüyange hatüo yahyange Youngwanpawe lepu nyoite taitüoh.

²⁷Nange jakke dopu, mei hei iy omme, Youngwanpa nang Kahwang wümjong tangme dotüoh; hüyange nange toipu yinmok iy-a Youngwanpa nang Kahwang wümjong tangme shokke tamlak, hüyange mei-a nange hahlak.

²⁸“Nange Youngwanpa nang Kahwang sheshao me hanghe meipu ngoh hüyange üting hatüo lingwante nang hüyange nang pheite nang hayim jinte meiye tailak jingne, taowe nangte ngaowe tampu khongkümpu jontüoh hüyange jaitüoh.”

²⁹“Aope Youngwanpa nang Kahwange numan-e yahne taipu jatlan numan sheshao mepu mahne tamlakei hüyange nange iman yah oklakei, hüyange iman kahmük me ngohlakei,

³⁰nang sheshao me iman mahne tamyange, nang shunge tamme iman pheite yewoilak nang nying nyingke kenting yah. Hüyange nange iman kahwanglante teitonge, ‘tüolan jatte iman kahwangte hangke shaoshan nangshi? -she hüke taowe-o linglak jingne she tah tong.’

³¹Nange Youngwanpa nang Kahwangte iman-e iman kahwanglante yoppe khümpuke hüke tahling; hangjingne Youngwanpa sheshao me nulakpa toi khongkümpu, hanghepa Iye nunang, hatüo iman-e yoi kahwanglan jingne lingteki; hangjingne imanjing shela hüyange yhalalan-o wümjong vün me iman kahwanglan jingne iman-e jakke tamteki.

³²“Hangheyin taowe numante ngaowe tam, tüopa numan-e khongkümpu lingtüoh, nange tüopa me hango tahpüo, yejema-a hatüo mepu hango yah tahtei.”