Read Konyak Naga HINSHEN 14 Bible Online

HINSHEN 14 - Konyak Naga bible

HINSHEN 14

¹“Numan-a Youngwanpa jing hayim ngohnang. Numan-e litepupa jingne üko hüowe yejema-a sheshaoye shanglin yange yehüolak yang.

²Hangjingne numan-a numanjing Kahwang Youngwanpa jing üjao kahta ngohnang. Hüyange kahtoknyu me ngohpu kahta khongkümpu yo mepu numan Iye yoi kahta ülaopa ne menglak jingne Iye leye ngohnang.”

³“Yejao yeshapu hango nange tah hah.

⁴Tüolan-a nange hah oklaklan yinmok ne ngohkülak: mahu, nyee, youn,

⁵meishi, tok, meiyah, meiyah youn, aolameishi, meishitok hüyange kahtang nyee.

⁶Hüyange shokphat pu yinmok lili, shok ni ne tange phatyange hüyange heei shaipu yinmoklan nange hahlak yang.

⁷Tüoyangpoi heei shaiyange hüyange lanshe shok phatpu yinmok yo me nange tüolan-a yehahlak yang: udh, yengkong yuh, hüyange yuhle ; hangjingne tüolan-e heeishaiyapoi iman shok yephat, tüolan-a numan jingne yejaopu ne ngohlak.

⁸Hüyange ak tah hah. Hangjingne shok phat yapeyoi, Iye heei yeshai, tüopa-a numan jingne yejao; tüolan mei numan-e yehahlak yang, hüyange tüolan lipu mangte numan-e let nehoi yeletlak yang.”

⁹“Yengme ngohpu khongküm numan-e hahne oklak-a, hanghe yin me yangteng hüyange nyahla ngoh numan-e hahpu oklak.

¹⁰Hüyangpoi hangheyin me yangteng hüyange nyahla yenang, hatüo numan-e yehahlak yang; tüolan-a numan jingne yejaopu ngohnang.”

¹¹Awha jaoshepu khongkümpu numan-e hahne ok.

¹²Hüpoi numan-e tüolan-a yehahlak yang: yingphang awlan, bongkon, yengching awlan,

¹³lannyu shao, lanha hüyange awlan ülam yoi yoi;

¹⁴khawang hüyange tüopa ülam yoi yoi;

¹⁵yengmom awnyu, nyak aw, hankhak awnyu, lanshao, hüyange tüojat yoi yoi;

¹⁶shushuhlongkhüm, awkhuh, hüyange yeng aw;

¹⁷hüyange yengnah awphoi, meiyok bongkon, hüyange yengching awnyu,

¹⁸lümlei aw, jeam aw, hüyange tüopa lepu yoi yoi; meipu, hüyange awpak.

¹⁹Hüyange üyang nyimpu mokh-ha khongkümpu numan jingne yejaopu ngohnang; tüolan-a yehahlak yang;

²⁰Numan-e jaoshe ihpu mokh-ha khongkümpu hahne ok.

²¹“I nying nyingke lipu hanghe-o numan-e yehah lak yang; hangjingne numan Youngwanpa nang Kahwang jingne üjao kahtalan ngohnang; numan-e tüolan-a numan phei ngohpu yinpa ütamte phalak yang, Iye hatüo hah ne ok; yejema-a hatüowa yinhulante yüotüoh. “Nange youn yejema-a nyee üha yoinyu düamyeng phei yehonglak yang.”

²²“Wangpeng lep iye üli mepu ngaipu numan kah mepu nange penphong phalak yang.

²³Hüyange nyoijing hanghepa I te yoppe khümlak jingne Iye lelakei, tüoken me Youngwanpa nang Kahwang sheshao me numan-e dopu numan tah, wuwüngti hüyange olive minnga hüyange numan mahulan hüyange nyee ükhong üwangne puhpu penphong, hatüowa Youngwanpa nang Kahwang sheshao me nyamleye jinte ngohlak shinge yahlak jingne numan-e hahlak yang.

²⁴Hüpoi aope Youngwanpawe numan moiman tamlakei, numan-e hatüo yah yepei oklak ne lamnyu jamloi jaipu ne mengma-a, hangjingne Youngwanpa nang Kahwange I ngohpu nyoi lepuwa numan mepu üjai me taiye ngohma-a,

²⁵numan-e hatüowa yaoyange ngin ne menge tamtüoh, hüyange ngin-a numan yak me yahyange, Youngwanpa nang Kahwange lepu nyoite taitüoh;

²⁶hüyange nange hangheyin mongyapeih, mahu üpong jeyah, nyee jeyah, wuwüngti jeyah, wongnangpu yinglak jeyah, yejema-a nange hangheyin hah huwe mong, tüopa jingne jonne ok, hüyange nange Youngwanpa nang Kahwang sheshao me hahlak yang; hüyange nang hüyange nenok noksalan mongmeilak.

²⁷Hüyange numan yo me ngohpu Levilan nange yewintüoh lak yang; hangjingne numan phei I meitam yejema-a mothleilak yenang.

²⁸“Wangpeng lüm phei me ükümye lep iye tüopa wangpeng me muh penphong meitam tüopu khongküm chingte inne peiye anglak yang,

²⁹hüyange Levilan iman meitam yejema-a mothleilak numan phei yenang pukhei, numan phei ngohpu yinpa, khah-ha, wümnyu, numan phei ngohpulan, hüke numan-e numan yak-e hangheyin linglakei Youngwanpa nang Kahwange numan moimanlak jingne, iman peiye mongme huwe hahlak.”