Read Konyak Naga HINSHEN 13 Bible Online

HINSHEN 13 - Konyak Naga bible

HINSHEN 13

¹“Numan yo me hipa ja yejema-a mang mangpa ja ngaiye yepinlakpa ja yejema-a yashanyali ja numante phama-a,

²hüyange iman-e ipu yepinlakpa hüyange yashanyali ngaiyange iman-e ‘Nange yeshingpu ülao kahwang pheite taihah hüyange teman-e iman shaoshanhah’ she ima-a,

³numan-e tüopa hipa-a yejema-a mangmangpa ngao yejailak yang; hangjingne Youngwanpa numan Kahwange nang mongjang üsheiye hüyange nang yaha üsheiye Youngwanpa numan Kahwang ütingpa me kenpu heiya yekenpu tüopa shinglak jingne numan toknang.

⁴Youngwanpa numan Kahwang pheite numan woilak yang, hüyange Ite nyamlelak yang; hüyange Iye ngaowe tampu jonlak yang, hüyange I ngaowüng jailak yang, hüyange Ite hei numan-e shaoshan lakyang, hüyange Ite mongjüonge numan-e künyange ngohlak yang.

⁵Hüpoi tüopa hipa-a yejema-a mang mangpa-a, li ne tamlak yang, hangjingne Youngwanpa numan Kahwang, aowe numan Egypt kahmük mepu woitei hüyange rha nok mepu shak, I phei tüi-e Iye ngaonang, hüyange Youngwanpa nang Kahwange nangte ngaowe tampu lamnyu mepu numan yahteilak jingne ngang. Hüke numan-e yemeipalan numan yo mepu winlak yang.

⁶“Nang jeiheinao, nangnyu üha, yejema-a nangha, yejema-a nang yhala, yejema-a nange mongkenpu shekonyuwe, yejema-a nang mongken shümpa ümei ütam-e numan jing pajeiyong lan-e aope-o yekhümpu ülao kahwang lante yoppe khüm ne yohpha ma-a,

⁷iman yo mepu ütam-e nangte hengpu phawe ü-o me, yejema-a nang mepu üjai me ngohpu, kahtok jaye üküm mepu jaye üküm ngoiye ngohpu ülao kahwang jeng iye, teman-e taihah hüyange ülao kahwangte khümhah she ipha ma-a,

⁸nange Ite yohne tahtam. Ite mong tahpha, yejema-a Ite yejailak yang, yejema-a nang mük-e Ite shüpsheye yeleilak yang, yejema-a nange I hüke tahtüoh, yejema-a nange I yinne angne tah ngang.

⁹Hüpoi iman toitüoh! I toilak jingne üwangne longe shüppe wangpa ne nang mengtüoh, tüophei me nakshih ülaolan moilan-e Ite longe shüppe toine tamtüoh.

¹⁰I-a longe shüppe toilak yang, hangjingne rha nok mepu, Egypt kahmük mepu woipeipu Youngwanpa nang Kahwang mepu nang yanne teine Iye ngang.

¹¹Tüome nakshih Israel khongkümpuwe hatüo jailak, hüyange nyamlak, hüyange tüopa kih-e ümeng numan yo me aope-o yelinglak.”

¹²“Youngwanpa nang Kahwange numante numan ngohlak jingne phapu chingnyu ja me hükihpu ngaipu jaima-a,

¹³hüyange numan yo me angsa ütam-e taiye chingnyu me ngohpu ütam yohyange, ‘Teman-e taiye numan-e yeshingpu kahwang ülao kahwang shaoshanhah’ she ima-a,

¹⁴hüwante nange meimei-e teitonge yamlak yang, hüyange leihu, numan yo me tüopa-a nulakpa toi lingteki she saki phawe ütingpa she yongma-a;

¹⁵numan-e tüopa chingnyu me ngohpalan ütingme yanglow phei meimei-e mahne tamtüoh, hüyange tüopa me ngohpu khongküm hüyange tampu yinmok om-e yanglow-e mahtamlak yang.

¹⁶Hüyange tüolan nyoime ngohpu kahtalan jing nyieyahpu moth khongkümpu jamshe shai jemtüoh, hüyange tüolan-a chingnyu mongme phonge angtüoh. Tüophei me Youngwanpa nang Kahwangte dopu ja ne tüolan chingnyu hüyange sheminlam phe-a vün me jakke tamtüoh. Hüwante tüopa-a jintepu jingne heammah teiye ngohlak, hüyange nishe aope-o linge yepu ye-oklak.

¹⁷Mahlakpa me omyangpu toinan hanghe-o nang jingne she nangme tükke tah ang, hümme nakshih Youngwanpawe nyamlakpa ne I mongshih ngaipu mepu lüppe, Iye nang pajeiyong lante janpu kih-e nangte shüpshe hüolak, hüyange yayeng shüpshe ngohlak;

¹⁸tenyih taowe nangte phapu Iye ngaowetampu khongküm nange jonma-a, hüyange Youngwanpa nang Kahwang sheshao me hanghe ütingpa hatüo lingma-a, hüyange Youngwanpa nang Kahwang ngaowüng nange jaima-a hüke ngohlak.”